ވޯލްޑް ކަޕް ފުޓްބޯޅަ މުބާރާތުގައި އަލަށް ވާދަކުރާ ކޭޕް ވާޑުން، ދުނިޔޭގެ ފުޓްބޯޅައިގެ ގަދަބާރެއް ކަމަށްވާ ސްޕެއިން ހިފަހައްޓައި، މުބާރާތުގެ ފުރަތަމަ ބޮޑު ހައިރާންކަން ގެނެސްދީފިއެވެ.

އެމެރިކާގެ އެޓްލާންޓާ ސްޓޭޑިއަމްގައި ކުޅުނު މި މެޗު ނިމުނީ ދެ ޓީމުން ކުރެ އެއްވެސް ޓީމަކަށް ލަނޑެއް ނުޖެހި 0-0 އިން އެއްވަރުވެގެންނެވެ. މިއީ ގާތްގަނޑަކަށް 6 ލައްކަ މީހުންގެ އާބާދީއެއް އޮންނަ ކޭޕް ވާޑުން އެމީހުންގެ ފުރަތަމަ ވޯލްޑް ކަޕްގައި ހޯދި ތާރީހީ ނަތީޖާއެކެވެ.

މެޗުގައި ސްޕެއިނުން 24 ހަމަލާ އުފެއްދި ނަމަވެސް، ކޭޕް ވާޑުގެ ބަދަހި ޑިފެންސާއި 40 އަހަރުގެ ތަޖުރިބާކާރު ގޯލްކީޕަރު ޖޮސިމާ "ވޮޒީނިއާ" ޑިއާސް ވަނީ ހިތްވަރާއެކު އެ ހަމަލާތައް ހުއްޓުވާފައެވެ. ހާއްސަކޮށް ސްޕެއިންގެ ފެރާން ޓޮރޭޒް އާއި އައިމެރިކް ލަޕޯޓް ފޮނުވާލި ނުރައްކާތެރި ހަމަލާތައް ވޮޒީނިއާ ވަނީ ހުށިޔާރުކަމާއެކު ދިފާއުކޮށްފައެވެ.

ސްޕެއިންގެ ކޯޗު ލުއިސް ޑެލަ ފުއެންޓޭ ވަނީ މެޗުގެ ފަހުބައިގައި، އަނިޔާއިން ސަލާމަތްވަމުން އަންނަ ޒުވާން ތަރި ލަމީން ޔަމާލް ކުޅެން އަރުވާފައެވެ. ނަމަވެސް އޭނާއަށްވެސް ކޭޕް ވާޑުގެ ދިފާޢީ ފާރު ފޫއަޅުވާލެވޭ ގޮތެއް ނުވިއެވެ. މެޗުގެ ފަހު މިނެޓްކޮޅުގައި ކޭޕް ވާޑަށް މެޗުން މޮޅުވާނެ ރަނގަޅު ފުރުޞަތުތަކެއް ލިބުނެވެ. އެގޮތުން ޑިނޭ ބޯޖްސް ބޮލުން ފޮނުވާލި ހަމަލާ ސްޕެއިންގެ ކީޕަރު އުނާއި ސިމޯން ދިފާޢުކުރިއިރު، ރަޔާން މެންޑޭޒްއަށް ލިބުނު ފުރުޞަތުވެސް ފާހަގަކޮށްލެވެއެވެ.

ކޭޕް ވާޑުގެ ކޯޗު ބުބިސްޓާ މެޗަށްފަހު ބުނީ، މިއީ ހަމައެކަނި ފުޓްބޯޅަ މެޗެއް ނޫން ކަމަށާއި، މިއީ އެ ގައުމުގެ ސަގާފަތާއި މިއުޒިކާއި މުޅި ގައުމުގެ ރޫޙު ދައްކުވައިދިން ތާރީހީ ވަގުތެއް ކަމަށެވެ.

މި ނަތީޖާއާއެކު ސްޕެއިނަށް ވަނީ ގްރޫޕް ސްޓޭޖް ފަހަނައަޅައި ދިއުމަށް އިތުރު މަސައްކަތްތަކެއް ކުރަން މަޖުބޫރުވެފައެވެ. އަދި ކޭޕް ވާޑުން ވަނީ ދުނިޔޭގެ ފުޓްބޯޅައިގެ ސަމާލުކަން އެމީހުންނަށް ހުއްޓުވާފައެވެ.