އެމެރިކާ، ކެނެޑާ އަދި މެކްސިކޯގައި ކުރިޔަށްދާ ފީފާ ވޯލްޑްކަޕް 2026 ގެ ގްރޫޕް ސްޓޭޖުގެ ފޯރި މިވަނީ ގަދަވެފައެވެ. ގަދަ 32 ގެ ބުރަށް ދަތުރުކުރާނެ ޓީމުތައް ކަށަވަރުވަމުންދާއިރު، ކުރިޔަށް ހުރި ބައެއް މެޗުތަކަކީ މުޅި މުބާރާތުގެ މިސްރާބު ބަދަލުކޮށްލާނެ ފަދަ މުހިއްމު މެޗުތަކެކެވެ. މި ބުރުގައި ދެން އެންމެ ބޮޑަށް އިންތިޒާރު ކުރެވޭ ފޯރިގަދަ މެޗުތަކަށް ބަލާލަމާ ހިނގާށެވެ.
1. ނޯވޭ - ފްރާންސް (ގްރޫޕް އައި) މިރޭ 00:00 ގައި
Advertisement
މިއީ މުޅި ގްރޫޕް ސްޓޭޖުގައިވެސް ކުޅެވޭނެ އެންމެ ފޯރިގަދަ އެއް މެޗެވެ. މި މެޗު ވެގެންދާނީ ދުނިޔޭގެ އެންމެ ވަރުގަދަ ދެ ފޯވާޑުން ކަމަށްވާ ކީލިއަން އެމްބާޕޭ އާއި އާލިންގް ހާލަންޑް ގެ ކުރިމަތިލުމަކަށެވެ. ދެ ޓީމުވެސް ކުރީގެ މެޗުތައް ކާމިޔާބުކޮށްފައިވާއިރު، މި މެޗުން މޮޅުވާ ބަޔަކަށް ގްރޫޕްގެ އެއްވަނަ މަގާމު ކަށަވަރުވާނެއެވެ.
2. އުރުގުއޭ - ސްޕެއިން (ގްރޫޕް އެޗް) - ފަތިހު 5:00ގައި
ޔޫރަޕްގެ ގަދަބާރު ސްޕެއިން އާއި ދެކުނު އެމެރިކާގެ ހިތްވަރުގަދަ އުރުގުއޭ ބައްދަލުކުރާ މެޗަކީ ފުޓްބޯޅައިގެ ބޮޑު ތާރީޚެއް އޮތް ދެ ޓީމުގެ ކުރިމަތިލުމެކެވެ. ސްޕެއިން ގްރޫޕްގެ ކުރީގައި އޮތްއިރު، އުރުގުއޭއަށް މުބާރާތުގައި ކުރިޔަށް ދިއުމަށް މި މެޗުން ނަތީޖާއެއް ނެރުން މަޖުބޫރެވެ. އުރުގުއޭގެ ފިޒިކަލް ކުޅުމާއި ސްޕެއިންގެ ޓެކްޓިކަލް ޕާސިންގް ގޭމްގެ ސަބަބުން މިއީ ބަލާލަން ވަރަށް ރީތި މެޗަކަށް ވާނެއެވެ.
3.ނިއުޒީލޭންޑް - ބެލްޖިއަމް (ގްރޫޕް ޖީ) - މާދަމާ ހެނދުނު 8:00ގައި
ބެލްޖިއަމް އަށް މި ފަހަރުގެ ވޯލްޑްކަޕްގެ ފެށުން އެހާ ރަނގަޅެއް ނޫނެވެ. އެހެންކަމުން މުބާރާތުން ކެޓުމުގެ ބިރުން ސަލާމަތްވެ، ދެވަނަ ބުރަށް ދިއުމަށް ނިއުޒީލޭންޑް އަތުން ބެލްޖިއަމް މޮޅުވާން ޖެހެއެވެ.
4.ކޮލަމްބިއާ - ޕޯޗުގަލް (ގްރޫޕް ކޭ)
ކްރިސްޓިއާނޯ ރޮނާލްޑޯ ގެ ޕޯޗުގަލް އިން އެންމެ ފަހުން ކުޅުނު މެޗު 5-0 އިން ކާމިޔާބުކޮށް ފޯމަށް އައިސްފައިވާއިރު، ލުއިސް ޑިއާޒްގެ ކޮލަމްބިއާއާ ދެކޮޅަށް ނުކުންނަ މެޗަކީ ފަސޭހަ މެޗަކަށް ނުވާނެއެވެ. މި މެޗުން މޮޅުވެގެން ގްރޫޕްގެ އެއްވަނަ ހޯދުމަށް ދެ ޓީމުންވެސް ބޮޑު ކުރިމަތިލުމަކަށް ދާނެއެވެ.
