މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގެ ސަބަބުން އިނގިރޭސިވިލާތުގެ އިގްތިސާދު ހީނަރުވެ، އެ ގައުމުގެ ގާތްގަނޑަކަށް 250,000 މީހުންގެ ވަޒީފާ ގެއްލުމުގެ ބިރު ބޮޑުވެފައިވާ ކަމަށް ރިޕޯޓްތައް ބުނެފިއެވެ.

ބައިނަލްއަގުވާމީ މީޑިއާތަކުން ރިޕޯޓްކޮށްފައިވާ ގޮތުގައި، އީރާނު ހަނގުރާމައިގެ ސަބަބުން ތެލުގެ އަގު އުފުލުމާއި، މުދާ އުފުލުމުގެ ނިޒާމަށް ބުރޫއެރުމުގެ ސަބަބުން އިނގިރޭސިވިލާތުގެ އިގްތިސާދަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. ވަކިން ހާއްސަކޮށް ރަތް ކަނޑުގެ ސަރަހައްދުގައި އޮތް ނުތަނަވަސްކަމުގެ ސަބަބުން މުދާ ސަޕްލައި ކުރުމުގައި ދަތިތައް ކުރިމަތިވެ، ތަކެތީގެ އަގު ވަނީ އުފުލިފައެވެ.

އިގްތިސާދީ މާހިރުން އިންޒާރު ދޭ ގޮތުގައި، މި ހާލަތު މިގޮތަށް ކުރިއަށްދާނަމަ އިނގިރޭސިވިލާތް އިގްތިސާދީ ކާރިސާއަކަށް ނުވަތަ "ރިސެޝަން" އަކަށް ދިއުމުގެ ފުރުސަތު ވަރަށް ބޮޑެވެ. މީގެ ސަބަބުން އެންމެ ބޮޑު އަސަރެއް ކުރާނެ ކަމަށް ބެލެވެނީ ރީޓެއިލް، މެނުފެކްޗަރިން އަދި ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކަށެވެ.

އިނގިރޭސިވިލާތުގެ ގިނަ ކުންފުނިތަކަކުން މިހާރު ދަނީ ހަރަދު ކުޑަކުރުމުގެ ގޮތުން މުވައްޒަފުން މަދުކުރުމަށް ވިސްނަމުންނެވެ.

އިނގިރޭސި ސަރުކާރުން މި މައްސަލައަށް ހައްލެއް ހޯދުމަށް މަސައްކަތް ކުރަމުންދާއިރު، އީރާނަށް ވަންނަ އުޅަނދުތައް ހުއްޓުވުމަށް އެމެރިކާ އިން ހިންގާ “ކަނޑު ފޭރުމުގެ ޢަމަލު” ތަކުގައި ބައިވެރި ނުވާން އިނގިރޭސި ސަރުކާރުން ވަނީ ނިންމާފައެވެ.