ބަނގުރާ ގެންގުޅެ، އޭގެ ވިޔަފާރިކުރާކަމުގެ ތުހުމަތުގައި ބަންގްލަދޭޝްގެ ރައްޔިތަކު ފުލުހުންގެ ބެލުމުގެ ދަށަށް ގެންގޮސްފި އެވެ.

މި މައްސަލައާ ގުޅިގެން ހައްޔަރުކޮށްފައިވަނީ ބަންގްލަދޭޝްގެ ރައްޔިތެއް ކަމުގައިވާ އުމުރުން 35 އަހަރުގެ އެމް.ޑީ ރަޖިބް އަލީ އެވެ. އޭނާ ހައްޔަރުކޮށްފައިވަނީ ފުލުހުންގެ ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެން މި ހިނގާ އެޕްރީލް މަހުގެ 22 ވަނަ ދުވަހު މާލޭގައި ހިންގި ހާއްސަ އޮޕަރޭޝަނެއްގަ އެވެ.

ފުލުހުން މައުލޫމާތު ދޭ ގޮތުގައި، ރަޖިބް އަލީ މާލޭ މަގުމަތިން ހުއްޓުވައި ބަލައިފާސްކުރިއިރު، އޭނާގެ އަތުން 35 ފުޅި ބަނގުރާ ފެނިފައިވެ އެވެ. މިއީ ރާއްޖޭގައި މަނާކޮށްފައިވާ ތަކެތި ގެންގުޅެ، އޭގެ ވިޔަފާރި ފުޅާދާއިރާއެއްގައި ކުރާކަމުގެ ތުހުމަތުގައި ހިންގުނު އޮޕަރޭޝަނެކެވެ.

މި މައްސަލައިގެ އިޖުރާއަތްތައް ފުރިހަމަކުރުމަށްފަހު، ރަޖިބް އަލީ މިހާރު ވަނީ ރާއްޖެއިން ޑީޕޯޓްކޮށްލުމަށްޓަކައި މޯލްޑިވްސް އިމިގްރޭޝަނާ ހަވާލުކޮށްފަ އެވެ. ސަރުކާރުގެ ކަމާބެހޭ އިދާރާތަކުން ދަނީ ރާއްޖޭގައި ގަވާއިދާ ހިލާފަށް އުޅޭ އަދި ކުށްތަކަށް އަރައިގަންނަ ބިދޭސީންނާމެދު ހަރުކަށި ފިޔަވަޅުތަކެއް އަޅަމުންނެވެ.

މި މައްސަލަ ފުލުހުން އިތުރަށް ތަހުގީގު ކުރަމުންދާ ކަމަށްވެސް އެ މުއައްސަސާއިން ހާމަކޮށްފައިވެ އެވެ.