ފީފާ ވޯލްޑް ކަޕް 2026 ގެ ނޮކްއައުޓް ބުރުގައި އިކުއެޑޯ ބަލިކޮށް، މެކްސިކޯ އިން 40 އަހަރުވީ އިންތިޒާރަކަށް ނިމުން ފަހިކޮށް ގަދަ 16 ގެ ބުރުން ޖާގަ ހޯދައިފިއެވެ. މެކްސިކޯގެ މަޝްހޫރު އަޒްޓެކާ ސްޓޭޑިއަމްގައި ކުޅުނު މި ފޯރިގަދަ މެޗު އެ ގައުމުން ކާމިޔާބުކުރީ 2-0 ގެ ނަތީޖާއަކުންނެވެ.
މެޗުގެ ފުރަތަމަ ހާފުގައި މެކްސިކޯ އިން ވަނީ މޮޅު ކުޅުމެއް ދައްކައި، ނުވަ މިނެޓުގެ ތެރޭގައި ދެ ލަނޑު ޖަހާފައެވެ. އެގޮތުން މެޗުގެ 22 ވަނަ މިނެޓުގައި ޚޫލިއަން ކީނޯނޭސް ފުރަތަމަ ލަނޑު ކާމިޔާބުކޮށްދިންއިރު، 31 ވަނަ މިނެޓުގައި ތަޖުރިބާކާރު ފޯވާޑް ރައުލް ޚިމެނޭޒް ވަނީ ޕެނަލްޓީއަކުން ދެވަނަ ލަނޑު ޖަހައި ޓީމަށް ލީޑު ފުޅާކޮށްދީފައެވެ.
މި މެޗުގައި މެކްސިކޯގެ 17 އަހަރުގެ ޒުވާން މިޑްފީލްޑަރު ގިލްބާޓޯ މޯރާ ފެނުނުއިރު، އޭނާ ވެގެން ގޮސްފައިވަނީ ޕެލޭއަށް ފަހު ވޯލްޑް ކަޕް ނޮކްއައުޓް މެޗެއްގައި ކުޅުނު އެންމެ ޒުވާން ކުޅުންތެރިޔާއަށެވެ.
Advertisement
އިކުއެޑޯ އިން މެޗުގެ ފަހުކޮޅު ލަނޑެއް ޖެހުމަށް ގިނަ މަސައްކަތްތަކެއް ކުރި ނަމަވެސް، މެކްސިކޯގެ ދިފާއީ ބާރު ގަދަވުމާއި މެޗުގެ ފަހު މިނެޓުގައި އިކުއެޑޯގެ ޕިއޭރޯ ހިންކަޕިއޭއަށް ރަތް ކާޑު ދެއްކުމުން އެ ޓީމަށް އިތުރު ހުރަސްތަކެއް ކުރިމަތިވިއެވެ.
މިއީ 1986 ވަނަ އަހަރު އަމިއްލަ ގައުމުގައި ބޭއްވި ވޯލްޑް ކަޕްގައި ބަލްގޭރިޔާ ބަލިކުރި ފަހުން، ވޯލްޑް ކަޕެއްގެ ނޮކްއައުޓް މެޗަކުން މެކްސިކޯ މޮޅުވި ފުރަތަމަ ފަހަރެވެ. އެ އަހަރަށް ފަހު، 1994 އިން 2018 އާ ހަމައަށް ޖެހިޖެހިގެން ބޭއްވުނު ހަތް ވޯލްޑް ކަޕްގައި ވެސް މެކްސިކޯ ގަދަ 16 ގެ ބުރުން ވަނީ ކަޓާފައެވެ. އަދި އެންމެ ފަހުން 2022 ވަނަ އަހަރު ގަތަރުގައި ބޭއްވި ވޯލްޑް ކަޕްގައި އެ ގައުމު ގްރޫޕް ބުރުން ކަޓައިގެން ދިޔައީ ބޮޑު މާޔޫސްކަމެއްގައެވެ.
ނަމަވެސް، މި ފަހަރުގެ މުބާރާތް ކޯ-ހޯސްޓް ކުރާ މެކްސިކޯ އިން މިވަނީ ބޮޑު ކުރިއެރުމެއް ހޯދައި، އެ ގައުމުގެ ސަޕޯޓަރުންނަށް އާ އުންމީދެއް ގެނެސްދީފައެވެ. ގަދަ 16 ގެ ބުރުގައި މެކްސިކޯ ދެން ބައްދަލުކުރަން ޖެހޭނީ އިންގްލެންޑް ނުވަތަ ކޮންގޯއާ އެވެ.
