ޖަރުމަނުގެ ގައުމީ ފުޓްބޯޅަ ޓީމުން ކިއުރަސާއޯއާ ދެކޮޅަށް ކުޅުނު މެޗު 7-1 ގެ ތަފާތު ބޮޑު ނަތީޖާއަކުން ކާމިޔާބުކޮށް، މުޅި ދުނިޔެއަށް 2014 ވަނަ އަހަރުގެ ވޯލްޑް ކަޕްގެ ހަނދާންތައް އާކޮށްދީފިއެވެ. މި ނަތީޖާއަކީ 2014 ވަނަ އަހަރުގެ ވޯލްޑް ކަޕް ސެމީ ފައިނަލްގައި ބްރެޒިލްގެ އަމިއްލަ ފަސްގަނޑުގައި ޖަރުމަނުން އެ ގައުމު ލަދުގަންނަވާލި ނަތީޖާއާ ދާދި އެއްގޮތް ނަތީޖާއެކެވެ.
މެޗުގެ ކުރީކޮޅު ޖަރުމަނުން ވަނީ ވަރުގަދަ ކުޅުމެއް ދައްކާފައެވެ. އެގޮތުން މެޗުގެ 6 ވަނަ މިނެޓުގައި ފްލޯރިއަން ވާޓްޒް ވަނީ ލަނޑެއް ޖަހައި ޖަރުމަނަށް ކުރިހޯދައިދީފައެވެ. ނަމަވެސް، މެޗުގެ 21 ވަނަ މިނެޓުގައި ކިއުރަސާއޯގެ އެލް. ކޮމެނެންސިއާ ލަނޑެއް ޖަހައި ނަތީޖާ އެއްވަރުކުރިއެވެ. އެކަމަކު މި އުފާވެރިކަން ކިއުރަސާއޯއަށް ދެމިއޮތީ ކުޑަވަގުތުކޮޅަކަށެވެ.
ޖަރުމަނުގެ ފަރާތުން ފެނިގެންދިޔަ ހަލުވި ކުޅުމާއެކު، ނިކޯ ޝްލޮޓަރބެކް، ކައި ހާވާޓްޒް (ޕެނަލްޓީއަކުން)، ޖަމާލް މުސިއާލާ އަދި ޑެނިޒް އުންޑާވް ވަނީ ލަނޑުތައް ކާމިޔާބުކޮށްފައެވެ. މީގެ އިތުރުން ހާވާޓްޒް ވަނީ އިތުރު ލަނޑެއް ޖަހައި، ސްކޯބޯޑުގައި 7-1 ގެ ތާރީހީ ނަތީޖާ ކުރަހާލަދީފައެވެ.
Advertisement
މި ނަތީޖާއާއެކު ސޯޝަލް މީޑިއާގައި ބްރެޒިލްގެ ސަޕޯޓަރުންގެ މެދުގައި ވަނީ ބޮޑު ސަމާލުކަމެއް އުފެދިފައެވެ. ގިނަ ބަޔަކު ބުނަމުންދަނީ މިއީ ބްރެޒިލްގެ ސަޕޯޓަރުން ދުވަހަކުވެސް ހަނދާން ނެތޭނެ ނަތީޖާއެއް ނޫން ކަމަށާއި، ޖަރުމަނުން މިވަނީ އަނެއްކާވެސް އެ ހިތްދަތި "ޓްރައުމާ" އާކޮށްދީފައި ކަމަށެވެ. ހާއްސަގޮތެއްގައި ކިއުރަސާއޯ ފަދަ ކުޑަ ޓީމަކުން ލަނޑެއް ޖެހުމުން، ބްރެޒިލްގެ ސަޕޯޓަރުންނަށް މިކަން ވެފައިވަނީ މަލާމާތަކަށެވެ.
ފުޓްބޯޅަ ދުނިޔޭގައި "7-1" މިހާރު ވެފައިވަނީ ޖަރުމަނުގެ "ޓްރޭޑްމާކް" ނަތީޖާއަކަށެވެ. މި މެޗުން ބަލިވި ކިއުރަސާއޯއަށް މިއީ ބޮޑު ނާކާމިޔާބީއެއް ނަމަވެސް، މި ނަތީޖާގެ ސަބަބުން އެންމެ ބޮޑު ތަދެއް އިހުސާސް ކުރަން ޖެހިފައިވަނީ އަދިވެސް 2014 ވަނަ އަހަރުގެ އެ ހަނދާންތަކުން އަރައިނުގަނެވިފައި ތިބި ބްރެޒިލްގެ ސަޕޯޓަރުންނަށެވެ.
