ވޯލްޑް ކަޕްގައި މިރޭ ދަންވަރު 03:00 ގައި މޮރޮކޯއާ ދެކޮޅަށް ބްރެޒިލް ކުޅޭ ފުރަތަމަ މެޗުގައި، އެ ޓީމުގެ ތަރި ނޭމާ އަށް ނުކުޅެވޭނެކަން ކޯޗު ކާލޯ އަންޗެލޮޓީ ކަށަވަރުކޮށްދީފިއެވެ.
އުމުރުން 34 އަހަރުގެ ނޭމާ ކުޅުމާ ދުރުގައި ހުންނަން ޖެހިފައިވަނީ އޭނާގެ ފައިގެ ކޮޅަށް ލިބިފައިވާ އަނިޔާއަކާ ގުޅިގެންނެވެ. މި އަނިޔާގެ ސަބަބުން އޭނާ އަދިވެސް ޓީމުގެ ފުރިހަމަ ފަރިތަކުރުންތަކުގައި ބައިވެރިވާން ފަށާފައެއް ނުވެއެވެ.
އަންޗެލޮޓީ ބުނި ގޮތުގައި، ކުރީގެ ބާސެލޯނާ އަދި ޕީއެސްޖީގެ ފޯވާޑް އަންނަ ހަފުތާގައި ސްކޮޑާއެކު ފަރިތަކުރުންތައް ފަށާނެއެވެ. ނަމަވެސް، ޖޫން 20 ގައި ހައިޓީއާ ދެކޮޅަށް ކުޅޭ ދެވަނަ މެޗަށް އޭނާ ފިޓްވާނެ ކަމާމެދު ވަނީ ޝައްކު އުފެދިފައެވެ. ބްރެޒިލްގެ ގްރޫޕް ސްޓޭޖުގެ ފަހު މެޗު އޮންނާނީ ޖޫން 24 ގައި ސްކޮޓްލޭންޑާ ދެކޮޅަށެވެ.
Advertisement
ނޭމާގެ ހާލަތާ ގުޅޭގޮތުން ވާހަކަ ދައްކަމުން އަންޗެލޮޓީ ބުނީ، "ނޭމާ އަންނަނީ ވީހާވެސް އަވަހަކަށް ފިޓްވުމަށްޓަކައި ވަރަށް ބުރަކޮށް މަސައްކަތް ކުރަމުން،" ކަމަށެވެ. އަދި އޭނާ އިތުރަށް ބުނި ގޮތުގައި "އަހަރެމެން ނޭމާ ޓީމަށް ނެގީ ހަމައެކަނި އޭނާގެ ފަންނީ ހުނަރުގެ ސަބަބުންނެއް ނޫން. އޭނާގެ ތަޖުރިބާ އާއި ޓީމުގެ ޒުވާން ކުޅުންތެރިންނަށް އޭނާ ދައްކާ ނަމޫނާ އަކީ ވެސް ޓީމަށް ވަރަށް މުހިންމު ކަމެއް."
އަނިޔާގެ މައްސަލަތަކާ ގުޅިގެން 2023 ވަނަ އަހަރުން ފެށިގެން ބްރެޒިލްގެ ގައުމީ ޓީމަށް ނޭމާ މެޗެއް ކުޅެދީފައެއް ނުވެއެވެ. ނަމަވެސް، ޗެލްސީގެ ފޯވާޑް ޔޮއާއޮ ޕެޑްރޯ އާއި ޓޮޓެންހަމްގެ ރިޗާލިސަން ބާކީކޮށް، އަންޗެލޮޓީ ވަނީ ވޯލްޑް ކަޕް ސްކޮޑުން ނޭމާ އަށް ފުރުސަތު ދީފައެވެ.
ނޭމާ އަކީ ބްރެޒިލްގެ ގައުމީ ޓީމަށް އެންމެ ގިނަ ލަނޑު ޖަހައިދިނުމުގެ ރެކޯޑް އޮތް ކުޅުންތެރިޔާއެވެ. އޭނާ ވަނީ ކުޅުނު 128 މެޗުން 79 ލަނޑު ކާމިޔާބުކޮށް، ފުޓްބޯޅައިގެ ރަސްގެފާނު ޕެލޭގެ ރެކޯޑް (77 ލަނޑު) މުގުރާލާފައެވެ. މިއީ 2014، 2018 އަދި 2022 ވަނަ އަހަރުގެ މުބާރާތްތަކަށްފަހު، ނޭމާ ބްރެޒިލް ތަމްސީލުކުރާ ހަތަރުވަނަ ވޯލްޑް ކަޕެވެ.
