ވޯލްޑް ކަޕު ގްރޫޕް ކޭ ގައި އުޒްބެކިސްތާނު ކޮޅަށް ފަސް ގޯލު ޖަހައި ފުރަތަމަ މޮޅު ހޯދައިފިއެވެ. ޕޯޗުގަލުން ހޯދި މި ފަސޭހަ މޮޅުގައި އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ ވަނީ ދެ ލަނޑު ކާމިޔާބުކޮށްފައެވެ.
މެޗު ފެށިގެން 6 ވަނަ މިނެޓުގައި ޕޯޗުގަލްއަށް ލީޑު ނަގައިދިނީ ރޮނާލްޑޯއެވެ. މިއީ ޔާއޯ ކަންސޭލޯ ތަނަވަސްކޮށްދިން ފުރުސަތަކުން އޭނާ ކާމިޔާބުކުރި ލަނޑެކެވެ. އޭގެ 11 މިނެޓު ފަހުން، މެޗުގެ 17 ވަނަ މިނެޓުގައި ނޫނޯ މެންޑޭޒް ވަނީ ލަނޑެއް ޖަހައި ޕޯޗުގަލްގެ ލީޑު ފުޅާކޮށްދީފައެވެ.
ފުރަތަމަ ހާފު ނިމުމުގެ ކުރިން، 39 ވަނަ މިނެޓުގައި ބްރޫނޯ ފެނާންޑޭޒް ތަނަވަސްކޮށްދިން ފުރުސަތަކުން ރޮނާލްޑޯ ވަނީ އޭނާގެ ދެވަނަ ލަނޑު ކާމިޔާބުކޮށް، ނަތީޖާ 3-0 އަށް ބަދަލުކޮށްފައެވެ.
Advertisement
ދެވަނަ ހާފުގައި ވެސް ޕޯޗުގަލްއިން ވަނީ ގޯލަށް އެތަކެއް ނުރައްކާއެއް ކޮށްފައެވެ. އެގޮތުން މެޗުގެ 60 ވަނަ މިނެޓުގައި އުޒްބެކިސްތާނުގެ އޭ. ނެމަޓޯވް އަތުން ބައިކޮޅަށް ވަން ލަނޑާއެކު ސްކޯ 4-0 އަށް އެރިއެވެ. ޕޯޗުގަލްގެ ފަހު ލަނޑު މެޗުގެ 87 ވަނަ މިނެޓުގައި ކާމިޔާބުކޮށްދިނީ ރަފައެލް ލެއާއޯއެވެ.
މިރޭގެ މެޗުގައި ރޮނާލްޑޯ ޖެހި ގޯލުތަކާއެކު އޭނަ ވެފައިވަނީ ތަފާތު 6 ވޯލްޑު ކަޕެއްގައި ގޯލު ޖެހި ހަމައެކަނި ކުޅުންތެރިޔާއަށެވެ.
މުޅި މެޗުގައި ވެސް އުޒްބެކިސްތާނަށް ޕޯޗުގަލްގެ ހަމަލާތައް ހުއްޓުވުމުގައި ބޮޑެތި ގޮންޖެހުންތަކަކާ ކުރިމަތިވިއެވެ. މެޗުގެ 29 ވަނަ މިނެޓުގައި ވީއޭއާރް ބެލުމަށްފަހު އުޒްބެކިސްތާނުގެ ލަނޑެއް ގަބޫލުނުކުރަން ނިންމިއިރު، އެ ޓީމުގެ އޯ. ހަމްރޯބެކޯވް އަދި އާރް. ވޭގާއަށް ވަނީ ރީނދޫ ކާޑު ދައްކާފައެވެ.
މި މޮޅާއެކު ޕޯޗުގަލްއިން ވަނީ ކުރިއަށް ހުރި މެޗުތަކަށް ޓީމު އޮތީ ވަރަށް ފުރިހަމައަށް ތައްޔާރުވެފައިކަން ސާބިތުކޮށްދީފައެވެ. އަދި އުމުރުން ދުވަސްވީ ނަމަވެސް ރޮނާލްޑޯ އަކީ އަދިވެސް ބައިނަލްއަގުވާމީ މައިދާނުގައި ނުރައްކާތެރި ފޯވާޑެއްކަން މި މެޗުން އަނެއްކާވެސް ހާމަވެގެންދިޔައެވެ.
