މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މިއަދު މަސް ގަންނަ އަގުތަކަށް ބަލާއިރު، އެ ކުންފުނީގެ ހުރިހާ ސެންޓަރަކުން ވެސް ކަޅުބިލަމަސް ގަންނަމުންދަނީ ކިލޯއެއް 20 ރުފިޔާގެ މަގުންނެވެ.

މިފްކޯއިން ކޮންމެ ދުވަހަކު އާންމުކުރާ އަގުތަކުގެ ލިސްޓުގައިވާ ގޮތުން، ރާއްޖޭގެ އެކި ސަރަހައްދުތަކުގައި ގާއިމުކޮށްފައިވާ ފެލިވަރު، ކޫއްޑޫ، އައްޑޫ، ތިނަދޫ، ފަރެސްމާތޮޑާ، ދާންދޫ، އަދި ފުވައްމުލަކުގެ ފެކްޓްރީތަކާއި ސެންޓަރުތަކުން ވެސް މަސްވެރިންގެ އަތުން މަސް ގަންނަމުން އަންނަނީ 20 ރުފިޔާއަށެވެ.

ކަޅުބިލަމަހުގެ އިތުރުން، ބޮޑު ކަންނެލި ގަންނަ އަގުތަކަށް ވެސް މިއަދު ވަނީ ބަދަލުތަކެއް އައިސްފައެވެ. އެގޮތުން ބޮޑު ކަންނެލި ކިލޯއެއް އާންމުކޮށް 20 ރުފިޔާއަށް ގަންނަމުންދާއިރު، 15 ކިލޯއިން މަތީގެ ބޮޑު ކަންނެލި ކިލޯއެއް ގަންނަނީ 25 ރުފިޔާގެ މަގުންނެވެ.

މަހުގެ އަގަށް މި ގެނައި ބަދަލަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަސްވެރިންނަށް ވެވަޑައިގެންފައިވާ ވަޢުދުފުޅާ އެއްގޮތަށް ގެނެވުނު ބަދަލެކެވެ. މިދިޔަ އާދީއްތަ ދުވަހު "ޚުލާސާ" އިން ކުރި ސުވާލަކަށް ޖަވާބު ދެއްވަމުން މިފްކޯގެ ސީއީއޯ މުޙައްމަދު އަނަސް ވިދާޅުވެފައިވަނީ، ރައީސް ވަޢުދުވެވަޑައިގެންނެވި ގޮތަށް މަސް ކިލޯއެއްގެ އަގު 20 ރުފިޔާއަށް ޖެއްސުމުގެ މަސައްކަތް ކުރިއަށްދާ ކަމަށެވެ.

މިފްކޯއިން މިގޮތަށް އަގުތައް ކަނޑައަޅާފައިވަނީ ދުނިޔޭގެ ބާޒާރުގައި މަހުގެ އަގަށް އަންނަ ބަދަލުތަކާ ގުޅިގެންނާއި، މަސްވެރިންނަށް އެކަށީގެންވާ އާމްދަނީއެއް ހޯދައިދިނުމުގެ މަގްސަދުގައެވެ. ސަރުކާރުގެ މަސް ކުންފުނިން އަބަދުވެސް މަސައްކަތް ކުރަމުންދަނީ މަސްވެރިން ބާނާ މަހަށް ހަމަ އަގު ހޯދައިދީ، މަސްވެރިކަމުގެ ސިނާއަތް ކުރިއެރުވުމަށެވެ.