އީރާނު ހަނގުރާމަ އާއި ގުޅިގެން ދުނިޔޭގެ ބާޒާރުގައި ސާފުނުކުރާ ތެލުގެ އަގުތައް އިންތިހާއަށް އުފުލެމުންދިއުމާ ގުޅިގެން، މިޞްރުގެ ސަރުކާރުން ހަކަތަ ބޭނުންކުރާ މިންވަރު މަދުކުރުމަށްޓަކައި ގިނަ ޢަދަދެއްގެ މަގުގަކުން ކަރަންޓު ކަނޑާލައިފިއެވެ.

ރޭގަނޑު މިޞްރުގެ ގިނަ މަގުތައް މިހާރު އޮންނަނީ ކަނު އަނދިރީގައެވެ. މިޞްރަކީ އިސްރާއީލަށް ރައްކާތެރިކަން ހޯދައިދިނުމަށް އެއްބަސް ވެފައިވާ ޤައުމެއް ކަމަށް ވާއިރު، މިޞްރާއި ދުނިޔޭގެ އެހެން ޤައުމުތަކަށް ތެލުގެ ދަތިކަމް ކުރިމަތި މިވީ އެމެރިކާ އާއި އިސްރާއީލުން އީރާނަށް ބޮން އެޅުމުގެ ސަބަބުން ކުރަމުންދާ ހަނގުރާމަ އާއި ގުޅިގެންނެވެ. މި ހަނގުރާމަ ފެށުމުގެ ކުރިން އެމެރިކާ އިން ވަނީ ވެމެޒުއެލާގެ ތެޔޮވަޅުތައް ގަދަކަމުން އަތުލައިގަނެފައެވެ.

ހަނގުރާމަ އާއި ގުޅިގެން ތެލުގެ ސަޕްލައި ދަށް ވެފައި ވާތީވެ، މިޞްރުގެ އެކި ސަރަހައްދުތަކުގައި މިހާރު ރޭގަނޑު ވަގުތުތަކުގައި މަގުބައްތިތައް ދިއްލާފައި ބަހައްޓާ މިންވަރު މަދުކޮށް، ސަރުކާރުގެ އިދާރާތަކުގައި އޭސީ ބޭނުންކުރުން ވެސް ވަނީ ކޮންޓްރޯލް ކޮށްފައެވެ.

މީގެ އިތުރުން، ވިޔަފާރިކުރާ މޯލްތަކާއި ފިހާރަތައް ރޭގަނޑު ވަކި ގަޑިއަކަށް ބަންދުކުރުމަށްވެސް ވަނީ އަންގާފައެވެ. މިޞްރުގެ ބޮޑުވަޒީރުގެ އޮފީހުން ހާމަކޮށްފައިވާ ގޮތުގައި، މި ފިޔަވަޅުތަކުގެ މައިގަނޑު ބޭނުމަކީ ގުދުރަތީ ގޭސް ބޭނުންކުރާ މިންވަރު މަދުކޮށް، އެ ގޭސް ބޭރުގެ ގައުމުތަކަށް އެކްސްޕޯޓްކޮށްގެން ގައުމަށް ބޭރު ފައިސާ ހޯދުމެވެ.

މިޞްރުގެ ސަރުކާރުން ބުނެފައިވަނީ ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކުގެ ސަބަބުން ގައުމުގެ އިގްތިސާދަށް ބޮޑެތި ގޮންޖެހުންތަކެއް ކުރިމަތިވަމުންދާ ކަމަށެވެ. އަދި މި ދަނޑިވަޅުގައި އާންމު ރައްޔިތުންވެސް ހަކަތަ އިގްތިސާދު ކުރުމަށް ފަރުދީ ޒިންމާ އަދާކުރުމަށް ވަނީ އިލްތިމާސްކޮށްފައެވެ.