ވޯލްޑް ކަޕަށް ތައްޔާރުވަމުން އަންނަ އިންގްލެންޑް ގައުމީ ޓީމު، އެމެރިކާގެ މިސޫރީގެ ކެންސަސް ސިޓީގައި ހުންނަ އެމީހުންގެ ބޭސްއަށް ދިއުމުގެ ކުރިން، ޓީމުގެ ތަމްރީނު ސާމާނުތަކެއް ވަގަށް ނަގައިފިއެވެ.
މި ހާދިސާ ހިނގާފައިވަނީ ފްލޮރިޑާގައި އޮތް ޕްރީ-ޓޯނަމަންޓް ކޭމްޕް ނިންމާލުމަށްފަހު، ތަމްރީނުތައް ކުރިއަށްގެންދިއުމަށް ހަމަޖެހިފައިވާ 'ސްވޯޕް ސޮކަރ ވިލެޖް' އަށް ސާމާނުތައް ބަދަލުކުރަނިކޮށެވެ. އިނގިރޭސި މީޑިއާތަކުން ރިޕޯޓްކުރާ ގޮތުގައި ވަގަށް ނަގާފައިވާ ތަކެތީގެ ތެރޭގައި ޓީމުން ތަމްރީނުތަކުގައި ބޭނުންކުރާ ބޯޅަތަކާއި ބޫޓުތައް ހިމެނެއެވެ.
ކެންސަސް ސިޓީގެ ފުލުހުން މިހާރު ދަނީ މި މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުންނެވެ. ފުލުހުން ބުނި ގޮތުގައި، ކެންސަސްއަށް އައި ޓީމުގެ ވެހިކަލަކުން ސާމާނުތަކެއް މަދުވެފައިވާތީ، ވައްކަމުގެ މައްސަލައެއް ތަހުގީގު ކުރަން ވަނީ ފަށާފައެވެ. އަދި މި މައްސަލައާ ގުޅިގެން ތުހުމަތުކުރެވޭ ދެ މީހަކު މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
Advertisement
މި ވައްކަމުގެ ސަބަބުން، އަންނަ ބުދަ ދުވަހު ޑަލަސްގައި ކްރޮއޭޝިއާއާ ދެކޮޅަށް ކުޅޭ ވޯލްޑް ކަޕްގެ ފުރަތަމަ މެޗަށް އިންގްލެންޑުން ވަމުންދާ ތައްޔާރީތަކަށް ބުރޫއެރުމުގެ ބިރު ވަނީ ހީވެފައެވެ. އިންގްލެންޑް ޓީމު ކެންސަސްގައި ހުންނަ އެމީހުންގެ ބޭސްއަށް އައުމަށް ހަމަޖެހިފައިވަނީ ހޮނިހިރު ދުވަހުއެވެ. އެ ޓީމު މިހާތަނަށް ވަގުތު ހޭދަކުރީ އެމެރިކާގެ ހޫނު އަދި ތެތް ފިނިހޫނުމިނަށް ހޭނުމަށްޓަކައި ފްލޮރިޑާގައެވެ.
ފްލޮރިޑާގައި ހޭދަކުރި ދުވަސްތަކުގައި އިންގްލެންޑުން ވަނީ ނިއުޒީލަންޑް އަދި ކޮސްޓަރިކާއާ ދެކޮޅަށް އެކުވެރިކަމުގެ މެޗުތަކެއް ކުޅެފައެވެ. ފާހަގަކޮށްލެވޭ ގޮތުގައި، އިންގްލެންޑުގެ އިތުރުން އަލްޖީރިއާ، އާޖެންޓީނާ އަދި ނެދަލޭންޑްސް އިން ވެސް ވޯލްޑް ކަޕަށް ކޭމްޕް ކުރުމަށް އިހުތިޔާރު ކޮށްފައިވަނީ ކެންސަސް ސިޓީ ސަރަހައްދެވެ.
