ބަދުއަހުލާގީ އަމަލުތަކެއް ހިމެނޭ ވީޑިއޯއެއް އާންމުވި މައްސަލައެއްގައި، ށ. ގޮއިދޫ މިސްކިތުގެ އިމާމުގެ މަގާމުގައި ހުރި އާމިރު ނަމަކަށް ކިޔާ މީހަކު ވަޒީފާއިން ވަކިކޮށްފިއެވެ.

މި ހާދިސާ ހިނގާފައިވަނީ ށ. ގޮއިދޫގެ ގިނަ އަދަދެއްގެ ރައްޔިތުން ހިމެނޭ ވައިބާ ގުރޫޕަކަށް، އެ ރަށު މިސްކިތުގެ އިމާމު، އާމިރު އެއްޖިންސުން ގުޅުން ހިންގާ މަންޒަރު ފެންނަ ވީޑިއޯއެއް އަމިއްލައަށް ފޮނުވުމާ ގުޅިގެންނެވެ. ބެލެވޭ ގޮތުގައި މި ވީޑިއޯ އެ ގުރޫޕަށް ފޮނުވުނީ އޭނާއަށް އޮޅުމަކުންނެވެ.

މި މައްސަލައާ ގުޅިގެން އިސްލާމިކް މިނިސްޓަރު ޑރ. މުހައްމަދު ޝަހީމް ވިދާޅުވީ، އެ މައްސަލަ ބަލައި މިހާރު އޭނާ އިމާމުކަމުގެ ވަޒީފާއިން ވަކިކޮށްފައިވާ ކަމަށެވެ.

ފުލުހުން ބުނީ ބަދުއަހުލާގީ އަމަލުތަކެއް ހިމެނޭ ކަމަށް ތުހުމަތުކުރެވޭ ވީޑިއޯއެއް ވައިބާ ގްރޫޕެއްގައި ހިއްސާކުރި މައްސަލައެއް، 2024 މެއި 27 ވަނަ ދުވަހު ށ. ގޮއިދޫއިން ފުލުހުންނަށް ހުށަހަޅާފައިވާ ކަމަށެވެ. އަދި މި މައްސަލައިގެ ތަހުގީގުގެ ތެރެއިން، އެ ވީޑިއޯ ފެތުރި މައްސަލައާއި އޭގައި ހިމެނޭ ކަންކަން އިތުރަށް ބަލަމުންދާ ކަމަށްވެސް ފުލުހުން މައުލޫމާތު ދެއެވެ.

މައުލޫމާތު ލިބިފައިވާ ގޮތުގައި އާމިރަކީ މީގެ ކުރިންވެސް އެއްޖިންސުން ގުޅުން ހިންގުމުގެ ކުށް ސާބިތުވެފައިވާ މީހެކެވެ. އޭނާ އިމާމުކަމުގެ މަގާމަށް އައްޔަންކުރެވުނު ފަހުންވެސް އެކި ފަހަރު މަތިން މިފަދަ ތުހުމަތުތައް ކުރެވި، އެކަމާ ގުޅުންހުރި ވީޑިއޯތަކާއި ސްކްރީންޝޮޓްތައް ދޭތެރެއަކުން އާންމުވަމުން ގޮސްފައިވެއެވެ. ނަމަވެސް، މި ހާދިސާ ހިނގުމާ ހަމައަށްވެސް އޭނާ ހުރީ އެ ރަށުގެ ހަމައެކަނި އިމާމުގެ ގޮތުގައެވެ.

މި ހާދިސާއާ ގުޅިގެން ގޮއިދޫ ރައްޔިތުންގެ މެދުގައި ވަނީ ބޮޑު ނުތަނަވަސްކަމެއް އުފެދިފައެވެ. ރަށުގެ އިމާމުގެ ފަރާތުން ފެނުނު މި ދަށު ދަރަޖައިގެ އަމަލުގެ ސަބަބުން، ގިނަ ބަޔަކު ވަނީ އޭނާގެ ފަހަތުގައި ނަމާދުކުރުމަށް ދެކޮޅު ހަދައި، އެއީ މުޅި ރަށުގެ ދީނީ އަދި އަހުލާގީ މިންގަނޑަށް ލިބުނު ބޮޑު ހުތުރެއްގެ ގޮތުގައި ސިފަކޮށްފައެވެ.