ފީފާ ވޯލްޑް ކަޕްގައި މިރޭ ކުޅުނު މެޗުން އޮސްޓްރިއާގެ މައްޗަށް 3-0 ގެ ނަތީޖާއަކުން ކުރިހޯދައި، ޔޫރަޕްގެ ޗެމްޕިއަން ސްޕެއިން މުބާރާތުގެ ގަދަ 16 އިން ޖާގަ ކަށަވަރުކޮށްފިއެވެ.
މި މެޗުގެ ކުރީކޮޅު ސްޕެއިންގެ ކުޅުން ކޮންމެވެސް ވަރަކަށް ދަށްކޮށް ފެނުނު ނަމަވެސް، މެޗުގެ ފުރިހަމަ ކޮންޓްރޯލް ހޯދައި އެޓީމުން ވަނީ މޮޅު ކުޅުމެއް ދައްކާފައެވެ. މެޗުގެ ފުރަތަމަ ލަނޑު ސްޕެއިންގެ މާކް ކުކުރެއްލާ ކާމިޔާބު ކުރި ނަމަވެސް، އޮސްޓްރިއާގެ ގޯލްކީޕަރަށް ފައުލް ކުރި ކަމަށް ނިންމައި ރެފްރީ އެ ލަނޑު ބަލައެއް ނުގަތެވެ.
ނަމަވެސް، މެޗުގެ ފުރަތަމަ ހާފު ނިމެން ހަތަރު މިނެޓަށް ވެފައި ވަނިކޮށް، ކުކުރެއްލާ ނަގައިދިން ހުރަހަކުން މިކޭލް އޮޔަރްޒަބާލް ވަނީ ސްޕެއިނަށް ކުރިހޯދައިދީފައެވެ. މީގެ ކުރިން ލަމީން ޔަމާލް އާއި އޮޔަރްޒަބާލް ފޮނުވާލި ނުރައްކާތެރި ހަމަލާތަކެއް އޮސްޓްރިއާގެ ކީޕަރު އަލެކްސަންޑަރ ޝްލޭގާ ވަނީ ހުށިޔާރުކަމާއެކު ދިފާއުކޮށްފައެވެ.
Advertisement
މެޗުގެ ދެވަނަ ހާފުގައިވެސް ސްޕެއިންގެ ފަރާތުން ފެނުނީ ވަރުގަދަ ކުޅުމެކެވެ. އެގޮތުން އެލެކްސް ބައޭނާ ނަގައިދިން ބޯޅައަކުން ޕެޑްރޯ ޕޯރޯ ވަނީ ބޮލުން ފޮނުވާލި ހަމަލާއަކުން ސްޕެއިންގެ ދެވަނަ ލަނޑު ކާމިޔާބުކޮށްދީފައެވެ.
މެޗު ނިމެން ފަސް މިނެޓަށް ވެފައި ވަނިކޮށް ލަމީން ޔަމާލް ފޮނުވާލި ބޯޅައެއް އޮސްޓްރިއާގެ ޑޭވިޑް އަލަބާ ގޯލްގެ ރޮނގުމަތިން ދިފާއުކުރި ނަމަވެސް، މެޗުގެ ފަހު ވަގުތުކޮޅުގެ ތެރޭގައި އޮޔަރްޒަބާލް ވަނީ އޭނާގެ ދެވަނަ ލަނޑު ޖަހައި ސްޕެއިނަށް ތިން ޕޮއިންޓް ކަށަވަރުކޮށްދީފައެވެ. މި ލަނޑުވެސް އޭނާ ކާމިޔާބުކުރީ ކުކުރެއްލާ ތަނަވަސްކޮށްދިން ފުރުސަތަކުންނެވެ.
މި މޮޅާއެކު ސްޕެއިން މިހާރު ވަނީ މުބާރާތުގެ ދެވަނަ ބުރަށް ދަތުރުކޮށް، މުބާރާތުގެ ތަށި ހޯދުމަށް ކުރާ އުންމީދު އާކޮށްފައެވެ.
ގަދަ 16 ގައި ސްޕެއިން ނިކުންނާނީ މިރޭ ރާއްޖެ ގަނޑިން 04:00 ފަށާ ޕޯޗުގަލް އާއި ކޮރޮއޭޝިއާ ބައްދަލުކުރާ މެޗުން މޮޅުވާ ގައުމަކާ ދެކޮޅަށެވެ.
