2026 ވަނަ އަހަރުގެ ފީފާ ވޯލްޑް ކަޕް ފެށުމަށް މަދު ދުވަސްކޮޅަކަށް ވެފައި ވަނިކޮށް، ބްރެޒިލްގެ ތަރި ނޭމާ ޖޫނިއާގެ އަނިޔާގެ މައްސަލައިގައި މުޅި ގައުމުގައި ކަންބޮޑުވުން އިތުރުވެއްޖެއެވެ.
ސަންތޯސްއަށް ކުޅެމުންދާ މި ފޯވާޑް ބްރެޒިލްގެ ޓްރޭނިން ކޭމްޕާ ގުޅުނީ ކަނާތު ފައިގެ ކޮފް މަސްގަނޑަށް ލިބުނު އަނިޔާއަކާ ގުޅިގެން މެޑިކަލް ޓީމުގެ ހާއްސަ ބެލުމުގެ ދަށުންނެވެ. މި ހާލަތުގެ ސަބަބުން ކޯޗު ކާލޯ އަންޗެލޮޓީ އިސްކޮށް ހުންނަވާ ކޯޗިން ޓީމުގެ ތެރޭގައި ވެސް ވަނީ ނުތަނަވަސްކަން އުފެދިފައެވެ.
Advertisement
ބްރެޒިލްގެ ރިޕޯޓްތައް ބުނާ ގޮތުގައި، ގްރަންޖާ ކޮމާރީގައި ކުރިއަށްދާ ސެލެސާއޯގެ ފުރަތަމަ ފަރިތަކުރުންތަކުގައި އެންމެ ބޮޑު ސަމާލުކަމެއް ހުއްޓިފައިވަނީ ނޭމާގެ ފިޒިކަލް ކޮންޑިޝަނަށެވެ. މިކަމާ ގުޅިގެން ބްރެޒިލްގެ ފުޓްބޯޅަ ފެޑެރޭޝަނުން (ސީ.ބީ.އެފް) ވަނީ މި މައުލޫމާތުތައް ސިއްރުކޮށްގެން ކުރިއަށް ގެންދިއުމަށް ހާއްސަ ފިޔަވަޅުތަކެއް އަޅާފައެވެ.
'ޓޯސެޑޯސް' އިން ރިޕޯޓްކުރާ ގޮތުގައި، ވޯލްޑް ކަޕް ސްކޮޑުގައި ނޭމާ ބަހައްޓާނެތޯ ނިންމުމަށް ބްރެޒިލުން މިހާރު ވަނީ ވަކި ތާރީޚެއް ކަނޑައަޅާފައެވެ. އެއީ އަންނަ ޖޫން މަހުގެ 6 ވަނަ ދުވަހު އެމެރިކާގައި މިސްރާ ދެކޮޅަށް ކުޅޭ އެކުވެރިކަމުގެ މެޗެވެ. މި މެޗަކީ ނޭމާގެ ފިޓްނަސް ހުރި މިންވަރު ބަލާނެ އެންމެ ފަހު އިމްތިހާނެވެ.
ފީފާގެ ގަވާއިދު ބުނާގޮތުން، މުބާރާތުގެ ފުރަތަމަ މެޗު ފެށުމުގެ 24 ގަޑިއިރު ކުރިއާ ހަމައަށް އަނިޔާގެ ސަބަބުން ކުޅުންތެރިން ބަދަލުކުރުމުގެ ފުރުސަތު އޮވެއެވެ.
ނޭމާގެ އަނިޔާއާ ގުޅިގެން ސަންތޯސް ކްލަބުން ފުރަތަމަ ހަމަހިމޭންކަން އިޚްތިޔާރު ކުރި ނަމަވެސް، ފަހުން ހެދި މެޑިކަލް ޓެސްޓުތަކުން ދައްކާ ގޮތުގައި އޭނާގެ ކަނާތު ފައިގެ ކޮފް މަސްގަނޑަށް ވަނީ 'ގްރޭޑް-ޓޫ' ގެ އަނިޔާއެއް ލިބިފައެވެ. މި އަނިޔާއިން ރަނގަޅުވުމަށް ތިން ހަފުތާއާއި ހަތަރު ހަފުތާއާ ދެމެދުގެ މުއްދަތެއް ނަގާނެ ކަމަށް ބެލެވެއެވެ. މީގެ މާނައަކީ ޕެނަމާއާ ދެކޮޅަށް ކުޅޭ އެކުވެރިކަމުގެ މެޗުތަކުގައި ނޭމާ ފެނުމުގެ ފުރުސަތު ވަރަށް ކުޑައެވެ.
މި ހުރިހާ ހާސްކަމެއްގެ ތެރޭގައި ވެސް ނޭމާ ދަނީ އާންމުންގެ ކުރިމަތީގައި އޭނާގެ ފިޓްނަސްއާ މެދު ޔަގީންކަން އޮތް ކަމަށް ދައްކަމުންނެވެ. ނޫސްވެރިން ކުރި ސުވާލުތަކަށް ޖަވާބު ދެމުން ނޭމާ ބުނީ އޭނާގެ ފައި "މުޅިން ސަލާމަތުން" އެބައޮތް ކަމަށާއި، ވޯލްޑް ކަޕް ގެއްލިދާނެތޯ ސުވާލު ކުރުމުން "މައްސަލައަކީ ކޮބައިތޯ" ބުނެ ރައްދު ދީފައެވެ.
އެހެންނަމަވެސް، އެތެރޭގެ މަސްދަރުތަކުން ބުނާ ގޮތުގައި ކޯޗު އަންޗެލޮޓީ ވަނީ މި ހާލަތާ ގުޅޭގޮތުން ނޭމާއާ ސީދާ ވާހަކަދައްކާފައެވެ. އަދި ރިކަވަރީ މަރުހަލާގައި ހުރި ނަމަވެސް، ޓީމާ އެކު މަޑުކުރުމަށް ނޭމާ ވަނީ އެއްބަސްވެފައެވެ.
2026 ވަނަ އަހަރުގެ ވޯލްޑް ކަޕްގައި ބްރެޒިލް ހިމެނެނީ ގްރޫޕް 'ޖޭ' ގައެވެ. އެ ޓީމުގެ ފުރަތަމަ މެޗުގައި ބައްދަލުކުރާނީ މޮރޮކޯއާއެވެ. ހަވަނަ ފަހަރަށް ވޯލްޑް ކަޕް ކާމިޔާބު ކުރުމުގެ އުންމީދުގައި އޮތް ބްރެޒިލަށް މިވަގުތު އޮތް އެންމެ ބޮޑު ގޮންޖެހުމަކީ އެ ޓީމުގެ އެންމެ މުހިންމު ކުޅުންތެރިޔާގެ ސިއްހީ ހާލަތެވެ.
