ވޯލްޑް ކަޕް ފުޓްބޯޅަ މުބާރާތުގައި ވާދަކުރުމަށް މެކްސިކޯއަށް ދަތުރުކުރުމަށް ތައްޔާރުވަމުންދިޔަ ސައުތު އެފްރިކާގެ ގައުމީ ފުޓްބޯޅަ ޓީމަށް ވިސާގެ މައްސަލަތަކެއް ކުރިމަތިވެ، ދަތުރު ލަސްވުމާ ގުޅިގެން އެ ގައުމުގެ ކުޅިވަރާ ބެހޭ ވަޒީރު ގޭޓަން މެކެންޒީ ވަރަށް ބޮޑަށް ކޯފާވެ، އެކަމުގެ ފުރިހަމަ ރިޕޯޓެއް ހުށަހެޅުމަށް އަންގަވައިފިއެވެ.

ސައުތު އެފްރިކާގެ ފުޓްބޯޅަ އެސޯސިއޭޝަން އިން ވަނީ ބައެއް ކުޅުންތެރިންނާއި އޮފިޝަލުންގެ ވިސާ ހޯދުމުގައި "ގޮންޖެހުންތަކެއް" ކުރިމަތިވެފައިވާ ކަމަށް އެއްބަސްވެފައެވެ. ނަމަވެސް މިކަމުގެ އިތުރު ތަފްސީލެއް އެ އިދާރާއިން ހާމައެއް ނުކުރެއެވެ. މި ހާދިސާއާ ގުޅިގެން އެ ގައުމުގެ ގައުމީ ބްރޯޑްކާސްޓަރު އެސް.އޭ.ބީ.ސީ އިން ބުނެފައިވަނީ މިއީ އިދާރީ ގޮތުން ހެދުނު ވަރަށް ބޮޑު ގޯހެއް ކަމަށެވެ.

މި މައްސަލައާ ގުޅިގެން ކުޅިވަރާ ބެހޭ ވަޒީރު ގޭޓަން މެކެންޒީ އެކްސްގައި ކުރެއްވި ޕޯސްޓެއްގައި ވިދާޅުވީ، މި އިދާރީ އޮޅުންބޮޅުންތަކުގެ ސަބަބުން ދުނިޔޭގެ ކުރިމަތީގައި ސައުތު އެފްރިކާ ފެންނަނީ "މޮޔައިންގެ" ގޮތުގައި ކަމަށެވެ. އަދި މިއީ ކުޅުންތެރިންނާއި ކޯޗިން ސްޓާފުންނަށް ކުރެވޭ ވަރަށް ބޮޑު ބޭއިންސާފެއްގެ ގޮތުގައި އޭނާ ސިފަކުރެއްވިއެވެ. "މި ކަމުގެ ރިޕޯޓެއް އަހަރެން ބޭނުން. އަދި މި އިހުމާލުވި ފަރާތްތަކާ މެދު ފިޔަވަޅު އަޅަންޖެހޭނެ،" ވަޒީރު ވިދާޅުވިއެވެ.

"ބަފާނާ ބަފާނާ" ގެ ނަމުން މަޝްހޫރުވެފައިވާ ސައުތު އެފްރިކާ ޓީމު، އަންނަ ހުކުރު ދުވަހު މެކްސިކޯގައި ޖެމެއިކާއާ ދެކޮޅަށް އެކުވެރިކަމުގެ މެޗެއް ކުޅުމަށް ވަނީ ތާވަލުކުރެވިފައެވެ. މިއީ ޖޫން 11 ވަނަ ދުވަހު މެކްސިކޯ، އެމެރިކާ އަދި ކެނެޑާ ގުޅިގެން ބާއްވާ ވޯލްޑް ކަޕްގެ ފުރަތަމަ މެޗުގައި މެކްސިކޯއާ ދެކޮޅަށް ނުކުތުމުގެ ކުރިން އެ ޓީމަށް ލިބޭނެ އެންމެ ފަހު ފުރުސަތެވެ.

ޓީމަށް ދިމާވެފައިވާ އެންމެ ބޮޑު އެއް މައްސަލައަކީ އެމެރިކާގެ ވިސާ ހޯދުމެވެ. ސައުތު އެފްރިކާގެ ދެވަނަ މެޗު އެމެރިކާގެ އެޓްލާންޓާގައި ޗެކް ރިޕަބްލިކާ ދެކޮޅަށް ކުޅެން ހަމަޖެހިފައިވާއިރު، އެ ގައުމަށް އެތެރެވުމަށް ހާއްސަ ހުއްދަތަކެއް ބޭނުންވެއެވެ. މި މައްސަލަ ހައްލުކުރުމަށް އެ ގައުމުގެ ފޮރިން މިނިސްޓްރީން ވެސް ދަނީ އެމެރިކާގެ ކޮންސިއުލޭޓާ ގުޅިގެން މަސައްކަތް ކުރަމުންނެވެ.

ސައުތު އެފްރިކާގެ ފޮރިން މިނިސްޓްރީގެ ތަރުޖަމާނު ކްރިސްޕިން ފިރީ ވިދާޅުވީ، މިއީ އިދާރީ މައްސަލައެއް ނަމަވެސް، ވީހާވެސް އަވަހަކަށް މިކަން ހައްލުކުރުމަށް އެހީތެރިވަމުންދާ ކަމަށެވެ.

ސައުތު އެފްރިކާއަކީ މިފަހަރުގެ ވޯލްޑް ކަޕްގައި ވާދަކުރާ އެފްރިކާގެ 10 ގައުމުގެ ތެރެއިން އެއް ގައުމެވެ. އެ ގައުމުން އެންމެ ފަހުން ވޯލްޑް ކަޕެއްގައި ކުޅެފައިވަނީ 2010 ވަނަ އަހަރު އަމިއްލަ ގައުމުގައި ބޭއްވި މުބާރާތުގައެވެ. ދާދި ފަހުން ނިކަރާގުއާއާ ދެކޮޅަށް ކުޅުނު އެކުވެރިކަމުގެ މެޗު 0-0 އިން އެއްވަރުވުމާ ގުޅިގެން، ޓީމުގެ ފޯމާ މެދު ސަޕޯޓަރުން ދަނީ ކަންބޮޑުވުން ފާޅުކުރަމުންނެވެ.