ފީފާ ވޯލްޑް ކަޕްގެ ގަދަ 32 ގެ ފޯރިގަދަ މެޗުތައް ފެށިގެން ކުރިއަށްދާއިރު، މިރޭ އެންމެ ގިނަ ބައެއްގެ ލޯތައް އަމާޒުވާނީ ޓޮރޮންޓޯގެ ބީއެމްއޯ ފީލްޑަށެވެ. މި ދަނޑުގައި މިރޭ ބައްދަލުކުރާނީ ވަރުގަދަ ޕޯޗުގަލް އާއި ހިތްވަރުގަދަ ކްރޮއޭޝިއާއެވެ.

މިރޭ 04:00 ގައި ކުޅުމަށް ހަމަޖެހިފައިވާ މި މެޗުން މޮޅުވާ ބަޔަކު ދެން ބައްދަލުކުރަން ޖެހޭނީ މިރޭ 00:00 ގައި ސްޕެއިން އާއި އޮސްޓްރިއާ ބައްދަލުކުރާ މެޗުން މޮޅުވާ ޓީމަކާއެވެ.

މި މެޗަށް ނުކުންނައިރު ގިނަ ބަޔަކު ގަބޫލުކުރާ ގޮތުގައި މޮޅުވުމުގެ ފުރުސަތު ބޮޑީ ކްރިސްޓިއާނޯ ރޮނާލްޑޯގެ ކެޕްޓަންކަމުގެ ދަށުން ކުޅޭ ޕޯޗުގަލްއެވެ. ގްރޫޕް ސްޓޭޖުގައި އުޒްބެކިސްތާން އަތުން 5-0 އިން މޮޅުވި ނަމަވެސް، ޑީއާރު ކޮންގޯ އާއި ކޮލަމްބިއާއާ ދެކޮޅަށް ކުޅުނު މެޗުތައް އެއްވަރުވުމުން، އެ ޓީމަށް ނަތީޖާ ނެރުމުގައި ދަތިތަކެއް ހުރިކަން ވަނީ ފާހަގަކުރެވިފައެވެ.

ޕޯޗުގަލްގެ ފޯވާޑް ޔާއޯ ފެލިކްސް ބުނެފައިވަނީ މި މެޗުން މޮޅުވާނެ ކަމުގެ ފުރިހަމަ އިތުބާރު އެބައޮތް ކަމަށެވެ. ތާރީހީ ގޮތުން ބަލާއިރުވެސް ކުރި އޮތީ ޕޯޗުގަލްއަށެވެ. ރަސްމީ މެޗުތަކުގައި މިހާތަނަށް ކުޅުނު އަށް މެޗުގެ ތެރެއިން ފަސް މެޗުން ޕޯޗުގަލް މޮޅުވެފައިވާއިރު، ކްރޮއޭޝިއާއަށް މޮޅުވެވުނީ އެންމެ މެޗަކުންނެވެ.

އަނެއްކޮޅުން ކްރޮއޭޝިއާއަކީ ނޮކްއައުޓް ސްޓޭޖުގެ މެޗުތަކުގައި އަބަދުވެސް ނުުގުޑާ ފަދަ ހިތްވަރެއް ދައްކާ ޓީމެކެވެ. ވޭތުވެދިޔަ ދެ ވޯލްޑް ކަޕްގައިވެސް ސެމީ ފައިނަލާ ހަމައަށް ދަތުރުކުރި ކްރޮއޭޝިއާގެ އިންޖީނަކީ އަދިވެސް ތަޖުރިބާކާރު މިޑްފީލްޑަރު ލޫކާ މޮޑްރިޗެވެ. ގްރޫޕްގެ ދެވަނަ ޓީމުގެ ގޮތުގައި އެ ޓީމު ކޮލިފައިވީ ވަރަށް ބޮޑު ހިތްވަރެއް ދައްކައިގެންނެވެ.

މިރޭގެ މެޗަށް ޕޯޗުގަލްއިން ނެރޭނެ ކަމަށް ބެލެވޭ ފުރަތަމަ އެގާރައިގައި ހިމެނެނީ: ދިއޯގޯ ކޮސްޓާ، ޔާއޯ ކަންސެލޯ، ރޫބެން ޑިއާސް، ރެނާޓޯ ވޭގާ، ނޫނޯ މެންޑޭޒް، ޔާއޯ ނެވޭސް، ވިޓީނިއާ، ޕެޑްރޯ ނެޓޯ، ބްރޫނޯ ފެނާންޑޭޒް، ޔާއޯ ފެލިކްސް އަދި ކްރިސްޓިއާނޯ ރޮނާލްޑޯއެވެ.

ޕޯޗުގަލްގެ ހަމަލާތަކާއި ކްރޮއޭޝިއާގެ ތަޖުރިބާކާރު ޑިފެންސާ ދެމެދު ކުރެވޭ މި ހަނގުރާމައަކީ މި މުބާރާތުގެ މިހާތަނަށް ފެންނާނެ އެންމެ ފޯރިގަދަ އެއް މެޗަށް ވާނެކަމަށް ބެލެވެއެވެ.