ވޯލްޑް ކަޕް ގްރޫޕް 'އެލް' ގައި ތޯމަސް ޓުޗެލްގެ އިރުޝާދުގެ ދަށުން ކުޅެމުންދާ އިންގްލެންޑާއި ގާނާ ބައްދަލުކުރި މެޗު 0-0 އިން އެއްވަރުވެ، ގްރޫޕުގެ އެއްވަނަ ހޯދުމަށް އިންގްލެންޑުން ކުރަމުންދާ މަސައްކަތަށް މަޑުޖެހުމެއް އަތުވެއްޖެއެވެ.
އެމެރިކާގެ ބޮސްޓަން ކައިރީގައި އޮންނަ ޖިލެޓް ސްޓޭޑިއަމްގައި 63,983 ސަޕޯޓަރުންގެ ކުރިމަތީގައި ކުޅުނު މި މެޗުގައި އިންގްލެންޑުން ގިނަ ވަގުތު ބޯޅަ ހިފަހައްޓައި، ގޯލަށް ނުރައްކާތެރި 19 ހަމަލާއެއް ފޮނުވާލިއެވެ. ނަމަވެސް، ގާނާގެ ބަދަލު ކީޕަރު ބެންޖަމިން އަސާރޭ ފަހަނައަޅައި ގޯލެއް ކާމިޔާބު ކުރެވޭ ގޮތެއް ނުވިއެވެ. މެޗުގެ ފަހުކޮޅު އިންގްލެންޑްގެ ނިކޯ އޯރިލީ ބޮލުން ފޮނުވާލި ހަމަލާއެއް ގޯލުގެ ދަނޑީގައި ޖެހި ވަނީ ބޭރުވެފައެވެ.
މި ނަތީޖާއާއެކު ދެ ޓީމަށްވެސް މިހާރު ވަނީ ކުޅުނު ދެ މެޗުން 4 ޕޮއިންޓް ލިބިފައެވެ. މިއާއެކު ދެވަނަ ބުރުގެ ޖާގައެއް ދެ ޓީމަށްވެސް ކަށަވަރުވުމާ ގާތްވެފައިވީ ނަމަވެސް، ގްރޫޕުގެ ރޭންކިން ކަނޑައެޅޭނީ ފަހު މެޗުތަކަށް ފަހުގައެވެ. އިންގްލެންޑް ދެން ބައްދަލުކުރާނީ ޕެނަމާއާއެވެ. ގާނާ ނިކުންނާނީ ކްރޮއޭޝިއާއާ ދެކޮޅަށެވެ.
Advertisement
ދުނިޔޭގެ ރޭންކިންގެ 73 ވަނާގައި އޮތް ގާނާއިން އިންގްލެންޑާ ދެކޮޅަށް ދެއްކީ ވަރުގަދަ ޑިފެންސިވް ކުޅުމެކެވެ. މުބާރާތުގެ ކުޑަ ދުވަސްކޮޅެއް ކުރިން ކާލޯސް ކުއިރޯޒް ކޯޗަކަށް އައްޔަންކުރުމަށް ގާނާއިން ނިންމި ނިންމުން ރަނގަޅުކަން މި ނަތީޖާއިން ސާބިތުވެއެވެ. މި މެޗުގައި ގާނާގެ ތޯމަސް ޕާޓޭ އަލުން ޓީމާ ގުޅުނުއިރު، އޭނާ ވަނީ ފުރަތަމަ މެޗުގައި ވިސާގެ މައްސަލައަކާ ހުރެ ނުކުޅެފައެވެ.
އިންގްލެންޑަށް މި މެޗުގައި ކުރިމަތިވި އެންމެ ބޮޑު ގޮންޖެހުމަކީ އެޓީމުގެ ކެޕްޓަން ހެރީ ކޭންއަށް ގޯލެއް ކާމިޔާބު ނުކުރެވުމެވެ. މިއާއެކު ވޯލްޑް ކަޕްގައި އިންގްލެންޑަށް އެންމެ ގިނަ ގޯލު ޖަހައިދިން ގޭރީ ލިނެކާގެ ރެކޯޑާ އެއްވަރުކުރުމަށް ކޭންއަށް އަދިވެސް އިންތިޒާރުކުރަން ޖެހޭނެއެވެ. މީގެ އިތުރުން ޖޫޑް ބެލިންހަމް ވަނީ މި މެޗުގައި އިންގްލެންޑް ގައުމީ ޓީމަށް 50 މެޗު ހަމަކޮށްފައެވެ.
މި މެޗުގައި ގާނާގެ ޕްރިންސް އަދޫއަށް ހަމަލާއެއް އުފެއްދުމަށް ލިބުނު ފުރުސަތެއްގައި، އިންގްލެންޑްގެ ކީޕަރު ޖޯޑަން ޕިކްފޯޑް އޭރިއާ ބޭރަށް ނިކުމެ އޭނާއަށް ހުރަސްއެޅި މައްސަލައިގައި ގާނާއިން ވަނީ ޕެނަލްޓީއަކަށް އެދިފައެވެ. ނަމަވެސް ރެފްރީ ނިންމީ ޕިކްފޯޑަށް ފައުލްވި ކަމަށެވެ.
އިންގްލެންޑުން އަދިވެސް ވޯލްޑް ކަޕްގެ ތާރީހުގައި އެފްރިކާގެ ޓީމެއް އަތުން ބަލިވެފައި ނުވާކަން ފާހަގަކޮށްލެވެއެވެ.
