ފީފާ ވޯލްޑް ކަޕްގެ ގްރޫޕް ސްޓޭޖުގައި ރޭ ކްރޮއޭޝިއާ އަތުން 2-1 އިން މޮޅުވެ، ޕޯޗުގަލް މުބާރާތުގެ ގަދަ 16 ވަނަ ބުރުން ޖާގަ ކަށަވަރުކޮށްފިއެވެ. މި މޮޅާއެކު ގަދަ 16 ގައި ޕޯޗުގަލް ނުކުންނަން ޖެހޭނީ ޔޫރަޕުގެ ޗެމްޕިއަން ސްޕެއިނާ ދެކޮޅަށެވެ.
ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ހާފު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ. ނަމަވެސް، މެޗުގެ އޮއިވަރު ބަދަލުވީ 54 ވަނަ މިނެޓުގައި އިވާން ޕެރިސިކް ކޮރޭޝިއާއަށް ޖަހައިދިން ގޯލާއެކުއެވެ.
ނަމަވެސް 68 ވަނަ މިނެޓުގައި ވީއޭއާރް މެދުވެރިކޮށް ޕޯޗުގަލްއަށް ލިބުނު ޕެނަލްޓީއެއް ކާމިޔާބުކޮށް ނަތީޖާ ހަމަހަމަކޮށްދިނީ ކެޕްޓަން ކްރިސްޓިއާނޯ ރޮނާލްޑޯއެވެ.
Advertisement
ޕޯޗުގަލް މޮޅުވި ލަނޑު މެޗުގެ އިތުރު ވަގުތުގެ ތެރޭގައި (4+90 މިނެޓުގައި) ޖަހައިދިނީ ގޮންސާލޯ ރާމޯސްއެވެ.
މެޗުގެ ދެވަނަ ހާފުގައި ޕޯޗުގަލްގެ ކޯޗު ވަނީ ޓީމުގެ ފެންވަރު ހިފެހެއްޓުމަށްޓަކައި ގިނަ ބަދަލުތަކެއް ގެނެސްފައެވެ. އެގޮތުން ބެނާޑޯ ސިލްވާ، ރަފައެލް ލެއާއޯ، ޖޮއާއޯ ކަންސޭލޯ އަދި ރުބެން ނެވްސް ފަދަ ކުޅުންތެރިން ކުޅެން އެރިއެވެ. ކްރޮއޭޝިއާއިންވެސް މާރިއޯ ޕަސަލިޗް އަދި ޖޮސްކޯ ގްވާޑިއޯލް ފަދަ ކުޅުންތެރިންނާއެކު ނަތީޖާ ބަދަލުކުރަން މަސައްކަތް ކުރި ނަމަވެސް ކާމިޔާބެއް ނުވިއެވެ. ރޮނާލްޑޯ ވެސް ވަނީ ފަހު ވަގުތު ކޮޅި ތެރޭ ބާލާފައެވެ.
މި މެޗުގައި ޕޯޗުގަލްގެ ރޫބެން ޑިއާސް އަދި ކްރޮއޭޝިއާގެ ތަޖުރިބާކާރު މިޑްފީލްޑަރު ލޫކާ މޮޑްރިޗަށް ވަނީ ރީނދޫ ކާޑު ދައްކާފައެވެ.
މެޗުގެ ފަބު ސިކުންތުކޮޅުގައި ކްރޮއޭޝިއާއިން ގޯލެއް ޖެހި ނަމަވެސް ވީއޭއާރު ބެލުމަށްފަހު ރެފްރީ ވަނީ އެއީ ގޯލެއް ނޫން ކަމަށް ނިންމާފައެވެ.
ގަދަ 16 ގައި ޕޯޗުގަލް އާއި ސްޕެއިން ބައްދަލުކުރާ މެޗަކީ މުޅި މުބާރާތުގައިވެސް ފާހަގަކޮށްލެވޭނެ ވަރުގަދަ ކުރިމަތިލުމަކަށް ވާނެ ކަމަށް ފުޓްބޯޅަ ދިރާސާކުރާ ފަރާތްތަކުން ލަފާކުރެއެވެ.
