ފީފާ ވޯލްޑް ކަޕް 2026 ގައި ރޭ ގްރޫޕް އެޗްގެ ސްޕެއިން އަތުން 1-0 އިން ބަލިވެ، ދެ ފަހަރުގެ ދުނިޔޭގެ ޗެމްޕިއަން އުރުގުއާއީ މުބާރާތުގެ ގްރޫޕް ސްޓޭޖައި ހިސާބުން ވަކިވާން ޖެހިއްޖެއެވެ.
މެކްސިކޯގެ ގުއަދަލަހާރާ ސްޓޭޑިއަމްގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 42 ވަނަ މިނެޓުގައި ސްޕެއިނަށް ކާމިޔާބުކޮށްދިނީ އާލެކްސް ބައޭނާއެވެ. މި ލަނޑަކީ އުރުގުއާއީގެ ތަޖުރިބާކާރު ކީޕަރު ފެނާންޑޯ މުސްލޭރާއަށް ހެދުނު ގޯހެއްގެ ފައިދާ ނަގައިގެން ބައޭނާ ކާމިޔާބުކުރި ގޯލެކެވެ.
މި ބައްޔާއެކު އުރުގުއާއީއަށް މި ފަހަރުގެ ވޯލްޑް ކަޕް ނިމުނީ އެއްވެސް މެޗަކުން މޮޅުނުވެ، އެންމެ ދެ ޕޮއިންޓާއެކު ގްރޫޕުގެ ފުލަށް ގޮސްގެންނެވެ.
Advertisement
މެޗުގެ ފުރަތަމަ ހާފުގައި އުރުގުއާއީގެ މެދުތެރެއަށް ކުޅޭ މެނުއަލް އުގާޓޭއަށް ސީރިއަސް އަނިޔާއެއްވެ ދަނޑުން ބާލަން ޖެހުމުން އުރުގުއާއީގެ ރޭވުންތަކަށް ބޮޑު ބުރޫއެއް އެރިއެވެ.
ދެވަނަ ހާފުގައި ޑާވިން ނޫނޭޒް އަދި ފެޑެރިކޯ ވަލްވާޑޭ ފަދަ ތަރިންނާއެކު އުރުގުއާއީން ނަތީޖާ އަނބުރާލަން ގިނަ މަސައްކަތްތަކެއް ކުރި ނަމަވެސް، ސްޕެއިންގެ ވަރުގަދަ ޑިފެންސް ފޫއަޅުވާލެވޭ ގޮތެއް ނުވިއެވެ.
މެޗުގެ ފަހު މިނެޓުގައި އުރުގުއާއީގެ އަގުސްޓިން ކަނޯބިއޯއަށް ދެއްކި ރަތް ކާޑާއެކު އެޓީމުގެ މާޔޫސްކަން އިތުރުވިއެވެ.
މި ނަތީޖާއާއެކު ސްޕެއިން ގްރޫޕުގެ އެއްވަނަ ޓީމުގެ ގޮތުގައި ދެވަނަ ބުރަށް ދަތުރުކުރިއިރު، މި ގްރޫޕުން ދެވަނަ ހޯދައިގެން ސައޫދީ އަރަބިއްޔާއާ އެއްވަރުކުރި ކޭޕް ވާޑް ވެސް ވަނީ ނޮކްއައުޓް ބުރަށް ހޮވިފައެވެ.
