ދުނިޔޭގެ އެކި ހިސާބުތަކުގައި ހެންޓާވައިރަސް ފެތުރެމުންދާ ކަމުގެ ހަބަރުތަކާއެކު ގިނަ ބައެއްގެ މެދުގައި ބިރުވެރިކަން އުފެދިފައިވީ ނަމަވެސް، މިއީ ކޮވިޑް-19 ފަދަ ބޮޑު ބަލިމަޑުކަމަކަށް ވެދާނެ ކަމުގެ ބިރު ކުޑަކަމަށް ސިއްހީ މާހިރުން ވިދާޅުވެއްޖެ އެވެ.
މި ބަލި ފެތުރުމުގެ ހާދިސާއެއް އެންމެ ފަހުން ރިޕޯޓްކޮށްފައިވަނީ އާޖެންޓީނާއިން ފުރައިގެން ދަތުރުކުރި "އެމް.ވީ ހޮންޑިއަސް" ނަމަކަށް ކިޔާ ކްރޫޒް މަނަވަރަކުންނެވެ. މި މަނަވަރުން ދަތުރުކުރި ތިން މީހަކު މިހާތަނަށް މަރުވެފައިވާއިރު، ހަތަރު މީހަކަށް އިތުރު ފަރުވާ ދިނުމަށްޓަކައި ވަނީ މަނަވަރުން ބާލާފަ އެވެ. މިހާރު ދަނީ މަނަވަރުގައި ތިބި މީހުން ބާލައި، އެމީހުންގެ ގައުމުތަކަށް ފޮނުވުމުގެ މަސައްކަތް ކުރަމުންނެވެ. އަދި މީގެ ކުރިން އެކި ފްލައިޓްތަކުގައި ގައުމަށް ދިޔަ މީހުންނާ ބައްދަލުވި މީހުން ދެނެގަތުމުގެ މަސައްކަތް ވެސް ކަމާބެހޭ އިދާރާތަކުން ވަނީ ފަށާފަ އެވެ.
"މިއީ ކޮވިޑެއް ނޫން"
ދުނިޔޭގެ ސިއްހަތު ޖަމިއްޔާ (ޑަބްލިޔު.އެޗް.އޯ) ގެ ޑރ. މާރިއާ ވެން ކާކޯވް ވިދާޅުވި ގޮތުގައި، ހެންޓާވައިރަހަކީ ކޮވިޑް ނުވަތަ އިންފްލުއެންޒާ ފަދަ ހަލުވިކަމާއެކު ފެތުރޭ ބަލިމަޑުކަމެއް ނޫނެވެ. މި ބަލީގެ "އެންޑީސް" ވައްތަރަކީ އިންސާނުންގެ ތެރޭގައި ފެތުރުމުގެ ފުރުސަތު ވަރަށް ކުޑަ ވައްތަރެކެވެ. އިންސާނުންގެ ފަރާތުން އިންސާނުންގެ ގަޔަށް ބަލި އެރުމުގެ ފުރުސަތު އޮތް ނަމަވެސް، މިއީ ދުނިޔޭގެ ފެންވަރުގައި ބޮޑު ރޯގާއަކަށް ވުމުގެ ބިރު ކުޑަ ބައުލީއެއް ކަމަށް އެ ޖަމިއްޔާއިން ބުނެ އެވެ.
ބަލި ފެތުރޭ ގޮތާއި ރައްކާތެރިކަން
ހެންޓާވައިރަސް އާންމުކޮށް ފެތުރެނީ މީދަލުގެ ޒަރީއާއިންނެވެ. މީދަލުގެ ކުޑަކަމުދާ ތަކެތި، ނަޖިސް ނުވަތަ ކުޅު އެކުލެވޭ ވައިގެ ތެރެއަށް ނޭވާލުމުގެ ސަބަބުން އިންސާނުންގެ ގަޔަށް މި ވައިރަސް އަރައެވެ. "އެމް.ވީ ހޮންޑިއަސް" މަނަވަރު ދަތުރުކޮށްފައިވަނީ ޖަނަވާރުން ގިނަ "ވައިލްޑްލައިފް" ސަރަހައްދުތަކަކަށް ކަމުން، ބަލި ޖެހުނު މީހުންނަށް ވައިރަސް އެރީ އެފަދަ ތަނަކުން ކަމަށް ބެލެވެ އެވެ.
ސިއްހީ މާހިރުން ވިދާޅުވާ ގޮތުގައި މަގުމަތިން ނުވަތަ އާންމު ތަންތަނުން ބައްދަލުވާ މީހުންގެ ފަރާތުން މި ބަލި ނުފެތުރޭނެ އެވެ. ނަމަވެސް، ބަލި ފެތުރުން ހުއްޓުވުމަށްޓަކައި މަނަވަރުގެ ފަސިންޖަރުންނާއި ފަޅުވެރިން މަހަކަށް ވުރެ ގިނަ ދުވަހު އެކަހެރިވާން ޖެހޭނެ އެވެ.
ބަލީގެ އަލާމާތްތައް
މި ބަލީގެ އަލާމާތްތައް ފެންނަން ފަށަނީ ބަލި ޖެހޭތާ 2 ހަފުތާއާއި 4 ހަފުތާއާ ދެމެދުގަ އެވެ. ބައެއް ފަހަރު މި މުއްދަތު މަހަކަށް ވުރެ ދިގުވެއެވެ. ބަލީގެ އަލާމާތްތަކުގެ ތެރޭގައި:
- ހުން އައުން
- ވަރުބަލިވުން އަދި ގައިގައި ރިއްސުން
- ނޭވާލާން އުނދަގޫވުން
- ބަނޑުގައި ރިއްސުން އަދި ހޮޑުލުން ހިމެނެ އެވެ.
ހެންޓާވައިރަހަށް ހާއްސަ ފަރުވާއެއް އަދި ހޯދިފައި ނެތް ނަމަވެސް، ބަލީގެ ކުރީކޮޅު ހޮސްޕިޓަލުގައި ފަރުވާ ދޭން ފެށުމުން ބަލިން ފަސޭހަވުމުގެ ފުރުސަތު ވަރަށް ބޮޑެވެ.
މިހާރު އެކި ގައުމުތަކުން ދަނީ އެމީހުންގެ ރައްޔިތުން ކަރަންޓީނުކޮށް، ބަލީގެ އަލާމާތްތައް ހުރިތޯ ވަރަށް ގާތުން ބަލަމުންނެވެ. އިނގިރޭސިވިލާތުގެ ސިއްހީ އިދާރާތަކުން ވެސް ބުނެފައިވަނީ މަނަވަރުގެ ދަތުރުވެރިންނާ ސީދާ ގުޅުމެއް ނެތް އާންމު މީހަކަށް މި ބަލީގެ ނުރައްކާ އޮތީ ވަރަށް ކުޑަ މިންވަރަކަށް ކަމަށެވެ.
