އިންގްލެންޑްގެ ގައުމީ ފުޓްބޯޅަ ޓީމު ކެންސަސް ސިޓީއަށް ދިއުމުގެ ކުރިން، އެ ޓީމުގެ ތަމްރީނުތަކަށް ބޭނުންވާ ސާމާނުތައް ހުރި އުޅަނދުތަކަކުން ވަގަށް ނެގި ގިނަ ތަކެތި ފުލުހުން ހޯދައިފިއެވެ.
މި ހާދިސާ ހިނގާފައިވަނީ ޓީމުގެ ތަމްރީނުތައް ކުރިއަށްގެންދިއުމަށް ހަމަޖެހިފައިވާ 'ސްވޯޕް ސޮކަރ ވިލެޖް' ބޭސްއަށް ސާމާނުތައް އުފުލި އުޅަނދުތަކެއް ފަޅާލައިގެންނެވެ. ކެންސަސް ފުލުހުންނާއި އިނގިރޭސި އެފް.އޭ އާއި ގުޅިގެން ކުރިއަށްގެންދިޔަ ތަހުގީގުގައި، މިހާތަނަށް މި މައްސަލައާ ގުޅިގެން ދެ މީހަކު ވަނީ ހައްޔަރުކޮށްފައެވެ.
Advertisement
ކެންސަސް ފުލުހުންގެ ތަރުޖަމާނަކު ވިދާޅުވި ގޮތުގައި، ޓީމުގެ އުޅަނދުތަކުން ސާމާނުތަކެއް މަދުވެގެން ރިޕޯޓްކުރުމާ ގުޅިގެން ހުކުރު ދުވަހުގެ ރޭ ފެށި ތަހުގީގުގެ ތެރެއިން ވަނީ ގިނަ ތަކެތި އަނބުރާ ހޯދާފައެވެ.
ކޯޗު ތޯމަސް ޓުޗެލް އާއި އިންގްލެންޑްގެ ސްކޮޑް ހޮނިހިރު ދުވަހުގެ މެންދުރުފަހު ކެންސަސްއަށް ދިއުމަށް ހަމަޖެހިފައިވާއިރު، މި ސާމާނުތަކަކީ ޓީމު ދިއުމުގެ ކުރިން އެތަނުގައި ތައްޔާރުކޮށްފައި ހުންނަންޖެހޭ ތަކެއްޗެވެ. މި ވައްކަން ހިނގާފައިވަނީ އަންނަ ބުދަ ދުވަހު ކްރޮއޭޝިއާއާ ދެކޮޅަށް ކުޅޭ ވޯލްޑް ކަޕްގެ ފުރަތަމަ މެޗަށް ތައްޔާރުވުމުގެ މަސައްކަތް ޓީމުން ފަށާފައިވަނިކޮށެވެ.
މިކަމާ ގުޅޭގޮތުން ވާހަކަ ދައްކަމުން އިންގްލެންޑްގެ ކުރީގެ ޑިފެންޑަރު ފިލް ޖެގިއެލްކާ ބުނީ، ކުޅުންތެރިން ބޭނުންކުރާ ބޫޓު ފަދަ ތަކެއްޗަކީ އެ ކުޅުންތެރިންނަށް ހާއްސަކޮށްގެން ތައްޔާރުކޮށްފައިވާ ތަކެތި ކަމަށެވެ. އެގޮތުން ބޫޓުގައި ގައުމީ ދިދަ، ކުޅުންތެރިޔާގެ ނަން ނުވަތަ ދަރިންގެ ނަން ފަދަ ނިޝާންތައް ޖަހާފައި ހުންނާނެ ކަމަށާއި، މިއީ އެތައް މަހެއް ކުރިން ތައްޔާރުކުރާ ތަކެތި ކަމަށް އޭނާ ފާހަގަކުރިއެވެ.
ސާމާނުތައް އަނބުރާ ލިބުމާ ގުޅިގެން، އިންގްލެންޑް ޓީމުގެ ފުރަތަމަ ފުލް ޓްރެއިނިންގ ސެޝަން އާދީއްތަ ދުވަހު ކުރިއަށްގެންދިއުމަށް މިހާރު ވަނީ ނިންމާފައެވެ.
