އެތައް ބައިވަރު މަޝްވަރާ ތަކަކަށް ފަހު، ހުރްމުޒް ކަނޑުއޮޅި ބައިނަލްއަޤްވާމީ ދުނިޔެއަށް ހުޅުވާލުމަށް ނިންމައި، ހުކުރު ދުވަހު ޖެނީވާގައި ސޮއިކުރުމަށް ހަމަޖެހިފައިވާ ކަމަށް އީރާނުން އިއުލާން ކޮށްފިއެވެ.
އީރާނާއި ހަވާލާދީ މަސްދަރުތައް ބުނާ ގޮތުގައި ޕާކިސްތާނާއި ގަތަރާ އެކު ތެހެރާނުން ވަނީ މިކަމުގައި ވަރަށް ފުޅާ ދާއިރާއެއްގައި މަޝްވަރާ ކޮށްފައެވެ. އަދި އީރާނާއި ގަތަރުގެ ވަފުދުތަކުން އާދީއްތަ ދުވަހު ތެހެރާނުގައި އެތައް ގަޑިއިރެއް ވަންދެން އެއްބަސްވުމާއި ގުޅޭ ޓެކްނިކަލް ތަފްސީލުތައް މުރާޖައާކޮށްފައި ވާއިރު، މިކަމުގައި އީރާނާއި އެކު އެންމެ ގާތުން މަސައްކަތްކުރީ ޕާކިސްތާނާއި ގަތަރުންނެވެ.
އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ މި ހަފްތާގައި ސްވިޒަލޭންޑްގައި ރަސްމީކޮށް ސޮއިކުރާނެ ކަމަށާއި ހުރިހާ އުޅަނދުތައް އަވަހަށް ހުރްމުޒް އާއި ދިމާލަށް ދަތުރުކުރުމަށް އިޢުލާން ކޮށްފައެވެ.
Advertisement
އެމެރިކާގެ އިން ބުނާ ގޮތުގައި މި އެއްބަސްވުމުގެ ސަބަބުން ހަނގުރާމަ ހުއްޓާލުމުގެ މުއްދަތު އިތުރުވެ، ސްޓްރޭޓް އޮފް ހޮރްމޫޒް އަލުން ހުޅުވައި، އީރާނުގެ ނިއުކްލިއާ ޕްރޮގްރާމާއި ދަތިކުރުމުގެ ފިޔަވަޅުތަކުގެ މައްސަލަތަކާ ގުޅޭ ގޮތުން އިތުރު މަޝްވަރާތައް ފަށާނެއެވެ.
މީގެ ކުރިން މި އެއްބަސްވުމުގައި ސޮއިކުރަން ރާވާފައި ވަނީ އިއްޔެއެވެ. ނަމަވެސް އީރާނުގެ ފޮރިން މިނިސްޓްރީން ވަނީ އެކަން ކެންސަލްކޮށް އަލުން އެއްބަސްވުމަށް ބަދަލު ގެނެސްފައެވެ.
އީރާނުން މިހާރު ބުނަނީ މެމޮރެންޑަމް ތައްޔާރުވެފައިވާ ކަމަށާއި ނަމަވެސް ސޮއިކުރުމަށް ފަހު 60 ދުވަހުގެ ފޮލޯއަޕް މުއްދަތެއްގެ ތެރޭގައި ތަންފީޒު ކުރުމުގެ ތަފްސީލުތަކާ މެދު މަޝްވަރާ ކުރެވޭނެ ކަމަށެވެ.
