ރާއްޖޭގެ އިގްތިސާދީ ރައްކާތެރިކަން ކަށަވަރުކުރުމުގެ ގޮތުން، އެއް އަހަރު ދުވަހަށް ބޭނުންވާ ތެލުގެ ރިޒާވެއް ގާއިމްކުރުމަށް ވަޒީރުންގެ މަޖިލީހުގައި މަޝްވަރާ ކުރަން ފަށާފައިވާ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން މިނިސްޓަރު ޒަމީރު ވިދާޅުވީ، ރާއްޖޭގެ އިގްތިސާދު އެންމެ ބޮޑަށް ބަރޯސާވަނީ ތެލަށް ކަމަށްވާތީ، ތެލުގެ ރިޒާވެއް އޮތުމަކީ ގައުމަށް މިވަގުތު ވަރަށް ބޭނުންތެރި ކަމެއް ކަމަށެވެ. މިއީ މީޑިއަމް ޓު ލޯންގް ޓާމް ޕްލޭނެއްގެ ދަށުން ސަރުކާރުން ކުރިއަށްގެންދަން ނިންމާފައިވާ މަޝްރޫއެއްކަން މިނިސްޓަރު ފާހަގަކުރެއްވި އެވެ.

މިނިސްޓަރު ވިދާޅުވި ގޮތުގައި ރައީސް ޑރ. މުހައްމަދު މުއިއްޒުގެ އަމާޒަކީ ދުނިޔޭގެ ބާޒާރުގައި ހިނގާ ހަނގުރާމަތަކާއި ނުވަތަ ދިމާވެދާނެ ކުއްލި ހާލަތްތަކަށް ތައްޔާރުވުމުގެ ގޮތުން މިފަދަ ރިޒާވެއް ގާއިމްކުރުމެވެ. މި މަޝްރޫއު ކުރިއަށް އޮތް ތަނުގައި އެމްއެމްއޭއާ ގުޅިގެން ކުރިއަށް ގެންދާނެ ކަމަށާއި، ރާއްޖޭގެ ތިން ސަރަހައްދެއްގައި ތެޔޮ ރައްކާކުރާނެ ވަސީލަތްތައް ގާއިމްކުރެވޭނެ ކަމަށްވެސް މިނިސްޓަރު ވިދާޅުވި އެވެ.

ފަސް އަހަރުގެ ދުވަހުގެ މުއްދަތަށް ބަހާލައިގެން ކުރިއަށްގެންދާ މި ޕްލޭންގެ ފުރަތަމަ ފޭސް ކުރިއަށް އޮތް ދެ އަހަރު ދުވަހުގެ ތެރޭގައި ނިންމާލެވޭނެ ކަމަށް ލަފާކުރެވެ އެވެ.

މިހާރު ރާއްޖޭގައި ހުރި ތެލުގެ ސްޓޮކާ ގުޅޭގޮތުން މިނިސްޓަރު ވިދާޅުވީ، މިހާރު ހުރި ތެލުން އަންނަ މަހުގެ މެދެއްހާ ހިސާބަށް ފުދޭނެ ކަމަށެވެ. އަދި އަންނަ މަހުގެ 3 ނުވަތަ 4 ވަނަ ދުވަހު ތެލުގެ ދެ ޝިޕްމަންޓެއް ރާއްޖެއަށް ބަނދަރުކުރާނެ ކަމުގެ ޔަގީންކަންވެސް މިނިސްޓަރު ދެއްވި އެވެ.

ދުނިޔޭގެ ބާޒާރުގައި ތެލުގެ އަގު ދެގުނައަށްވުރެ ބޮޑުވެފައިވީ ނަމަވެސް، ރާއްޖޭގެ ބާޒާރުގައި ތެލުގެ އަގު ބޮޑުނުކުރާނެ ކަމުގެ ޔަގީންކަން މިނިސްޓަރު ޒަމީރު މިއަދު ދެއްވި އެވެ. އެގޮތުން އާންމުންނާއި އެކި ދާއިރާތަކަށް ކުރިމަތިވެދާނެ ތަކުލީފުތަކަށް ރިއާޔަތްކޮށް، ސަރުކާރުން ތެލުގެ އަގު ހިފަހައްޓާނީ ސަބްސިޑައިޒް ކޮށްގެން ކަމަށް މިނިސްޓަރު ވިދާޅުވި އެވެ.

މި ނޫސްވެރިންގެ ބައްދަލުވުމަކީ ދުނިޔޭގެ ހަނގުރާމަތަކާ ގުޅިގެން ރާއްޖެއަށް ކުރިމަތިވެދާނެ އަސަރުތައް ދިރާސާކުރުމަށް އުފައްދާފައިވާ ވަޒީރުންގެ ކޮމެޓީން ބޭއްވި ބައްދަލުވުމެކެވެ.