މިސްރާއި އޮސްޓްރޭލިއާ ބައްދަލުކުރި މެޗުގެ 48 ވަނަ މިނެޓުގައި މިސްރުގެ މުހައްމަދު ހާނީގެ ބޮލަށް އަނިޔާވެ، އޭނާ ދަނޑުމައްޗަށް ވެއްޓުނެވެ. މެޑިކަލް ޓީމުން ފަރުވާ ދިނުމަށްފަހު، ކޮންކަޝަން (ބޮލަށް އަނިޔާވުން) އެސެސްމެންޓެއް ފުރިހަމަ ނުކޮށް އޭނާ އަލުން ދަނޑަށް އެރިއެވެ. އޭގެ އެންމެ 7 މިނެޓު ފަހުން، މެޗުގެ 55 ވަނަ މިނެޓުގައި އޮސްޓްރޭލިއާގެ އޭޑަން އޯނީލް ނެގި ހިލޭޖެހުމެއް ދިފާއުކުރަން އުޅުމުގެ ތެރޭގައި ހާނީގެ ބޮލުން ބޯޅަ ވަނީ ބައިކޮޅަށެވެ. މިއީ މި ފަހަރުގެ މުބާރާތުގައި އޭނާ އަތުން ބައިކޮޅަށް ވަން ދެވަނަ ގޯލެވެ.

މިސްރުން އޮސްޓްރޭލިއާ ކަޓުވާލީ 1-1 ން އެއްވަރުވެ ޕެނަލްޓީ ޖަހައިގެންނެވެ.

މީގެކުރިން މި ރެކޯޑް އޮތީ ކާކު އަތުގައި؟

ވޯލްޑް ކަޕްގެ އެއް މުބާރާތެއްގައި ބައިކޮޅަށް ދެ ގޯލު ޖެހުމުގެ މި ނޭދެވޭ ރެކޯޑް މީގެކުރިން އޮތީ ހަމައެކަނި ބަލްގޭރިއާގެ ޑިފެންޑަރު އިވާން ވުޓްސޮވް އަތުގައެވެ. ހާނީ މި ރެކޯޑާ ހަމަކުރީ ބަރާބަރު 60 އަހަރު ފަހުންނެވެ.

މުބާރާތުގެ އާ ރެކޯޑެއް

މުހައްމަދު ހާނީ ބައިކޮޅަށް ވައްދާލި މި ގޯލަކީ މި ފަހަރުގެ ވޯލްޑް ކަޕްގައި ފެނުނު ބައިކޮޅަށް ވަތް 13 ވަނަ ގޯލެވެ. މިއާއި އެކު މި އަހަރުގެ މުބާރާތް ވެގެންގޮސްފައިވަނީ ވޯލްޑް ކަޕް ތާރީހުގައިވެސް އެންމެ ގިނައިން ބައިކޮޅަށް ވަތް ގޯލު ފެނުނު މުބާރާތަށެވެ (މީގެކުރިން ރެކޯޑް އޮތީ 12 ގޯލާއެކު 2018 ގެ ރަޝިއާ ވޯލްޑް ކަޕްގައެވެ).