މޯލްޑިވްސް ފިޝަރީޒް އެންޑް އެގްރިކަލްޗަރަލް މާކެޓިންގ ކޯޕަރޭޝަން (މިފްކޯ) ގެ ހުރިހާ ސެންޓަރުތަކަކާއި މަސް ގަންނަ ބޯޓުފަހަރުތަކުން މިއަދުން ފެށިގެން މަސް ގަންނަ އަގު 18.50 ރުފިޔާއަށް ބޮޑުކޮށްފިއެވެ.
މި ނިންމުމާއެކު މިފްކޯއިން މިވަނީ އަމިއްލަ ކުންފުނިތަކުން މަސް ގަންނަ މާކެޓް އަގާ އެއްވަރުކޮށްފައެވެ. މިއީ އެންވެރިކަން ތަދު، މަސްވެރިކަން ދަށް ދުވަސްވަރެއްގައި މަސްވެރިން ކަނޑަށް ނިކުތުމަށް ލިބިގެންދާނެ އިތުރު ހިތްވަރެއްގެ ގޮތުގައި މަސްވެރިން ފާހަގަކުރެއެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަސްވެރިންގެ އަޑު ގާތުން އައްސަވާކަމުގެ ހެއްކެއްގެ ގޮތުގައިވެސް މަސްވެރިން ދެކެއެވެ.
މިކަމާ ގުޅޭގޮތުން މިފްކޯގެ ސީއީއޯ ވިދާޅުވީ، ރައީސުލްޖުމްހޫރިއްޔާ ޑރ. މުއިއްޒު އަބަދުވެސް އެންމެ އިސްކަމެއް ދެއްވަނީ މަސްވެރިންނަށް މަހުގެ ހަމަ އަގު ހޯދައިދިނުމަށް ކަމަށެވެ.
Advertisement
"މަސްވެރިންނަށް ވެވަޑައިގެންފައިވާ ރިޔާސީ ވައުދުފުޅާ އެއްގޮތަށް، މަސް ކިލޯއެއްގެ އަގު 20 ރުފިޔާއަށް ހަމަޖެއްސުމަކީ ރައީސުލްޖުމްހޫރިއްޔާ އެންމެ އިސްކަންދެއްވާ ކަންތައް. އަދި މި އަމާޒަށް ވާސިލުވުމަށްޓަކައި ސަރުކާރާއި ކަމާގުޅޭ ކުންފުނިން މެދުކެނޑުމެއްނެތި ދަނީ މަސައްކަތްކުރަމުން"
މިފްކޯގެ ސީއީއޯ މުހައްމަދު އަނަސް
މިފްކޯގެ ހިންގުމުގެ ނިޒާމަށް ޒަމާނުއްސުރެ އަމަލުކުރަމުން އައި ގޮތްތަކަށް ބޮޑެތި އިސްލާހީ ބަދަލުތަކެއް ގެންނަން ޖެހިފައިވާ ކަމަށް ސީއީއޯ އަނަސް ވަނީ ވިދާޅުވެފައެވެ.
މަގާމާ ހަވާލުވެވަޑައިގަތުމަށްފަހު، މިފްކޯގެ އޮޕަރޭޝަންތައް ކުރިއަށްދާ ގޮތް ބެއްލެވުމަށް ގއ. ކޫއްޑޫ ފިޝަރީޒް ކޮމްޕްލެކްސްއަށް ކުރެއްވި ޒިޔާރަތުގައި މުވައްޒަފުންނާ ވާހަކަފުޅުދައްކަވަމުން އަނަސް ވިދާޅުވީ، އެންމެ އިސް އަމާޒަކީ ކުންފުނީގެ ހިންގުން ހަރުދަނާކޮށް، ޒަމާނީ މިންގަނޑުތަކަށް ފައްތައިގެން ކުރިއަށް ގެންދިއުން ކަމަށެވެ.
ސަރުކާރުގެ ސައްތައިން ސައްތަ ހިއްސާ އޮންނަ މި ކުންފުނީގެ އުސޫލުތައް މުރާޖައާކޮށް، މިފްކޯއަކީ ނަތީޖާ ނެރެދޭ އިގްތިސާދީ ގޮތުން ބާރުވެރި މުއައްސަސާއަކަށް ހެދުމަށްޓަކައި ކުރަންޖެހޭ އަމަލީ މަސައްކަތްތައް މިހާރު ފެށިފައިވާކަންވެސް ސީއީއޯ ފާހަގަކުރެއްވިއެވެ.
މި ސަރުކާރުން ވެރިކަމާ ހަވާލުވިއިރު، ނިމިދިޔަ ސަރުކާރުން މަސްވެރިންނަށް ދޭންޖެހޭ 250 މިލިއަން ރުފިޔާ ނުދީ އޮތެވެ. ނިމިދިޔަ ރިޔާސީ އިންތިހާބާ ދިމާކޮށް ކުރީ ސަރުކާރުން މަސް ކިލޯއެއްގެ އަގު 25 ރުފިޔާއަށް ބޮޑުކުރި ނަމަވެސް، މަސްވެރިންނަށް ދަރާފައި އޮތް ފައިސާ ދައްކާފައެއް ނުވެއެވެ. ނަމަވެސް، ރައީސް މުޢިއްޒުގެ ސަރުކާރުން ވެރިކަމާ ހަވާލުވެ، ކުރީ ސަރުކާރުގެ ދަރަންޏާއެކު ގާތްގަނޑަކަށް ބިލިއަނެއްހާ ރުފިޔާ ވަނީ މިދިޔަ އަހަރުގެ ތެރޭގައި މަސްވެރިންނަށް ދޫކޮށްފައެވެ.
މީގެ އިތުރުން، 2024 ވަނަ އަހަރުގެ މަސްވެރިންގެ ދުވަހާ ދިމާކޮށް ރައީސް މުއިއްޒު ވެވަޑައިގެންފައިވާ ވައުދުފުޅާ އެއްގޮތަށް، މަސް ކިރުވާތާ 48 ގަޑިއިރު ތެރޭގައި މަސްވެރިންނަށް ފައިސާ ދޫކުރުމުގެ އިންތިޒާމު މިހާރު ވަނީ ހަމަޖެހިފައެވެ. އެގޮތުން ބޭންކް އޮފް މޯލްޑިވްސް މެދުވެރިކޮށް މިފްކޯއިން ދަނީ އެއްވެސް ލަސްކަމެއް ނެތި މަސްވެރިންނަށް ލިބެންޖެހޭ ފައިސާ ހުއްޓުމެއް ނެތް ގޮތެއްގައި ދޫކުރަމުންނެވެ.
