ދިވެހިރާއްޖޭން އިނގިރޭސިވިލާތަށް އެތެރެކުރާ ކަނޑުމަހުގެ އުފެއްދުންތަކުން ނަގަމުން އައި 20 އިންސައްތައިގެ އިމްޕޯޓް ޑިއުޓީ (ޓެރިފް)، 2028 ވަނަ އަހަރުގެ ނިޔަލަށް މެދުކަނޑާލުމަށް އިނގިރޭސި ސަރުކާރުން ނިންމުމާއި ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހޫނު މަރުހަބާއެއް ދަންނަވާފި އެވެ.
މިއީ ރާއްޖޭގެ މަސްވެރިކަމުގެ ސިނާއަތަށް ލިބުނު ތާރީހީ ކާމިޔާބީއެކެވެ. އިނގިރޭސިވިލާތުން މި ފިޔަވަޅު އެޅީ ރާއްޖެއާއެކު ވިޔަފާރީގެ ވަކި އެއްބަސްވުމެއް ނެތް ގައުމުތަކުން އެތެރެކުރާ މަހަށް 2021 ވަނަ އަހަރުން ފެށިގެން ނަގަމުން އައި 20 އިންސައްތައިގެ ޓެރިފްގެ ސަބަބުން ދިވެހި މަހަށް ބާޒާރުގައި ކުރިމަތިވި ގޮންޖެހުންތަކަށް ހައްލެއް ހޯދައިދިނުމުގެ ގޮތުންނެވެ.
Advertisement
މި ނިންމެވުމާއި ގުޅިގެން ރައީސް ވިދާޅުވީ، މިއީ މަސްވެރިންގެ އާމްދަނީ އިތުރުވެ، ރަށްރަށުގެ ދިރިއުޅުމުގެ ހާލަތު ރަނގަޅުވެގެންދާނެ ކަމެއް ކަމަށެވެ. އަދި ރާއްޖޭގެ ދެމެހެއްޓެނިވި ދޮށީގެ މަސްވެރިކަމުގެ އުފެއްދުންތަކަށް އިނގިރޭސި ބާޒާރުގައި ފުރުސަތުތައް ފުޅާވެ، އެހެން ގައުމުތަކާ އެއްހަމައެއްގައި ވާދަކުރުމުގެ ފުރުސަތު މިހާރު ފަހިވެފައިވާ ކަމަށް އެމަނިކުފާނު ފާހަގަކުރެއްވި އެވެ.
ރާއްޖެއަކީ އިނގިރޭސިވިލާތަށް އެންމެ ގިނައިން ކަނޑުމަސް އެކްސްޕޯޓްކުރާ ގައުމުތަކުގެ ތެރެއިން 9 ވަނަ ގައުމެވެ. އަހަރަކު ގާތްގަނޑަކަށް 16.7 އާއި 18 މިލިއަން ޕައުންޑާ ދެމެދުގެ އަދަދަކަށް ރާއްޖޭން އެ ގައުމަށް މަސް ބޭރުކުރެ އެވެ. ނަމަވެސް، އިކުއެޑޯ، މޮރިޝަސް އަދި ސީޝެލްސް ފަދަ ގައުމުތަކަށް މީގެ ކުރިން ވެސް ޓެރިފް ނެތި މަސް އެތެރެކުރެވޭތީ، ދިވެހި އެކްސްޕޯޓަރުންނަށް ބޮޑެތި ގޮންޖެހުންތަކެއް ކުރިމަތިވެފައިވެ އެވެ.
މަސްވެރިކަމުގެ ސިނާއަތަށް ސަރުކާރުން ދެއްވާ ހާއްސަ އިސްކަމުގެ ދަށުން، އިނގިރޭސިވިލާތަށް ކުރެއްވި ފުރަމާނަ ދަތުރުފުޅުގައި ރަސްގެފާނު ޗާލްސްއާއި އެ ގައުމުގެ އިސްވެރިންގެ އަރިހުން ރައީސް މުއިއްޒު ވަނީ މި ޓެރިފް ކަނޑާލުމަށް އެދިވަޑައިގެންފަ އެވެ. ގާތްގަނޑަކަށް 12 އަހަރުގެ މެދުނުކެނޑި ކުރި މަސައްކަތަށް ފަހު ލިބުނު މި ކުރިއެރުމަކީ ދެ ގައުމުގެ ދެމެދުގައި އޮތް ގާތް ގުޅުން ރަމްޒުކޮށްދޭ ކަމެއް ކަމަށް ރައީސް ވިދާޅުވި އެވެ.
ސަރުކާރުން ބުނިގޮތުގައި، މިހާރު ލިބުނު މި ލުޔަކީ 2028 ގެ ނިޔަލަށް އޮތް ފުރުސަތަކަށް ވީނަމަވެސް، މި ނިންމުން ދާއިމީ ކުރުމަށްޓަކައި އިނގިރޭސި ސަރުކާރާއެކު ކުރަންޖެހޭ މަޝްވަރާތައް ރާއްޖޭން މެދުނުކެނޑި ކުރިއަށް ގެންދާނެ އެވެ. މީގެ ސަބަބުން މަސް ޕްރޮސެސްކުރާ ކުންފުނިތަކުގެ ފައިދާ އިތުރުވެ، މަސްވެރިންނަށް ވިއްކާ އަގު ރަނގަޅުވުމަށް ބޮޑު މަގަކަށް ވެގެންދާނެ އެވެ.
