ލިއަމް ރޯސެނިއޯ މަގާމުން ވަކިކުރިތާ މަދު ދުވަސްކޮޅެއްގެ ތެރޭގައި، އެންޒޯ ފެނާންޑޭޒް ކާމިޔާބުކޮށްދިން ލަނޑުން ލީޑްސް ޔުނައިޓެޑް ބަލިކޮށް ޗެލްސީން އެފްއޭ ކަޕްގެ ފައިނަލުން ޖާގަ ހޯދައިފި އެވެ.
މެޗުގެ ކުރީކޮޅު ޓީމުގެ އެންމެ ގިނަ ލަނޑު ޖަހާފައިވާ ޔާއޯ ޕެޑްރޯ އަނބުރާ ފުރަތަމަ އެގާރައަށް އައުމާއެކު ޗެލްސީ ފެނުނީ ވަރަށް ވަރުގަދަކޮށެވެ. ނަމަވެސް މެޗުގެ ފުރަތަމަ ނުރައްކާތެރި ހަމަލާ އުފެއްދީ ލީޑްސްއިންނެވެ. މެޗުގެ 15 ވަނަ މިނެޓުގައި ބްރެންޑަން އާރޮންސަން ގޯލާ ދިމާލަށް ފޮނުވާލި ހަމަލާ، ޗެލްސީގެ ގޯލްކީޕަރު ރޮބާޓް ސަންޗޭޒް ވަނީ ހުޝިޔާރުކަމާއެކު ދިފާއުކޮށްފަ އެވެ.
ޗެލްސީން މެޗުގެ ލީޑު ނެގީ ފުރަތަމަ ހާފުގެ މެދުތެރޭގަ އެވެ. ޕެޑްރޯ ފޮނުވާލި ބޯޅައެއް ގޯލުގެ ދަނޑީގައި ޖެހުނުތާ ކުޑަވަގުތުކޮޅެއްގެ ތެރޭގައި، ލީޑްސްގެ ޕާސްކަލް ސްޓްރޫއިކްއަށް ހެދުނު ގޯހެއްގެ ފައިދާ ނަގައި، ޕެޑްރޯ ނެޓޯ ނަގައިދިން ހުރަހަކުން އެންޒޯ ފެނާންޑޭޒް ވަނީ ބޮލުން ގޯލުގެ ތެރެއަށް ބޯޅަ ފޮނުވާލާފައެވެ. މިއީ މުޅި މެޗުގައި ފެނިގެންދިޔަ ހަމައެކަނި ލަނޑެވެ.
Advertisement
މި ހާފުގެ ތެރޭގައި ދަނޑުމަތީގައި ހޫނު ބަހުސްތަކެއްވެސް ހިނގި އެވެ. އެގޮތުން ޗެލްސީގެ މާކް ކުކުރެއްލާގެ އިސްތަށިގަނޑަށް ލީޑްސްގެ ޑޮމިނިކް ކަލްވަޓް-ލެވިން ދަމައިގަތުމުން ވީއޭއާރުން އެ ހާދިސާ ބެލި އެވެ. ނަމަވެސް ކަލްވަޓް-ލެވިންއަށް ރަތް ކާޑެއް ނުދައްކައި ސަލާމަތްވުން ވެގެންދިޔައީ ގިނަ ބައެއްގެ ފާޑުކިޔުން އަމާޒުވި ނިންމުމަކަށެވެ.
ދެވަނަ ހާފުގައި ލީޑްސްއިން މެޗުގެ ނަތީޖާ ހަމަހަމަކުރުމަށް ވަރަށް ބޮޑަށް މަސައްކަތް ކުރިއެވެ. ހާއްސަކޮށް އެންޓަން ސްޓާކް ފޮނުވާލި ބާރު ހަމަލާއެއް ކީޕަރު ސަންޗޭޒް ދިފާއުކުރިއިރު، އޭނާ ފޮނުވާލި ހިލޭ ޖެހުމެއް ގޯލުގެ ދަނޑި ކައިރިން ބޭރަށް ދިޔަ އެވެ.
މި މޮޅާއެކު ޗެލްސީގެ ކޯޗު މެކްފާލޭންއަށް މި ސީޒަނުގައި ދެވަނަ ފަހަރަށް ޕެޕް ގާޑިއޯލާގެ މެންޗެސްޓާ ސިޓީއާ ދެކޮޅަށް ފައިނަލުގައި ނުކުތުމުގެ ފުރުސަތު މިވަނީ ލިބިފަ އެވެ.
