2026 ވަނަ އަހަރުގެ ފީފާ ވޯލްޑް ކަޕްގެ ގްރޫޕް ސްޓޭޖު ނިމިގެންދާއިރު، ބްރެޒިލްގެ ތަރި ވިނީޝިއަސް ޖޫނިއާ ވަނީ ބައިނަލްއަގުވާމީ މައިދާނުގައި އޭނާގެ ހަގީގީ ފެންވަރު ދައްކާލައި، މުޅި ޓީމު ކުރިއަށް ގެންދިއުމުގެ ޒިންމާ އުފުލަން ފަށާފައެވެ. ރެއާލް މެޑްރިޑްގެ މި ހުނަރުވެރި ކުޅުންތެރިޔާ ވަނީ މުހިންމު ވަގުތުތަކުގައި ގޯލްތައް ޖަހައި، ބްރެޒިލް ގަދަ 32 އަށް ގެންގޮސްދީފައެވެ.
"ވޯލްޑް ކަޕަށް ގޮސް ހަތަރު ފަސް ގޯލު ޖަހައި، އަހަރެމެން ޗެމްޕިއަނުންނަށް ވެއްޖެނަމަ، މުޅި މަންޒަރު ބަދަލުވާނެ،" މުބާރާތުގެ ކުރިން ވިނީޝިއަސް ބުނެފައިވެއެވެ. އޭނާގެ މި ބަސްތަކާ އެއްގޮތަށް، މިހާތަނަށް ކުޅުނު ތިން މެޗުގައި ހަތަރު ގޯލު ޖަހައި، ގޯލްޑަން ބޫޓުގެ ރޭހުގައި އޭނާ ވަނީ ކީލިއަން އެމްބާޕޭ އާއި އޮސްމާނޭ ޑެމްބެލޭ ފަދަ ކުޅުންތެރިންނާ އެއްވަރުކޮށްފައެވެ. މި ވަގުތު މި ރޭހުގެ ކުރީގައި އޮތީ ފަސް ގޯލު ޖަހާފައިވާ ލިއޮނަލް މެސީއެވެ.
މޮރޮކޯއާ ދެކޮޅަށް ކުޅުނު ފުރަތަމަ މެޗުގައި ބްރެޒިލް 1-0 އިން ފަހަތުގައި އޮއްވައި، ހިތްގައިމު ގޯލަކުން ޓީމު ސަލާމަތްކޮށްދިނީ ވިނީޝިއަސްއެވެ. އޭގެ ފަހުން ހައިޓީއާ ދެކޮޅަށް ކުޅުނު މެޗުގައި ގޯލެއް ޖަހައި އެސިސްޓެއް ހެދިއިރު، ސްކޮޓްލޭންޑް އަތުން 3-0 އިން ބްރެޒިލް މޮޅުވި މެޗުގައި އޭނާ ވަނީ ދެ ގޯލު ކާމިޔާބުކޮށްފައެވެ.
Advertisement
މި ކާމިޔާބީއާއެކު ވިނީޝިއަސް ވަނީ ބްރެޒިލްގެ ފުޓްބޯޅަ ލެޖެންޑުން ކަމަށްވާ ޖައިރްޒީނިއޯ، ރޮމާރިއޯ، ރޮނާލްޑޯ ނަޒާރިއޯ އަދި ރިވާލްޑޯ ފަދަ ކުޅުންތެރިންގެ ލިސްޓުން ޖާގަ ހޯދާފައެވެ. މިއީ ވޯލްޑް ކަޕެއްގެ ފުރަތަމަ ތިން މެޗުގައިވެސް ގޯލު ޖެހި ބްރެޒިލްގެ މަދު ކުޅުންތެރިންގެ ތެރޭގައި އޭނާ ހިމެނުނު ފަހަރެވެ. ޓީމުގެ ތަޖުރިބާކާރު ކުޅުންތެރިޔާ ނޭމާ ވެސް ވަނީ ވިނީޝިއަސްގެ ކުޅުމަށް ތައުރީފުކޮށް، އޭނާއަކީ މިހާރު ޓީމުގެ އެންމެ މުހިންމު ތަރިކަމަށް ބުނެފައެވެ.
ބްރެޒިލްގެ ކޯޗު ކާލޯ އަންޗެލޮޓީގެ އިރުޝާދުގެ ދަށުން ޓީމު ވަރުގަދަވަމުން އަންނައިރު، ވިނީޝިއަސް ބުނީ ރެއާލް މެޑްރިޑްގައި އޭނާ ދައްކާ ފެންވަރުގެ ކުޅުން ގައުމީ ޓީމުގައި ނުދެއްކި އޮތް އޮތުން މިހާރު ނިމުމަކަށް އައިސްފައިވާ ކަމަށެވެ.
ގަދަ 32 ގެ މެޗުގައި ބްރެޒިލް ނުކުންނާނީ ޖަޕާނާ ދެކޮޅަށެވެ. ޖަޕާނަކީ މީގެ އަށް މަސް ކުރިން އެކުވެރިކަމުގެ މެޗެއްގައި ބްރެޒިލް ބަލިކޮށްފައިވާ ވަރުގަދަ ޓީމެކެވެ. ނަމަވެސް، ވިނީޝިއަސް ހުރީ ބްރެޒިލަށް ހަވަނަ ވޯލްޑް ކަޕް ތަށި ހޯދައިދިނުމުގެ އަޒުމުގައެވެ. "އަހަރެމެންގެ އުންމީދުތައް އަންނަނީ ދުވަހުން ދުވަހަށް ބޮޑުވަމުން،" އޭނާ ބުންޏެވެ.
