ކްރިސްޓިއާނޯ ރޮނާލްޑޯގެ މޮޅު ކުޅުމާއެކު، ސައުދީ ޕްރޯ ލީގުގައި މިރޭ ކުޅުނު މެޗުން ދަމަކް ބަލިކޮށް، އަލް ނަސްރުން 2025-26 ވަނަ އަހަރުގެ ލީގު ތަށި ކާމިޔާބުކޮށްފިއެވެ. ރިޔާޟްގެ އަލް-އައްވަލް ޕާކުގައި ކުޅުނު މި މެޗު އަލް ނަސްރުން ކާމިޔާބުކުރީ 4-1 ގެ ނަތީޖާއަކުންނެވެ.
މިއީ 2023 ވަނަ އަހަރުގެ ޖެނުއަރީ މަހު ރޮނާލްޑޯ އަލް ނަސްރާ ގުޅުނު ފަހުން އޭނާ އެ ކްލަބާއެކު ހޯދި ފުރަތަމަ ލީގު ތަށްޓެވެ. އަދި މިއީ އަލް ނަސްރުގެ ތާރީހުގައި އެ ކްލަބުން ހޯދި 11 ވަނަ ލީގު ތަށްޓެވެ. މިއާއެކު، 2018-19 ވަނަ އަހަރަށްފަހު ލީގު ތަށްޓެއް ހޯދުމަށް އެ ކްލަބުން ކުރަމުން އައި ހަ އަހަރުގެ ދިގު އިންތިޒާރަށް ވަނީ ނިމުމެއް އައިސްފައެވެ.
ފޯރިގަދަ ކުޅުމެއް ފެނިގެންދިޔަ މި މެޗުގެ 38 ވަނަ މިނެޓުގައި ސާޑިއޯ މާނޭ ވަނީ ބޮލުން ފޮނުވާލި ހަމަލާއަކުން އަލް ނަސްރަށް ލީޑު ނަގައިދީފައެވެ. އަދި ދެވަނަ ހާފުގެ 52 ވަނަ މިނެޓުގައި ކިންގްސްލީ ކޯމަން ވަނީ އަލް ނަސްރަށް ދެވަނަ ގޯލު ޖަހައިދީފައެވެ. ޑަމަކްގެ ހަމައެކަނި ގޯލު 58 ވަނަ މިނެޓުގައި މޫސާ ސިލާ ކާމިޔާބުކުރީ ލިބުނު ޕެނަލްޓީއަކުންނެވެ.
Advertisement
މެޗުގެ ފަހުބައި ފެނިގެންދިޔައީ "ރޮނާލްޑޯ ޝޯ" އެއްގެ ގޮތުގައެވެ. 63 ވަނަ މިނެޓުގައި ރޮނާލްޑޯ ވަނީ ހިތްގައިމު ހިލޭ ޖެހުމަކުން ލަނޑެއް ޖަހައި ލީޑު ފުޅާކޮށްދީފައެވެ. އަދި 81 ވަނަ މިނެޓުގައި އޭނާ ވަނީ އިތުރު ލަނޑެއް ޖަހައި، އަލް ނަސްރުގެ ތަށި ކަށަވަރުކޮށްދީފައެވެ. އުމުރުން 41 އަހަރުގެ ރޮނާލްޑޯ މި މެޗުގައި ދެއްކި ކުޅުމާއެކު، އޭނާއަކީ އަދިވެސް ދުނިޔޭގެ އެންމެ މޮޅު އެއް ކުޅުންތެރިޔާކަން ވަނީ ސާބިތުކޮށްދީފައެވެ.
ރޮނާލްޑޯގެ ދެވަނަ ގޯލާއެކު އަލް ނަސްރުގެ ސަޕޯޓަރުން މުޅި ދަނޑު "ރޮނާލްޑޯ ރޮނާލްޑޯ" އިން ގުގުމާލިއިރު އޭނާއަށް ވަނީ އުފަލުން ރޮވިފައެވެ.
މި ކާމިޔާބީއާއެކު، ފަހަކަށް އައިސް ސައުދީ ލީގުގައި އޮތް އަލް ހިލާލްގެ ބާރު ނިމުމަކަށް އައިސް، އަލް ނަސްރުން ވަނީ އަލުން ސައުދީ ފުޓްބޯޅައިގެ ރަސްކަމާ ހަވާލުވެފައެވެ.
