ދެކުނު ލުބުނާނުގައި ތިބި އިސްރާއީލުގެ ސިފައިންނަށް އަމާޒުކޮށް އެތައް ރޮކެޓް ހަމަލާއެއް ރޭ ދީފައިވާ ކަމަށް ހިޒްބުالله އިން ބުނެފި އެވެ. ލުބުނާނުގެ ހަތިޔާރު އެޅި ޖަމާއަތް ހިޒްބުالله އިން ވަނީ ލުބުނާނުގެ ދެކުނުގައި އިސްރާއީލުގެ ސިފައިންނާއި އެމީހުން ތިބި ތަންތަނަށް އަމާޒުކޮށް ގިނަ އަދަދެއްގެ ރޮކެޓް ހަމަލާތަކެއް ފުލުފުލުގައި ދިންކަމަށާއި، މި ރޮކެޓު “ރާޅުގައި” ޔަހޫދީންނަށް. ބޮޑެތި ގެއްލުންތަކެއް ލިބުނު ކަމަށް އިއުލާންކޮށްފައެވެ.

ހިޒްބުالله އިން ބުނާ ގޮތުގައި ހަނގުރާމަވެރިން ވަނީ ޔަހުމަރު އަލް ޝަކީފްގެ އިރުދެކުނު ސަރަހައްދުގައި އިސްރާއީލުގެ ސިފައިން އެއްވެ ތިބި ތަނަކަށް ރޮކެޓްތައް ފޮނުވައި ހަމަލާ ދީފައެވެ. އަދި ވަކިވަކިން ދެ ރޮކެޓް ފޮނުވާފައި ވަނީ ފަރުބަދައިގެ ތިރީ، ދެކުނު ސަރަހައްދުގައި ތިބި އިސްރާއީލުގެ އަސްކަރީ ވެހިކަލްތަކަށް އަމާޒުކޮށް ކަމަށް ވެސް އެ ޖަމާއަތުން ބުނެ އެވެ. މިއަދު ދިން 3 ވަނަ ހަމަލާ އަކީ ވެސް ހިޒްބުالله އިން ރިޕޯޓްކޮށްފައިވާ ގޮތުގައި ޔަހުމަރު އަލް ޝަކީފް ކައިރީގައި ދިން ހަމަލާއެކެވެ. އެއީ އިސްރާއީލުގެ ސިފައިންނާއި އުޅަނދުތަކަށެވެ.

ހިޒްބުالله އަށް ހަމަލާ ދިނުން ކުރިޔަށް ގެންދިޔުމާއި މެދު އިތުރު ޕްލޭންތައް ހެދުމަށް ރޭ ބޮޑުވަޒީރު ނަތަންޔާހޫ ވަނީ ކުއްލި ބައްދަލުވުމެއްވެސް ބާއްވާފައެވެ. ރޭ ވެސް ހިޒްބުاللهއިން ވަނީ އިޒުރޭލުގެ ސިފައިން ތިބި އެކި ތަންތަނަށް ހަމަލާ ދީފައެވެ. ފަހަކަށް އައިސް ހިޒްބުالله އިން ފޮނުވާ ރިކެޓާއި ޑްރޯން ހަމަލާތައް ވަނީ އިތުރުވެފައެވެ.

ހިޒްބުاللهގެ އެންމެ ފަހުގެ ވާހަކަތަކާ ގުޅޭ ގޮތުން އިސްރާއީލުގެ ކަމާބެހޭ ފަރާތްތަކުން ވަގުތުން އެއްޗެއް ބުނެފައި ނުވެއެވެ،