ދުނިޔޭގެ އެންމެ ބޮޑު ކުޅިވަރު އީދު، ފީފާ ވޯލްޑް ކަޕް 2026 މިރޭ ރަސްމީކޮށް ފަށާނެއެވެ. މުބާރާތް ހުޅުވުމުގެ ގޮތުން ކުޅޭ ފުރަތަމަ މެޗުގައި ބައްދަލުކުރާނީ މުބާރާތް ބާއްވާ ތިން ގައުމުގެ ތެރެއިން އެއް ގައުމު ކަމަށްވާ މެކްސިކޯއާއި ދެކުނު އެފްރިކާއެވެ. މެކްސިކޯ ސިޓީ ސްޓޭޑިއަމްގައި ކުޅޭ މި މެޗަކީ ގްރޫޕް 'އޭ' ގެ ފުރަތަމަ މެޗެވެ.

މި ފަހަރުގެ ވޯލްޑް ކަޕަކީ ތާރީހުގައިވެސް ބާއްވާ އެންމެ ބޮޑު މުބާރާތެވެ. މި މުބާރާތުގައި ޖުމްލަ 48 ޓީމު ވާދަކުރާއިރު، ތިން ގައުމެއްގައި (އެމެރިކާ، ކެނެޑާ އަދި މެކްސިކޯ) ޖުމްލަ 104 މެޗު ކުޅުމަށް ވަނީ ހަމަޖެހިފައެވެ.

މިރޭގެ މެޗަކީ 2010 ވަނަ އަހަރުގެ ވޯލްޑް ކަޕްގެ ހަނދާންތައް އާކޮށްދޭނެ މެޗެކެވެ. އެ އަހަރުގެ މުބާރާތް ހުޅުވުމުގެ ގޮތުން ޖޮހަނަސްބާގްގައި ކުޅުނު މެޗުގައިވެސް ބައްދަލުކުރީ މި ދެ ޓީމެވެ. އެ މެޗު ނިމުނީ 1-1 އިން އެއްވަރުވެގެންނެވެ. މެކްސިކޯއިން އަމިއްލަ ގައުމުގައި، ސަޕޯޓަރުންގެ ބޮޑު ތަރުހީބަކާއެކު މުބާރާތް ކާމިޔާބުކަމާއެކު ފެށުމަށް އަމާޒު ހިފާފައިވާއިރު، ދެކުނު އެފްރިކާއިން ނުކުންނާނީ މެކްސިކޯއަށް މެޗު އުނދަގޫކޮށް، މުހިންމު ނަތީޖާއެއް ހޯދުމުގެ އަޒުމުގައެވެ.

މިއަދުން ފެށިގެން ޖުލައި މަހުގެ 19 ވަނަ ދުވަހާ ހަމައަށް ކުރިއަށްދާ މި މުބާރާތް އުތުރު އެމެރިކާގެ 16 ސިޓީއެއްގައި ބޭއްވުމަށް ވަނީ ހަމަޖެހިފައެވެ. މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ ނިއު ޖާޒީގެ މެޓްލައިފް ސްޓޭޑިއަމްގައެވެ.