އިނގިރޭސިވިލާތުގެ "ޓްރޭޑް ޓެރިފް" އުސޫލަށް ގެނައި ބަދަލުތަކާއެކު، ރާއްޖޭގެ ކަނޑުމަހުގެ އުފެއްދުންތަކުން ނަގަމުން އައި ޑިއުޓީ ކަނޑާލުމަށް ނިންމި ނިންމުމަށް މޯލްޑިވްސް ސީފުޑް ޕްރޮސެސާސް އެންޑް އެކްސްޕޯޓާސް އެސޯސިއޭޝަން (އެމް.އެސް.ޕީ.އީ.އޭ) އިން ވަރަށް ހޫނު މަރުހަބާއެއް ކިޔައިފި އެވެ.

އިނގިރޭސިވިލާތުގެ ސަރުކާރުން ހާމަކޮށްފައިވާ ގޮތުގައި، މިގޮތަށް ޑިއުޓީ ކަނޑާލުމުގެ މައިގަނޑު މަގްސަދަކީ އެ ގައުމުގެ ވިޔަފާރިތަކަށް ބޭރުން މުދާ އެތެރެކުރުމުގައި ހިނގާ ހަރަދު ކުޑަކޮށް، ދުނިޔޭގެ ބާޒާރުގައި ވާދަވެރިކަން އިތުރުކުރުމެވެ. މީގެ އިތުރުން ސަޕްލައި ޗެއިން ވަރުގަދަކޮށް، ކުޑަ އަގެއްގައި ކަސްޓަމަރުންނަށް މުދާ ފޯރުކޮށްދިނުމަކީވެސް މި ނިންމުމުގެ ބޭނުމެކެވެ. ރާއްޖޭގެ މަހުގެ އުފެއްދުންތައް މި ލިސްޓުގައި ހިމެނުމަކީ ދިވެހިރާއްޖޭގެ މަސްވެރިކަމުގެ ދާއިރާއަށް ލިބުނު ވަރަށް ބޮޑު ކުރިއެރުމެއްގެ ގޮތުގައި އެ ޖަމިއްޔާއިން ފާހަގަކުރެ އެވެ.

މި އުފާވެރި ދަނޑިވަޅުގައި، އެމް.އެސް.ޕީ.އީ.އޭ އިން ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަދި ފިޝަރީޒް މިނިސްޓަރު އަހުމަދު ޝިޔާމް ކުރައްވަމުންދާ މަސައްކަތްޕުޅުތަކަށް ޝުކުރު އަދާކޮށްފަ އެވެ. މަސްވެރިންނާއި މަސް އެކްސްޕޯޓްކުރާ ފަރާތްތަކުގެ ހައްގުގައި ސަރުކާރުން ދެއްވާ އަހަންމިއްޔަތާއި، ބައިނަލްއަގުވާމީ މައިދާނުގައި ރާއްޖޭގެ މަހުގެ އުފެއްދުންތަކުގެ ވާދަވެރިކަން އިތުރުކުރުމަށް ކުރައްވާ މަސައްކަތްޕުޅުތައް އެ ޖަމިއްޔާއިން ވަނީ ފާހަގަކޮށްފަ އެވެ.

އެމް.އެސް.ޕީ.އީ.އޭ އިން އުންމީދު ކުރަނީ އިނގިރޭސިވިލާތުގެ ސަރުކާރާއެކު ދިވެހި ސަރުކާރުން ކުރަމުންދާ މަޝްވަރާތައް ކުރިއަށްގެންގޮސް، މިހާރު ލިބިފައިވާ ޑިއުޓީ އިނާޔަތްތަކަކީ ދާއިމީ އަދި ދިގުމުއްދަތުގެ އިންތިޒާމަކަށް ވެގެންދިއުމަށެވެ. މިފަދަ ދާއިމީ ނިންމުމެއްގެ ސަބަބުން އިނގިރޭސިވިލާތުގެ ބާޒާރަށް މަސް އެކްސްޕޯޓްކުރާ ދިވެހި ކުންފުނިތަކަށް އިތުރު އިތުބާރާއި ހަމަޖެހުން ލިބިގެންދާނެ އެވެ.

މީގެ އިތުރުން، މި ކާމިޔާބީ ހާސިލުކުރުމުގައި އެކި ގޮތްގޮތުން އެހީތެރިވެދެއްވި ހުރިހާ ފަރާތްތަކަށްވެސް އެމް.އެސް.ޕީ.އީ.އޭ އިން ވަނީ ހާއްސަ ޝުކުރެއް ދަންނަވާފަ އެވެ.