ދ. ކުޑަހުވަދޫގައި ފިއުލް ސަޕްލައިސް މޯލްޑިވްސް (އެފްއެސްއެމް) އިން ގާއިމުކުރި އައު ފިއުލް ޝެޑް ރަސްމީކޮށް ހުޅުވައި، އެ ރަށުގައި ތެލުގެ ހިދުމަތް ދޭން ފަށައިފިއެވެ. މިއީ މުޅި ރާއްޖެއަށް ފަސޭހަކަމާއެކު ތެޔޮ ލިބޭނެ އިންތިޒާމު ހަމަޖެއްސުމަށް އެ ކުންފުނިން ކުރަމުންދާ މަސައްކަތުގެ ދަށުން އެޅުނު މުހިންމު ފިޔަވަޅެކެވެ.
ކުޑަހުވަދޫގައި ހުޅުވުނު މި ޝެޑަކީ ރާއްޖޭގެ ކޮންމެ އަތޮޅެއްގައި މަދުވެގެން އެއް ފިއުލް ޝެޑް ގާއިމުކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން ހުޅުވުނު ތަނެކެވެ. އެފްއެސްއެމް އިން ކުޑަހުވަދޫގެ ސައިޓް އޮޕަރޭޝަނަށް މި ގެނައީ، ށ. މިލަންދޫ އަދި ފ. ނިލަންދޫގައި މިފަދަ ޝެޑްތައް ހުޅުވިތާ ހަފުތާތަކެއްގެ ތެރޭގައެވެ.
މި މަޝްރޫޢުގެ ދަށުން މިހާތަނަށް ހަތަރަކަށްވުރެ ގިނަ ސައިޓް އޮޕަރޭޝަނަށް ގެނެވިފައިވާއިރު، ރާއްޖޭގެ އެކި ކަންކޮޅުތަކުގައި ޖުމލަ 18 ފިއުލް ޝެޑެއް ގާއިމުކުރުމުގެ އަމަލީ މަސައްކަތް އެ ކުންފުނިން ދަނީ ކުރަމުންނެވެ.
ކުޑަހުވަދޫގައި މި ޚިދުމަތް ފެށުމާއެކު ދާލު އަތޮޅުގެ ތެލުގެ ސަޕްލައި އިތުރަށް ވަރުގަދަވެގެންދާނެއެވެ. މީގެ ސަބަބުން ތެޔޮ ހޯދުމަށްޓަކައި އެއް ރަށުން އަނެއް ރަށަށް ކުރަންޖެހޭ ދިގު ދަތުރުތައް މަދުވެ، އަތޮޅުގެ މަސްވެރިންނަށާއި، ދަތުރުފަތުރުގެ ޚިދުމަތްދޭ ފަރާތްތަކުގެ އިތުރުން ކުދި ވިޔަފާރިތަކަށް ބޮޑެތި ލުއިތަކެއް ލިބިގެންދާނެއެވެ.
ކުޑަހުވަދޫއަކީ ދާލު އަތޮޅުގެ ދަތުރުފަތުރުގެ މައި މަރުކަޒަކަށް ވުމުން، ފެންވަރު ރަނގަޅު ފިއުލް އައުޓްލެޓެއް އެ ރަށުގައި ހުރުމަކީ ހަމައެކަނި އެ ރަށުގެ ރައްޔިތުންނަށް ލިބޭ ފައިދާއެއް ނޫނެވެ. އެއީ އެ ސަރަހައްދުން ދަތުރުކުރާ ހުރިހާ އުޅަނދުފަހަރަކަށްވެސް ލިބިގެންދާނެ ވަރަށް ބޮޑު ފަސޭހައެކެވެ.
