ލުބުނާނު ސަރުކާރާއި އިސްރާއީލާއި ދެމެދު ވެފައިވާ އެއްބަސްވުމަކީ ލަދުވެތި އެއްބަސްވުމެއް ކަމަށާއި އެކަމުގެ ސަބަބުން ލުބުނާނުގެ އިސްތިގުލާލަށް ނުރައްކާ ވާނެތީވެ އެ އެއްބަސްވުމަށް އަމަލު ނުކުރަން ‎ހިޒްބުالله އިން ބުނެފިއެވެ.

ލުބުނާނާއި އިސްރާއީލާ ދެމެދު އޮތް ނުތަނަވަސްކަން ކުޑަކޮށް، ސަރަހައްދީ ހަމަޖެހުން ގާއިމުކުރުމަށްޓަކައި އެމެރިކާ މެދުވެރިވެގެން އެކުލަވައިލި ތިން ފަރާތުގެ މެދުގައިވާ "ފްރޭމްވޯކް" އެއްބަސްވުމެއްގައި ސޮއި ކުރީ ވޮޝިންޓަނުގައެވެ. މި އެއްބަސްވުމުގައި ލުބުނާނުގެ ދެކުނު ކޮންޓްރޯލް ކުރަން ޖެހޭނީ ބައިނަލްއަގްވާމީ ގޮތުން ބަލައިގަނެފައިވާ ލުބުނާނުގެ ސަރުކާރު ސިފައިން ކަމަށާއި، ހިޒްބުالله ގެ ހަތިޔާރުތައް އަތުލުމަށް ބުނެފައި ވެއެވެ.

މި އެއްބަސްވުމުގައި ސޮއިކުރުމުގެ ރަސްމިއްޔާތު ކުރިއަށް ދިޔައީ އެމެރިކާގެ ވެރިރަށް ވޮޝިންޓަނުގައެވެ. މިއީ ލުބުނާނާއި އިސްރާއީލުގެ ބޯޑަރު ސަރަހައްދުގައި އުފެދިފައިވާ އަސްކަރީ އަދި ސިޔާސީ ހަމަނުޖެހުންތަކަށް ހައްލެއް ހޯދުމަށާއި، ދެ ގައުމުގެ މެދުގައިވާ ބޯޑަރުގެ މައްސަލަތަކަށް ގާނޫނީ އޮނިގަނޑެއް ކަނޑައެޅުމުގެ މަގުސަދުގައި އެކުލަވައިލެވުނު އެއްބަސްވުމެއް ކަމަށް އެ ގައުމުތަކުން ބުނެއެވެ.

މި އެއްބަސްވުމުގެ ދަށުން ބޯޑަރު ސަރަހައްދުގެ ސަލާމަތީ ކަންކަން ބެލެހެއްޓުމުގައި އަމަލުކުރާނެ އުސޫލުތަކެއް ވަނީ ކަނޑައަޅާފައެވެ. ނަމަވެސް، އިސްރާއީލުން މީގެ ކުރިންވެސް ބައިނަލްއަގުވާމީ އެކި އެއްބަސްވުންތަކާ ޚިލާފުވެ، ލުބުނާނުގެ ސިޔާދަތީ މިނިވަންކަމަށް އަރައިގަނެ، އުދުވާނީ ހަމަލާތައް ދެމުން ގޮސްފައިވާތީ، މި އެއްބަސްވުމުގެ ސަބަބުން އަމަލީ ގޮތުން ނުކުންނާނެ ނަތީޖާއަކާ މެދު ކަންބޮޑުވުން އެބައޮތެވެ. ޚާއްސަކޮށް އިސްރާއީލުގެ ފަރާތުން ފެންނަ އިސްތިއުމާރީ ސިޔާސަތުތަކުގެ ސަބަބުން މިފަދަ އެއްބަސްވުންތަކުގެ ދެމެހެއްޓެނިވިކަމާ މެދު ވަނީ ސުވާލު އުފެދިފައެވެ.

މި އެއްބަސްވުމުގެ ސަބަބުން ލުބުނާނުގެ ދެކުނު ބޯޑަރުގައި މިހާރު އޮތް ނުރައްކާތެރި ހާލަތަށް ބަދަލެއް އަންނާނެ ކަމަށް އެމެރިކާއިން އުންމީދު ކުރެއެވެ. އެހެންނަމަވެސް، މުހައްލިލުން ފާހަގަކުރާ ގޮތުގައި ހަގީގީ ސުލްހަ ގާއިމުކުރެވޭނީ އިސްރާއީލުން ހިންގާ އުދުވާންތައް މުޅިން ހުއްޓާލައި، ބައިނަލްއަގުވާމީ ގާނޫނުތަކަށް ފުރިހަމައަށް ބޯލަނބައިގެންނެވެ.