އެއް މަސްދުވަހުގެ މެދުކެނޑުމަކަށްފަހު އަންނަ ހަފުތާގައި ރައްޔިތުންގެ މަޖިލީހުގެ ޖަލްސާތައް އަލުން ފެށުމަށް މަޖިލީހުގެ އިދާރާއިން ތައްޔާރުވެއްޖެއެވެ.
މަޖިލީހުގެ މި އަހަރުގެ ފުރަތަމަ ދައުރުގެ 6 ވަނަ ޖަލްސާ ބޭއްވުމަށް ނިންމާފައިވަނީ އަންނަ ހޯމަ ދުވަހުއެވެ.ރައްޔިތުންގެ މަޖިލީހުގެ ޖަލްސާއެއް އެންމެ ފަހުން ބާއްވާފައިވަނީ މިދިޔަ މާޗު މަހުގެ 8 ވަނަ ދުވަހުއެވެ. އޭގެ ފަހުން ޖަލްސާތައް މެދުކަނޑާލަން ޖެހުނީ ރަމަޟާން މަހުގެ ފަހު 10 އަކީ ސަރުކާރު ބަންދު ދުވަސްތަކެއްގެ ގޮތުގައި ހަމަޖެއްސުމާ ގުޅިގެންނެވެ.
އަންނަ ހަފުތާގައި ޖަލްސާތައް ފެށުމަށް ތާވަލުކުރި ނަމަވެސް، ހޯމަ ދުވަހުގެ ޖަލްސާއަށް އެޖެންޑާ ކުރާނެ މަސައްކަތްތައް މަޖިލީހުގެ އިދާރާއިން އަދި ރަސްމީކޮށް ހާމައެއް ނުކުރެއެވެ.
Advertisement
މި ދައުރުގެ ތެރޭގައި ސަރުކާރުގެ ފަރާތުން މުހިންމު ބިލުތަކެއް ހުށަހެޅުމަށް ވަނީ ނިންމާފައެވެ. އޭގެ ތެރޭގައި މަރުގެ އަދަބު ދިނުމާ ގުޅޭ ބިލަކާއި، މަޖިލިސް މެންބަރުންނާއި ކައުންސިލަރުންގެ އިތުބާރު ނެތްކަމުގެ ވޯޓު ނެގުމާ ގުޅޭ އިސްލާހުތައް ހިމެނޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މީގެ ކުރިން ވިދާޅުވެފައެވެ.
ރައްޔިތުންގެ މަޖިލީހުގެ ގަވާއިދު ބުނާގޮތުން މަޖިލީހުގެ މަސައްކަތްތައް ކުރިއަށްދަނީ އަހަރަކު ތިން ދައުރަކަށް ބަހާލައިގެންނެވެ. މިހާރު ކުރިއަށްދާ ފުރަތަމަ ދައުރު މެއި މަހުގެ 15 ވަނަ ދުވަހާ ހަމައަށް ކުރިއަށްދާނެއެވެ. ދެވަނަ ދައުރު ޖޫން މަހުން ފެށިގެން އޮގަސްޓު މަހުގެ މެދާ ހަމައަށް ކުރިއަށްދާއިރު، ތިންވަނަ ދައުރު ކުރިއަށްދާނީ އޮކްޓޫބަރު މަހުން ފެށިގެން ނޮވެންބަރު މަހުގެ ނިޔަލަށެވެ.
