ޗައިނާގައި ފެންބޮޑުވެ ގިނަބަޔކު މަރުވެ، ގެއްލިއްޖެ

ޗައިނާގެ މެދުތެރޭގައި ބޯކޮށް ވާރޭވެހި ފެންބޮޑުވުމުގެ ސަބަބުން ފަސް މީހަކު މަރުވެ 11 މީހަކު ގެއްލިފައިވާ ކަމަށް އެ ޤައުމުން މިއަދު ބުނެފިއެވެ.

ހުނާން ޕްރޮވިންސްގެ ޝިމެން ކައުންޓީގެ އިމަޖެންސީ މެނޭޖްމަންޓް އެންޑް ސޭފްޓީ ޕްރޮޑަކްޝަން ކޮމިޓީން ބުނި ގޮތުގައި އާދީއްތަ ދުވަހުން ފެށިގެން ބޯކޮށް ވާރޭ ވެހި، ފެންބޮޑުވެ 23 ޑިސްޓްރިކްޓަކަށް އަސަރު ކޮށްފައި ވެއެވެ.

ޗައިނާ އަށް ފާއިތުވި ދެއަހަރު ވެސް މޫސުން ގޯސްވެ ވާރޭވެހުމުގެ ސަބަބުން އިގްތިސާދީ ގޮތުން ބޮޑެތި ގެއްލުންތަކެއް ލިބުނެވެ.

ޗައިނާގެ މިނިސްޓްރީ އޮފް އިމަޖެންސީ މެނޭޖްމަންޓުން ބުނާ ގޮތުގައި 2024 ވަނަ އަހަރު ގުދުރަތީ ކާރިސާތަކުގެ ސަބަބުން އެ ގައުމުގެ 94.13 މިލިއަނަށް ވުރެ ގިނަ މީހުންނަށް އަސަރުކޮށްފައިވާއިރު، 856 މީހުން މަރުވިއެވެ. އިގްތިސާދީ ގޮތުން ލިބުނު ގެއްލުން 401.1 ބިލިއަން ޔުއާން (ގާތްގަނޑަކަށް 55.8 ބިލިއަން އެމެރިކާ ޑޮލަރު) އަށް އަރާފައި ވެއެވެ.