އިނގިރޭސި ޕްރިމިއާ ލީގުގައި ރޭ ކުޅުނު މުހިންމު މެޗުން އެސްޓަން ވިލާ 3-1 އިން ބަލިކޮށް، އަންނަ ސީޒަނުގެ ޗެމްޕިއަންސް ލީގުން ފުރުސަތު ހޯދުމަށް މެންޗެސްޓާ ޔުނައިޓެޑުން ކުރަމުންދާ މަސައްކަތުގައި މުހިންމު ކުރިއެރުމެއް ހޯދައިފި އެވެ.

ޔުނައިޓެޑްގެ އޯލްޑް ޓްރެފޯޑްގައި އާދީއްތަ ދުވަހު ކުޅުނު މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ނުޖެހުނު ނަމަވެސް، ދެވަނަ ހާފު ފަށައިގެން 53 ވަނަ މިނެޓުގައި ބްރެޒިލްގެ މިޑްފީލްޑަރު ކަސެމީރޯ ވަނީ ޔުނައިޓެޑަށް ކުރިހޯދައިދީފަ އެވެ. މިއީ ބްރޫނޯ ފެނާންޑޭޒް ނަގައިދިން ކޯނަރަކުން ކަސެމީރޯ ބޮލުން ކާމިޔާބުކުރި ލަނޑެކެވެ. ނަމަވެސް މެޗުގެ 64 ވަނަ މިނެޓުގައި ރޮސް ބާކްލީ ވަނީ ލަނޑެއް ޖަހައި ވިލާއަށް ނަތީޖާ އެއްވަރުކޮށްދީފަ އެވެ.

ޔުނައިޓެޑުން މެޗުގެ ކޮންޓްރޯލް އަލުން ހޯދީ 71 ވަނަ މިނެޓުގައި މަތެއަސް ކޫންހާ ޖެހި ލަނޑުންނެވެ. އަދި މެޗު ނިމެން 9 މިނެޓަށް ވެފައި ވަނިކޮށް ބެންޖަމިން ސެސްކޯ ވަނީ ޔުނައިޓެޑްގެ ތިންވަނަ ލަނޑު ޖަހައި މޮޅު ކަށަވަރުކޮށްދީފަ އެވެ.

މި ނަތީޖާއާއެކު ޔުނައިޓެޑް އޮތީ ތާވަލުގެ ތިންވަނައިގައި ވިލާއަށްވުރެ ތިން ޕޮއިންޓް ކުރީގަ އެވެ. މިއީ ވަގުތީ ކޯޗު މައިކަލް ކެރިކްގެ އިރުޝާދުގެ ދަށުން ޔުނައިޓެޑުން ކުޅުނު 9 މެޗުގެ ތެރެއިން ހޯދި ހަތްވަނަ މޮޅެވެ. ރޫބެން އަމޯރިމް މަގާމުން ވަކިކުރުމަށްފަހު ކެރިކްގެ އިރުޝާދު ދަށުން ދައްކަމުންދާ މޮޅު ކުޅުމަށް ޔުނައިޓެޑްގެ ކޯ-އޯނަރު ޖިމް ރެޓްކްލިފް ވަނީ ތައުރީފު ކުރައްވާފަ އެވެ.

މި މެޗުގައި ޔުނައިޓެޑްގެ ކެޕްޓަން ބްރޫނޯ ފެނާންޑޭޒް ވަނީ ދެ އެސިސްޓް ހަދައި، ކްލަބުގެ ރެކޯޑެއް މުގުރާލާފަ އެވެ. އޭނާ ވަނީ މި ސީޒަނުގައި 16 އެސިސްޓް ހަމަކޮށް، 1999-2000 ވަނަ އަހަރުގެ ސީޒަނުގައި ޑޭވިޑް ބެކަމް ހަދާފައިވާ 15 އެސިސްޓްގެ ރެކޯޑް ފަހަނައަޅައި ގޮސްފަ އެވެ.

ލީގުގެ އެހެން މެޗުތަކަށް ބަލާއިރު، ނޮޓިންހަމް ފޮރެސްޓާއި ފުލަމް ބައްދަލުކުރި މެޗު 0-0 އިން އެއްވަރުވިއިރު، ލީޑްސް ޔުނައިޓެޑާއި ކްރިސްޓަލް ޕެލަސް ބައްދަލުކުރި މެޗުވެސް ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.