ރެއާލް މެޑްރިޑާއި ބްރެޒިލްގެ ގައުމީ ޓީމުގެ އިތުބާރު ޑިފެންޑަރު އެޑާ މިލިޓާއޯގެ ފަޔަށް ލިބުނު ސީރިއަސް އަނިޔާއަކާ ގުޅިގެން، މިއަހަރު ބާއްވާ ވޯލްޑް ކަޕްގައި އޭނާއަށް ނުކުޅެވޭނެކަން ކަށަވަރުވެއްޖެއެވެ.

އުމުރުން 28 އަހަރުގެ މިލިޓާއޯގެ ވާތު ފައިގެ ފަލަމަސްގަނޑަށް މި އަނިޔާވީ އެންމެ ފަހުން އަލަވޭސްއާ ދެކޮޅަށް ރެއާލް ކުޅެ 2-1 އިން މޮޅުވި މެޗުގައެވެ. މިއީ ކުރިން ވެސް ލިބިފައިވާ އަނިޔާއެއްގެ ސަބަބުން އުފެދިފައިވާ ލަކުނެއް އަލުން ފަޅައިގެން ދިއުމުގެ ސަބަބުން ދިމާވި ކަމެކެވެ.

ރިއާލްގެ މެޑިކަލް ޓީމުން ބެލިބެލުމުން މިލިޓާއޯގެ އަނިޔާ ކުރިން ހީކުރި ވަރަށް ވުރެ މާ ސީރިއަސްއެވެ. މި އަނިޔާއިން ސަލާމަތްވުމަށްޓަކައި އޭނާ ވަނީ އޮޕަރޭޝަނެއް ކުރަން ޖެހިފައެވެ. މިއާއެކު، އަންނަ ހޫނު މޫސުމުގައި އޮންނަ ބައިނަލްއަގުވާމީ މުބާރާތްތަކާއި ވޯލްޑް ކަޕްގައި ބްރެޒިލްގެ ޑިފެންސް ލައިން ބެލެހެއްޓުމަށް އޭނާއަށް ފުރުސަތެއް ނުލިބޭނެއެވެ.

މި ސީޒަނަކީ މިލިޓާއޯއަށް އަނިޔާގެ ގިނަ ގޮންޖެހުންތަކަކާ ކުރިމަތިލާން ޖެހިފައިވާ ސީޒަނެކެވެ. މިދިޔަ ޑިސެމްބަރު މަހު ސެލްޓާ ވީގޯއާ ދެކޮޅަށް ކުޅުނު މެޗުގައި ލިބުނު އަނިޔާއަކާ ގުޅިގެން ހަތަރު މަސް ދުވަހު ކުޅުމާ ދުރުގައި ހުރުމަށްފަހު، އޭނާ އެނބުރި އައީ ދާދި ފަހުންނެވެ. އޭނާ ވަނީ ޗެމްޕިއަންސް ލީގުގެ ކުއާޓާ ފައިނަލުގައި ބަޔާން މިއުނިކާ ދެކޮޅަށް ވެސް ކުޅެފައެވެ.

ރެއާލް މެޑްރިޑްގެ މެޑިކަލް ޓީމުން ބުނާ ގޮތުގައި، ކުރިއަށް އޮތް ދުވަސްތަކުގައި މިލިޓާއޯގެ އޮޕަރޭޝަން ކުރެވޭނެއެވެ. އަދި އޭނާ ދެން އެނބުރި ދަނޑަށް އަންނާނީ 2026-27 ވަނަ އަހަރުގެ ސީޒަނަށް ކަމަށް ބެލެވެއެވެ. މިލިޓާއޯ ނެތުމުން ބްރެޒިލްގެ ޑިފެންސް ލައިން އަލުން ތަރުތީބުކުރުމަށް ކޯޗު ކާލޯ އަންޗެލޮޓީއަށް ބޮޑު މަސައްކަތެއް ކުރަން ޖެހޭނެއެވެ.