އީރާނުގެ ހުޅަނގު ޕްރޮވިންސެއް ކަމަށްވާ ކަރްމާންޝާހްގެ ބޯޑަރު ސަރަހައްދެއްގައި ދިން ކުއްލި ބަޑީގެ ހަމަލާއެއްގައި އީރާނުގެ އިސްލާމިކް ރިވޮލިއުޝަނަރީ ގާޑްސް (އައިއާރްޖީސީ) ގެ ދެ މެންބަރުން މަރުވެ، އިތުރު ދެ މީހަކު ޒަޚަމްވެއްޖެއެވެ. އީރާނުގެ ދައުލަތުގެ މީޑިއާތަކުން މި ހާދިސާ ސިފަކޮށްފައިވަނީ "ޓެރަރިސްޓް" އަމަލެއްގެ ގޮތުގައެވެ.
މި ހަމަލާ ދީފައިވަނީ ރޭ އިރާކޮޅުގެ ވަގުތެއްގައި އިރާގު ބޯޑަރު ކައިރީގައެވެ. ހަތިޔާރު އަޅައިގެން ތިބި ގްރޫޕަކުން އައިއާރްޖީސީ ގެ އޮފިސަރުންނަށް ހަމަލާދިނީ އެމީހުން ދިރިއުޅޭ އިމާރާތުގެ ދޮރުމަތީގައި ތިއްބައެވެ.
ހަމަލާގައި މަރުވީ ޚާލިދު ޚާލިދީ އަދި ބުރުހާން ޚުރީސާނީ ނަމަކަށް ކިޔާ ދެ އޮފިސަރުންނެވެ. މީގެ ތެރެއިން ޚާލިދީއަކީ 2022 ވަނަ އަހަރު އީރާނުގައި ހިނގި މުޒާހަރާތައް މައިތިރިކުރުމުގައި އިސްކޮށް އުޅުނު ބަސީޖް މިލިޝިއާގެ މަޝްހޫރު ކޮމާންޑަރެކެވެ.
Advertisement
ހަމަލާގައި ޒަޚަމްވި އަނެއް ދެމީހުންގެ ތެރެއިން ކަމާލް ޝަބްރަންގް ނަމަކަށް ކިޔާ އޮފިސަރެއްގެ ހާލު ސީރިއަސްވެ، މިހާރު އޮތީ ކޯމާއެއްގައެވެ.
"ޚޮރޭ ހޭވާ" ކިޔާ މަދުބަޔަކަށް އެނގޭ ހަތިޔާރުއެޅި ކުރުދީ ޖަމާއަތަކުން ވަނީ މި ހަމަލާގެ ޒިންމާ އުފުލާފައެވެ. އެޖަމާއަތުން ބުނިގޮތުގައި މިއީ 2022 ވަނަ އަހަރު މަހްސާ އަމީނީގެ މަރުގެ މުޒާހަރާތަކާ ގުޅިގެން ސަރުކާރުން ހިންގި ލޭއޮހޮރުވުންތަކުގެ ބަދަލުހިފުމެކެވެ.
އީރާނުގެ ސަލާމަތީ ބާރުތަކުން މިހާރު ދަނީ މި ހަމަލާއާ ގުޅިގެން ޚާއްސަ ތަހުގީގެއް ހިންގައި، ފިލައިގެންދިޔަ ހަތިޔާރުއެޅި މީހުން ހޯދުމުގެ މަސައްކަތް ކުރަމުންނެވެ. މިއީ ފާއިތުވި އެއް ހަފްތާ ތެރޭގައި އީރާނުގެ ކުރުދީ ސަރަހައްދުތަކުގައި ސަލާމަތީ ބާރުތަކަށް އަމާޒުކޮށް ދެވުނު ތިންވަނަ ހަމަލާއެވެ.
