ދިވެހި މަސްވެރިކަން ދުނިޔޭގެ އެންމެ މުހިންމު އެއް މާކެޓަށް ހުޅުވިގެން ގޮސްފައިވާ ކަމަށާއި، މިއީ މަސްވެރިންނަށާއި އެމީހުންގެ އާއިލާތަކަށް ލިބުނު ބޮޑު ކާމިޔާބީއެއް ކަމަށް ފިޝަރީސް މިނިސްޓަރު އަހްމަދު ޝިޔާމް މިއަދު ވިދާޅުވެއްޖެ އެވެ.
މިނިސްޓަރު ޝިޔާމް މިހެން ވިދާޅުވީ، ރާއްޖެއިން އިނގިރޭސިވިލާތަށް ބޭރުކުރާ މަހުގެ ބާވަތްތަކުން ނަގާ ޓެރިފް، 2028 ވަނަ އަހަރުގެ ނިޔަލަށް ކަނޑާލުމަށް އެ ގައުމުން ނިންމި ނިންމުމާ ގުޅިގެން "އެކްސް" ގައި ކުރެއްވި ޕޯސްޓެއްގަ އެވެ. މި ނިންމުމާއެކު ދިވެހި މަސްވެރިކަމަށް ބައިނަލްއަގްވާމީ މައިދާނުގައި އައު ފުރުސަތުތަކެއް ހުޅުވިގެން ގޮސްފައިވާކަން ފާހަގަކުރައްވައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ލީޑަޝިޕަށް މިނިސްޓަރު ވަނީ ވަރަށް ބޮޑަށް ތައުރީފް ކުރައްވާފަ އެވެ.
ޝިޔާމް ވިދާޅުވި ގޮތުގައި، އިނގިރޭސިވިލާތުން ޓެރިފް ކަނޑާލުމަކީ މަސްވެރިންނާއި، މަސްވެރި އާއިލާތަކުގެ އިތުރުން މަސް ބަންދުކޮށްގެން ބޭރުކުރާ ވިޔަފާރިތަކަށް ލިބުނު ވަރަށް ބޮޑު ކުރިއެރުމެކެވެ. "ދިވެހި ކަނޑުމަހަކީ ހަމައެކަނި ދުނިޔެއަށް ފޯރުކޮށްދޭ ކާނާއެއް ނޫން. މިއީ ތިމާވެއްޓާ ރައްޓެހި، ޒިންމާދާރު ގޮތެއްގައި ބާނާ މަހެއް،" މިނިސްޓަރު ވިދާޅުވި އެވެ.
ދިވެހި މަސްވެރިކަން ކުރިއަރުވައި، ބައިނަލްއަގްވާމީ ބާޒާރުގައި ރާއްޖޭގެ މަހަށް އޮތް ފުރުސަތުތައް ފުޅާކުރުމަށް ރައީސް ޑރ. މުޢިއްޒު ދެއްވާ ހާއްސަ އަހަންމިއްޔަތާއި ކުރައްވާ މަސައްކަތްޕުޅުތަކަށްޓަކައި މިނިސްޓަރު ވަނީ ރައީސަށް ޝުކުރު އަދާކުރައްވާފަ އެވެ.
ރާއްޖެ ހިމެނޭހެން އިނގިރޭސިވިލާތާއެކު ވިޔަފާރީގެ އެއްބަސްވުމެއް ނެތް ގައުމުތަކުން އެތެރެކުރާ މަހުން 20 އިންސައްތައިގެ ޓެރިފެއް ނަގަން ފެށީ 2021 ވަނަ އަހަރުގަ އެވެ. މިހާތަނަށް އިނގިރޭސިވިލާތަށް އެންމެ ގިނައިން މަސް އެތެރެކުރާ ގައުމުތަކުގެ ތެރެއިން އިކުއެޑޯ، މޮރިޝަސް އަދި ސީޝެލްސް ފަދަ ގައުމުތަކަށް ޑިއުޓީއާ ނުލައި މަސް އެތެރެކުރުމުގެ ފުރުސަތު އޮވެ އެވެ.
ރާއްޖެއަކީ އިނގިރޭސިވިލާތަށް އެންމެ ގިނައިން މަސް އެކްސްޕޯޓްކުރާ ގައުމުތަކުގެ ލިސްޓުގެ 9 ވަނައިގައި އޮތް ގައުމެވެ. ރާއްޖެއިން އަހަރަކު ގާތްގަނޑަކަށް 16.7 އާއި 18 މިލިއަން ޕައުންޑާ ދެމެދުގެ އަދަދަކަށް އިނގިރޭސިވިލާތަށް މަސް ބޭރުކުރެ އެވެ. ސަރުކާރުން ބުނެފައިވަނީ އިނގިރޭސިވިލާތުން މިހާރު ނިންމި ނިންމުން ދާއިމީ ކުރުމަށްޓަކައި ކުރަންޖެހޭ މަޝްވަރާތައް މެދުނުކެނޑި ކުރިއަށް ގެންދާނެ ކަމަށެވެ.
މި ނިންމުމަކީ ދިވެހި މަސްވެރިކަމުގެ ސިނާއަތަށް ލިބުނު ތާރީހީ ކާމިޔާބީއެއްގެ ގޮތުގައި ސަރުކާރުން ސިފަކުރެ އެވެ. އިނގިރޭސި ސަރުކާރުގެ މި ނިންމުމަށް ރައީސުލްޖުމްހޫރިއްޔާ ޑރ. މުއިއްމަދު މުއިއްޒު ވެސް ވަނީ މަރުހަބާ ދަންނަވާފަ އެވެ.
