އާޓިފިޝަލް އިންޓެލިޖެންސް (އޭއައި) ބޭނުންކޮށްގެން މުޅިން އަލަށް ފަރުމާކުރި ވެކްސިނެއް، ދުނިޔޭގައި ފުރަތަމަ ފަހަރަށް އިންސާނުން ބޭނުންކޮށްގެން ޓެސްޓުކުރަން ފަށާފައިވާކަމަށް އިނގިރޭސިވިލާތުގެ ކެމްބްރިޖް ޔުނިވަރސިޓީގެ ދިރާސާކުރާ ޓީމުން ހާމަކޮށްފިއެވެ.
މި ވެކްސިނަކީ ކުރިމަތިވެދާނެ ބޮޑެތި ބަލިމަޑުކަންކަމުން ރައްކާތެރިވުމަށާއި، ބާރުގަދަ ވައިރަސްތަކާ ދެކޮޅަށް މަސައްކަތްކުރުމަށްޓަކައި އޭއައިގެ އެހީގައި ފަރުމާކޮށްފައިވާ ވެކްސިނެކެވެ. މިއީ ވެކްސިނެއްގެ އެންމެ މުހިންމު ބައި ނުވަތަ 'އެންޓިޖަން' މުޅިން އޭއައި ބޭނުންކޮށް އުފެއްދި ފުރަތަމަ ފަހަރެވެ.
މި ވެކްސިނަކީ ކޮވިޑް-19 ގެ ހުރިހާ ބާވަތްތަކެއްގެ އިތުރުން، މިހާރު ޖަނަވާރުންގެ މެދުގައި ފެތުރެމުންދާ އަދި އިންސާނުންގެ ތެރެއަށް ފެތުރި ބަލިމަޑުކަމަކަށް ބަދަލުވުމުގެ ބިރު އޮތް ކޮރޯނާ ވައިރަހުގެ ހުރިހާ އާއިލާއަކުން ރައްކާތެރިކޮށްދޭނެ ގޮތަށް ފަރުމާކޮށްފައިވާ ވެކްސިނެކެވެ.
Advertisement
އާންމުކޮށް ވެކްސިން އުފައްދަނީ ވައިރަހެއްގެ ވަކި ވައްތަރަކަށް އަމާޒުކޮށްގެންނެވެ. ނަމަވެސް، ވައިރަސްތަކަކީ އަބަދުވެސް އޭގެ ސިފަ ބަދަލުކުރާ (މިއުޓޭޓްވާ) އެއްޗަކަށް ވާތީ، ގިނަ ފަހަރަށް ވެކްސިންތަކުގެ ބާރު ކެނޑެއެވެ. ކެމްބްރިޖްގެ ސައިންސްވެރިން މިކަމަށް ހައްލެއް ހޯދުމަށް ބޭނުންކުރީ އޭއައި އެވެ. އެގޮތުން އެކި ކޮރޯނާ ވައިރަސްތަކުގެ ޖެނެޓިކް ކޯޑުތައް އޭއައި ބޭނުންކޮށްގެން ދިރާސާކޮށް، ހުރިހާ ވައިރަހަކަށް މަސައްކަތްކުރާނެ "ސުޕަރ އެންޓިޖަން" އެއް ވަނީ އުފައްދާފައެވެ.
ކެމްބްރިޖް ޔުނިވަރސިޓީގެ ޕްރޮފެސަރ ޖޮނަތަން ހީނީ ވިދާޅުވި ގޮތުގައި، މިއީ ބަލިމަޑުކަމަކަށް ތައްޔާރުވުމުގައި އައި ވަރަށް ބޮޑު ބަދަލެކެވެ. "މީގެ ބޭނުމަކީ ހަމައެކަނި މިއަދު ފެންނަން ހުރި ވައިރަސްތަކުން ރައްކާތެރިވުމެއް ނޫން. މިއީ ކުރިމަތީގައި އަންނަން އޮތް ބަލިމަޑުކަމަކުން އަޅުގަނޑުމެން ސަލާމަތްކޮށްދޭނެ އުފެއްދުމެއް،" އޭނާ ވިދާޅުވިއެވެ.
މި ވެކްސިންގެ ރައްކާތެރިކަން ބެލުމަށް 39 މީހުން ހިމަނައިގެން ކުރި ފުރަތަމަ މަރުހަލާގެ ޓެސްޓުތައް މިހާރު ވަނީ ނިމިފައެވެ. އަދި 200 އެއްހާ މީހުން ހިމަނައިގެން ކުރާ ދެވަނަ މަރުހަލާގެ ޓެސްޓުތަކުން، ހަށިގަނޑުގެ ދިފާއީ ނިޒާމު މީގެ ސަބަބުން ވަރުގަދަވާ މިންވަރު ދެނެގަނެވޭނެއެވެ.
މި އާ އީޖާދުގެ ސަބަބުން ކޮރޯނާ ވައިރަހުގެ އިތުރުން، އިންފްލުއެންޒާ (އަަރިދަފުސް ރޯގާ) އާއި އީބޯލާ ފަދަ ނުރައްކާތެރި ބަލިތަކަށްވެސް ދާއިމީ ހައްލެއް ލިބިގެންދާނެ ކަމަށް ސައިންސްވެރިން އުއްމީދު ކުރެއެވެ. މިއީ ކޮންމެ އަހަރަކު ވެކްސިން އާކުރަން ނުޖެހި، ގިނަ ދުވަހަށް ދެމިގެންދާނެ ރައްކާތެރިކަމެއް ފޯރުކޮށްދޭނެ ފެށުމެއް ކަމަށްވެސް އެ ފަރާތްތަކުން ފާހަގަކުރެއެވެ.
އިނގިރޭސިވިލާތުގެ ސައިންސް މިނިސްޓަރު ލޯޑް ވަލަންސް ވަނީ މިއީ ސައިންސާއި އޭއައި ގުޅިގެން ހޯދުނު ވަރަށް ބޮޑު ކާމިޔާބީއެއްގެ ގޮތުގައި ސިފަކުރައްވާފައެވެ. މި މަސައްކަތުގެ ސަބަބުން ދުނިޔޭގެ އެކި ކަންކޮޅުތަކުގައި ތިބި މީހުންގެ ފުރާނަ ސަލާމަތްކުރުމަށް އަވަސް މަގެއް ފެނިގެންދާނެ ކަމަށް އޭނާ ވިދާޅުވިއެވެ.
