ސައޫދީ ޢަރަބިއްޔާގެ ގޭސް ފެސިލިޓި އަށް އީރާނުން ޙަމަލާ ދީފިއެވެ. ސައުދީން ބުނީ އެ ޤައުމުގެ ދެކާރުޚަނާ އަކަށް އީރާނުން ޙަމަލާ ދީފި ކަމަށާއި މިއާއި އެކު ތެހެރާނު ސަރުކާރަށް ކުރަމުން ދިޔަ ކުޑަކުޑަ އިތުބާރު ވެސް މިހާރު ގެއްލިފައިވާ ކަމަށެވެ.
ސައުދީގެ ފޮރިން މިނިސްޓަރު ޕްރިންސް ފައިސަލް ބިން ފަރުހާން އަލް ސައުދު ވިދާޅުވީ އީރާނުން އިތުރަށް ޙަމަލާ ދޭނަމަ އެ ޤައުމާއި ދެކޮޅަށް ޙަމަލާ ދޭން ޖެހިދާނެ ކަމަށާއި، އެކަމުގެ ޙައްޤު ސައޫދީއަށް ލިބިގެންވާ ކަމަށެވެ.
ރިޔާޒުގައި ނޫސްވެރިންނާއި ވާހަކަ ދައްކަވަމުން އޭނާ ވިދާޅުވީ އީރާނުން "އެގައުމުގެ ގޯސް ނިންމުންތައް މުރާޖައާ ކުރަން ޖެހޭ" ކަމަށާއި އެފަދަ ހަމަލާތަކުން ތެހެރާނަށް އެއްވެސް ފައިދާއެއް ނުލިބޭނެ ކަމަށެވެ.
އީރާނުން ވަނީ ރޭ އަބޫދާބީ އަށް ޑްރޯން އާއި މިސައިލްގެ ޙަމަލާ ދީފައެވެ. މީގެ އިތުރުން ޤަޠަރުގައި ހުންނަ ދުނިޔޭގެ އެންމެ ބޮޑު ގޭސް ހަބަށް ވެސް ޙަމަލާ ދިނެވެ.
ތެހެރާނާއި ދެކޮޅަށް ޢަދުއްވުން ހިންގާ ޢަމަލުތަކުގައި ސީދާ ގޮތުންނާއި ނުސީދާ ގޮތެއްގައި ބައިވެރިވުމަކީ އޭގެ ނަތީޖާ ލިބޭނެ ކަމެއް ކަމަށް އީރާނުން ވަނީ އިންޒާރު ދީފައެވެ.
އީރާނުން މި ޙަމަލާ ދީފައި މިވަނީ އެތަންތަން ހުސްކުރަން އިއްޔެގެ ވަގުތެއްގައި ސައޫދީ އަށާއި ޤަޠަރުގެ އިތުރުން ޔޫއޭއީ އަށް އިންޒާރު ވެސް ދިނުމަށް ފަހުގައެވެ.
