ދިވެހިރާއްޖޭގެ ރަސްކަމުގެ ބޮޑުގަނޑުވަރުގެ ތެރެއިން މިހާރު ފެންނާން ހުރި ހަމައެކަނި ބިނާ ކަމަށްވާ "އުސްގެކޮޅު" ގެ ފާރުތަކުގައި ގްރެފިޓީ ކުރަހައި، އެ ތަނަށް ގެއްލުންދޭން ބަޔަކު މަސައްކަތްކޮށްފައިވާ މައްސަލައެއް ފެންމަތިވެއްޖެއެވެ.

މިކަން ސަމާލުކަމަށް އައުމާއެކު، ސަގާފީ ތަރިކަ ބަލަހައްޓާ ވުޒާރާއިން މިހާރު ދަނީ ފުލުހުންނާ ގުޅިގެން މިކަން ހިނގާދިޔަ ގޮތް ތަހުގީގުކޮށް، މި އަމަލު ހިންގި ފަރާތްތައް ހޯދުމުގެ މަސައްކަތް ކުރަމުންނެވެ. ވުޒާރާއިން ހާމަކުރި ގޮތުގައި، މި މައްސަލަ ބެލުމަށްފަހު، ޒިންމާވާ ފަރާތްތަކާމެދު ގާނޫނު ނަންބަރު 2019/12 (ދިވެހިރާއްޖޭގެ ސަގާފީ ތަރިކައިގެ ގާނޫނު) ގެ ދަށުން ހަރުކަށި ފިޔަވަޅު އަޅާނެއެވެ.

އުސްގެކޮޅަކީ މީލާދީން 20 ވަނަ ގަރުނުގެ ކުރީކޮޅު، އައްސުލްތާން ހާޖީ އިމާދުއްދީން (6 ވަނަ) (1893-1903) ބިނާކުރެއްވި، 100 އަހަރަށްވުރެ ގިނަ ދުވަސްވީ ތާރީހީ ބިނާއެކެވެ. މިއީ އިހުގެ ބޮޑުގަނޑުވަރުގެ ބިނާތަކުގެ ތެރެއިން މިއަދު ފެންނާން ހުރި ހަމައެކަނި ބަޔަށް ވާއިރު، މީގެ 74 އަހަރު ކުރިން ރާއްޖޭގެ އެންމެ ފުރަތަމަ ޤައުމީ ދާރުލްއާސާރު ހުޅުވާފައިވަނީވެސް މި އިމާރާތުގައެވެ. މި ތަނަކީ އެ ދުވަސްވަރުގެ އިމާރާތްކުރުމުގެ ފަރުމާ އާއި ފަންނުވެރިކަން ވަރަށް ފުރިހަމައަށް ދައްކުވައިދޭ ތަނެކެވެ.

މި މައްސަލައާ ގުޅިގެން ވުޒާރާއިން ފާހަގަކުރި ގޮތުގައި، އުސްގެކޮޅާއި އެ ސަރަޙައްދު ތަރައްގީކުރުމުގެ މަޝްރޫއެއް ކުރިއަށް ގެންދިއުމަށްޓަކައި، އެތަނުގެ ތަޅުދަނޑިއާއި ބެލެހެއްޓުމުގެ ކަންކަން ވުޒާރާގެ ދަށަށް ބަދަލުކޮށްދިނުމަށް މާލޭ ސިޓީ ކައުންސިލްގައި ރަސްމީކޮށް އެދިފައިވެއެވެ. ނަމަވެސް، މިހާތަނަށް ކައުންސިލުން އެތަން ވުޒާރާއާ ހަވާލުކޮށްފައި ނުވާކަން ވަނީ ފާހަގަކޮށްފައެވެ.

ތާރީހީ މިފަދަ ތަންތަނަށް ދެވޭ ގެއްލުންތަކުގެ ސަބަބުން، ތަނުގެ ސަގާފީ އަގު ގެއްލި، އިއާދަނުކުރެވޭ ފަދަ ބޮޑެތި ގެއްލުންތައް ލިބުމުގެ ބިރު އޮތުމާއެކު، ގާނޫނާއި ގަވާއިދުގެ ތެރެއިން އުސްގެކޮޅު ރައްކާތެރިކޮށް ބެލެހެއްޓުމުގެ މަސައްކަތް ވުޒާރާގެ ދަށަށް ބަދަލުކުރުމުގެ މަސައްކަތް މިހާރު ވަނީ ފަށާފައެވެ.