ރައްޔިތުންނަށް ވެފައިވާ ވަޢުދުތައް ފުއްދުމަށް ހުރަސްއެޅުމަކުން އެއްވެސް ފަރާތަކަށް ލިބޭނެ ފައިދާއެއް ނެތް ކަމަށާއި، އިގްތިސާދީ ގޮތުން ކުރިމަތިވެފައިވާ ގޮންޖެހުންތަކުން މަސްވެރިކަމުގެ ސިނާޢަތް އަރައިގަތުމަށް ވަރުގަދަ މަސައްކަތްތަކެއް ކުރަމުންދާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ މިއަދު ނެރުނު "ދަ ޕަލްސް" ޕޮޑްކާސްޓް ސީލީޒްގެ ދެވަނަ އެޕިސޯޑުގައި ވާހަކަފުޅު ދައްކަވަމުންނެވެ. މި އެޕިސޯޑުގައި މައިގަނޑު ގޮތެއްގައި އަލިއަޅުވާލާފައިވަނީ މަސްވެރިކަމުގެ ސިނާއަތަށެވެ. ރައީސް ވަނީ މި ސިނާއަތް ހަރުދަނާކުރުމަށް ކުރަމުންދާ މަސައްކަތްތަކާއި މިހާތަނަށް ހާސިލްކުރެވިފައިވާ މުހިންމު ކަންކަމުގެ ތަފްސީލު ހިއްސާކުރައްވާފައެވެ.

މަސްވެރިކަމުގެ މުޅި ސިނާއަތް ކުރިއެރުވުމަށް ސަރުކާރުން އިސްކަންދޭކަން ފާހަގަކުރައްވަމުން ރައީސް ވިދާޅުވީ، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ހިންގުން ހަރުދަނާކޮށް، މަސައްކަތުގެ ރޭސީން އިތުރުކުރުމަށް ކުރެވުނު މަސައްކަތުން މިހާރުވެސް ހެޔޮ ބަދަލުތަކެއް ފެންނަން ފަށާފައިވާ ކަމަށެވެ. އަދި މަސް ގަންނަ އަގު ކިލޯއަކަށް 20 ރުފިޔާގައި ހިފެހެއްޓުމަށް މަސައްކަތް ކުރަމުންދާ ކަމަށާއި، ހާލަތު ރަނގަޅުވަމުންދާ މިންވަރަކުން އެ އަގު އިތުރަށް ބޮޑުކުރުމަށް އުންމީދު ކުރައްވާ ކަމަށްވެސް އެމަނިކުފާނު ވިދާޅުވިއެވެ.

ބޭރުގެ ބާޒާރުތަކަށް މަސް އެކްސްޕޯޓް ކުރުމާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، އިނގިރޭސިވިލާތުން މިހާރު ދީފައިވާ ޓެރިފް އިސްތިސްނާ ދާއިމީކުރުމަށް މަސައްކަތް ކުރައްވަމުންދާ ކަމަށެވެ. މީގެ އިތުރުން، ކަނޑުމަސްވެރިންގެ ހުރި ކަންބޮޑުވުންތަކަށް ހައްލު ހޯއްދަވައިދެއްވުމަށް ފިޔަވަޅުތައް އަޅުއްވަމުންދާ ކަމަށްވެސް ވިދާޅުވިއެވެ. އެގޮތުން މިފްކޯއިން އަލުން ކަނޑުމަސް ގަންނަން ފެށުމަކީ މަސްވެރިންނަށް އެންމެ އެކަށީގެންވާ އަގު ހޯދައިދެވޭނެ މަގު ކަމަށާއި، މިކަން ކުރިއަށްދާނީ މަސްވެރިންގެ މަޝްވަރާއާއެކު ކަމުގެ ޔަގީންކަން ރައީސް ދެއްވިއެވެ.

މަސްވެރިކަމުގައި އުޅޭ މީހުންގެ އަދަދު މަދުވަމުންދާ ދިއުމަށް އިޝާރާތް ކުރައްވަމުން ރައީސް ވިދާޅުވީ، ސަރުކާރު ހިއްސާވާ ކުންފުނިތަކަށް (އެސްއޯއީ) ބޭނުންވާ ވަރަށްވުރެ ގިނައިން މުވައްޒަފުން ނެގުމުގެ ސަބަބުން، މަސްވެރިކަމުގެ ސިނާޢަތުގައި އުޅުނު ގިނަ ބަޔަކު އެހެން ދާއިރާތަކަށް ގޮސްފައިވާ ކަމަށެވެ. ނަމަވެސް، މިހާރު ކުރިއަށްދާ އެސްއޯއީ ރިފޯމްތަކުގެ ސަބަބުން މުޅި އިޤްތިޞާދަށާއި މަސްވެރިކަމުގެ ސިނާޢަތަށް ހެޔޮ ބަދަލުތަކެއް އަންނާނެ ކަމަށް އެމަނިކުފާނު ވިދާޅުވިއެވެ.

މަސްވެރިކަމުގެ ސިނާއަތް ކުރިއެރުވުމަށް ކުރެވޭ މަސައްކަތްތަކާމެދު ހިތްހަމަޖެހުން ފާޅުކުރައްވަމުން ރައީސް ވަނީ، މާލޭގައި ޒަމާނީ ފެންވަރުގެ މަސް މާރުކޭޓެއް ތަރައްޤީކުރުމަށް ހުރި ހުރަސްތައް ނައްތާލައި، އެ މަޝްރޫޢު ނިންމަވާނެ ކަމުގެ ޔަގީންކަން ދެއްވާފައެވެ.