މި އަހަރުގެ މިހާތަނަށް ރާއްޖެއަށް ލައްކައަށްވުރެ ގިނަ ފަތުރުވެރިން ޒިޔާރަތްކޮށްފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ. 

މިނިސްޓްރީން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މި އަހަރުގެ މިހާތަނަށް ރާއްޖެއަށް ޖުމްލަ 601,707 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 6.5 އިންސައްތައިގެ ކުރިއެރުމެކެވެ. މީގެ ތެރޭގައި ވައިގެ މަގުން އައި 595,405 ފަތުރުވެރިންނާއި، ކަނޑުމަގުން ޒިޔާރަތްކުރި 6,302 ފަތުރުވެރިން ހިމެނެއެވެ.

މި އަހަރުގެ ފުރަތަމަ ތިން މަހުގެ ތަފާސްހިސާބުތަކަށް ބަލާއިރު، ޖެނުއަރީ މަހު 227,403 ފަތުރުވެރިން ވަނީ ޒިޔާރަތްކޮށްފައެވެ. ފެބުރުއަރީ މަހު 254,365 ފަތުރުވެރިން އައިސްފައިވާއިރު މި މަހުގެ 23 ވަނަ ދުވަހުގެ ނިޔަލަށް 119,939 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.

ރާއްޖެއަށް މިހާރު އެންމެ ގިނައިން ފަތުރުވެރިން ޒިޔާރަތްކުރާ ގައުމަކީ ޗައިނާއެވެ. އެ ގައުމުން މިހާތަނަށް 90,189 ފަތުރުވެރިން ވަނީ އައިސްފައެވެ. ދެވަނައިގައި 72,934 ފަތުރުވެރިންނާއެކު ރަޝިއާ އޮތްއިރު، ތިންވަނައިގައި އޮތީ 56,593 ފަތުރުވެރިންނާއެކު އިނގިރޭސިވިލާތެވެ. މީގެ އިތުރުން އިޓަލީވިލާތުން 54,955 ފަތުރުވެރިން އަދި ޖަރުމަނުވިލާތުން 38,711 ފަތުރުވެރިން ވަނީ ޒިޔާރަތްކޮށްފައެވެ.

ފަތުރުވެރިކަމުގެ ދާއިރާގައި މިވަގުތު ހިދުމަތް ދިނުމަށް 1,292 ތަނެއް ވަނީ ހުޅުވާފައެވެ. މީގެ ތެރޭގައި ރިސޯޓުތަކާއި، ގެސްޓްހައުސްތަކާއި، ހޮޓެލްތަކުގެ އިތުރުން ސަފާރީތައް ހިމެނެއެވެ. މި ތަންތަނުގެ ޖުމްލަ ބެޑް ކެޕޭސިޓީއަކީ 67,454 އެވެ.

ފަތުރުވެރިން ޗުއްޓީ ހޭދަކުރި ތަންތަނަށް ބަލާއިރު، އެންމެ ގިނަ ފަތުރުވެރިން ހޭދަކޮށްފައިވަނީ ރިސޯޓްތަކުގައެވެ. އެއީ 405,798 ފަތުރުވެރިންނެވެ. މީގެ އިތުރުން ގެސްޓްހައުސްތަކުގައި 156,223 ފަތުރުވެރިން، ހޮޓެލްތަކުގައި 17,063 ފަތުރުވެރިން އަދި ސަފާރީތަކުގައި 12,615 ފަތުރުވެރިން ޗުއްޓީ ހޭދަކޮށްފައިވާ ކަމަށް ތަފާސްހިސާބުތަކުން ދައްކައެވެ.