ވޯލްޑް ކަޕް ފުޓްބޯޅަ މުބާރާތުގައި އިކުއެޑޯ އަތުން މެކްސިކޯ މޮޅުވުމާ ގުޅިގެން މެކްސިކޯ ސިޓީގައި ކުރިއަށްދިޔަ އުފާފާޅުކުރުންތަކުގެ ތެރޭގައި، ނޭވާ ހާސްވެގެން ތިން މީހަކު މަރުވެއްޖެއެވެ.
މެކްސިކޯ ސިޓީގެ ސިއްހީ އިދާރާތަކުން ބުދަ ދުވަހު ހާމަކުރި ގޮތުގައި، މި ހާދިސާގައި މަރުވެފައިވަނީ 19 އަހަރުގެ އަންހެނަކާއި، 48 އަހަރުގެ އަންހެނެއްގެ އިތުރުން 44 އަހަރުގެ ފިރިހެނެކެވެ. މި ތިން މީހުންވެސް މަރުވީ އަންގާރަ ދުވަހު މެކްސިކޯ 2-0 އިން މޮޅުވުމާ ގުޅިގެން ސިޓީގެ މަގުތަކަށް އެއްވި ގިނަ އަދަދެއްގެ މީހުންގެ ތެރޭގައި ތޮއްޖެހި، ނޭވާ ހާސްވެގެންނެވެ.
މެކްސިކޯ ސިޓީގެ ސަރުކާރުން ހާމަކުރި ގޮތުގައި، 1986 ވަނަ އަހަރަށްފަހު ވޯލްޑް ކަޕްގެ ނޮކައުޓް ބުރަކުން އެ ގައުމު ހޯދި ފުރަތަމަ މޮޅު ފާހަގަކުރުމަށް އެއް މިލިއަނަށްވުރެ ގިނަ މީހުން މަގުތަކަށް ނުކުތެވެ. މީގެ ތެރެއިން ގިނަ ބަޔަކު އެއްވީ ސިޓީގެ މެދުތެރޭގައި ހުންނަ "އެންޖެލް އޮފް އިންޑިޕެންޑެންސް" ބިނާގެ ކައިރިއަށެވެ.
Advertisement
މި ހާދިސާއާ ގުޅިގެން ސިޓީގެ މޭޔަރު ކްލާރާ ބްރުގާޑާ ވަނީ މަރުވި މީހުންގެ އާއިލާތަކަށް ތައުޒިޔާ ފޮނުއްވައި، ކުރިއަށް އޮތް ދުވަސްތަކުގައި އެ އާއިލާތަކަށް އެހީތެރިކަން ފޯރުކޮށްދޭނެ ކަމަށް ވިދާޅުވެފައެވެ. އަދި ސޯޝަލް މީޑިއާ މެދުވެރިކޮށް އޭނާ ވަނީ، ސަޕޯޓަރުން އުފާފާޅުކުރުމުގައި ޒިންމާދާރުވުމަށާއި އެކަކު އަނެކަކަށް އަޅާލުމަށް އިލްތިމާސްކުރައްވާފައެވެ.
ކަމާބެހޭ އިދާރާތަކުން ބުނީ، "ޕަސެއޯ ޑެލާ ރިފޯމާ" ސަރަހައްދުގެ އެކި ހިސާބުތަކުން ހޭނެތިފައި ތިބި ތިން މީހަކަށް އެމަޖެންސީ ހިދުމަތްތެރިން ފަރުވާދިން ކަމަށެވެ. ސީ.ޕީ.އާރް ދިނުމަށްފަހު އެ މީހުން ހޮސްޕިޓަލަށް ގެންދިޔަ ނަމަވެސް، ހޮސްޕިޓަލަށް ގެންދިޔަ ފަހުން އެ ތިން މީހުންވެސް ވަނީ މަރުވެފައެވެ.
ދުނިޔޭގެ އެންމެ އާބާދީ ބޮޑު ސިޓީތަކުގެ ތެރޭގައި ހިމެނޭ މެކްސިކޯ ސިޓީގެ މަގުތަކުގައި އުފާފާޅުކުރުންތައް ކުރިއަށްދިޔައިރު، މެޗު ފެށުމުގެ ކުރިންވެސް މޭޔަރު ވަނީ މީހުން ގިނަވުމުގެ ސަބަބުން އެންޖެލް އޮފް އިންޑިޕެންޑެންސް ސަރަހައްދަށް ނުގޮސް، އެހެން ތަންތަނުގައި މެޗު ބަލަން ސަޕޯޓަރުންނަށް އިރުޝާދު ދެއްވާފައެވެ.
އަންގާރަ ދުވަހުގެ މި މޮޅާއެކު މެކްސިކޯ ވަނީ މުބާރާތުގެ ގަދަ 16 އަށް ދަތުރުކޮށްފައެވެ. މި ބުރުގައި މެކްސިކޯ ބައްދަލުކުރަން ޖެހުން ގާތީ އިންގްލެންޑާއެވެ. އެއީ ބުދަ ދުވަހު ކޮންގޯ އަތުން އިންގްލެންޑް މޮޅުވެއްޖެ ނަމަވެއެވެ.
