ބޭންކް އޮފް މޯލްޑިވްސް (ބީއެމްއެލް) އިން ކުރިއަށްގެންދާ 3,260 ހައުސިން ޔުނިޓުގެ މަޝްރޫއުގެ ދަށުން، ހުޅުމާލޭގައި ތަރައްގީކުރުމަށް ހަމަޖެހިފައިވާ 1,224 ހައުސިން ޔުނިޓުގެ ބިންގާ މިރޭ އަޅައިފި އެވެ.

ޗައިނާ މެޝިނަރީ އިންޖިނިއަރިން ކޯޕަރޭޝަން (ސީއެމްއީސީ) އާ ހަވާލުކޮށްގެން ކުރިއަށްގެންދާ މި މަޝްރޫއުގެ ބިންގާ އެޅުމުގެ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާއި އެމަނިކުފާނުގެ އަނބިކަނބަލުން ސާޖިދާ މުހައްމަދެވެ. މި ރަސްމިއްޔާތުގައި ވަޒީރުންގެ މަޖިލީހުގެ މެންބަރުންނާއި ސަރުކާރުގެ އިސްވެރިން ބައިވެރިވެވަޑައިގަތެވެ.

މި ހައުސިން ޔުނިޓުތަކުގެ ބިންގާ އަޅުއްވައިދެއްވީ ކޮންސްޓްރަކްޝަން އެންޑް އިންފްރާސްޓްރަކްޗާގެ މިނިސްޓަރު ޑރ. ޢަބްދުﷲ މުއްތަލިބާއި، ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލީޝިންގެ އިތުރުން ބީއެމްއެލްގެ ޗެއާޕާސަން އަޙްމަދު އަލީ ހަބީބާއި، ސީއީއޯ މުހައްމަދު ޝަރީފް އަދި ބީއެމްއެލް އެފޯޑަބަލް ހޯމް ލީސިންގެ އެމްޑީ ހަސަން ޝާމް އެވެ.

ބީއެމްއެލް އިން މައުލޫމާތު ދޭ ގޮތުގައި، މި މަޝްރޫއުގެ އަމަލީ މަސައްކަތް 2028 ވަނަ އަހަރުގެ މެދުތެރެއަށް ނިންމާލުމަކީ އެ ބޭންކުގެ އަމާޒެކެވެ. މި ބޮޑު މަޝްރޫއުގެ ދަށުން ބައެއް ޔުނިޓުތައް އެޅުމަށް ޗައިނާގެ އިތުރު ކުންފުންޏަކާއި ރާއްޖޭގެ ބައެއް ކުންފުނިތަކާވެސް ވަނީ ހަވާލުކޮށްފަ އެވެ. ސީއެމްއީސީއަކީ މީގެ ކުރިން 'ވިނަރެސް' ފްލެޓުތައްވެސް ކާމިޔާބުކަމާއެކު ނިންމާފައިވާ ކުންފުންޏެކެވެ.

މި މަޝްރޫއަކީ މަރުކަޒީ ބޭންކު (އެމްއެމްއޭ) އިން އެކުލަވައިލި 'އިންކްލޫސިވް ނޭޝަނަލް އެފޯޑަބަލް ހައުސިން' ގަވާއިދުގެ ދަށުން، ބީއެމްއެލްގެ ސަބްސިޑަރީ ކުންފުންޏެއް ކަމަށްވާ 'ބީއެމްއެލް އެފޯޑަބަލް ހޯމް ލީސިން' އިން ހިންގާ ފުރަތަމަ މަޝްރޫއެވެ.

ސަރުކާރުގެ 'އެންމެންނަށް ބޯހިޔާވަހިކަން' ސިޔާސަތުގެ ދަށުން ކުރިއަށްގެންދާ މި ޕްރޮގްރާމުގައި، ބީއެމްއެލްގެ 3,260 ޔުނިޓާއެކު ޖުމްލަ 7,900 ހައުސިން ޔުނިޓު ދޫކުރުމަށް ވަނީ ހަމަޖެހިފައެވެ. މި ފްލެޓުތަކަށް ކުރިމަތިލުމުގެ ފުރުސަތު މިހާރު ވަނީ އާންމުކޮށް ހުޅުވާލާފައެވެ. އާއިލީ ބޯހިޔާވަހިކަމުގެ މި މަޝްރޫއަކީ ރާއްޖޭގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް ސަރުކާރުން ކުރިއަށްގެންދާ މުހިންމު މަސައްކަތެކެވެ.