ސްޕެނިޝް ލަލީގާގައި ރޭ ކުޅުނު މެޗުގައި ޒުވާން ތަރި ލަމީން ޔަމާލް ކާމިޔާބުކޮށްދިން ހަމައެކަނި ލަނޑާއެކު، އެތުލެޓިކް ކްލަބުގެ މައްޗަށް 1-0 އިން ކުރިހޯދައި ބާސެލޯނާ އިން ތާވަލުގެ އެއްވަނައިގައި ހަތަރު ޕޮއިންޓުގެ ލީޑެއް އަލުން ގާއިމުކޮށްފި އެވެ.
އެތުލެޓިކް ކްލަބުގެ ދަނޑު، ސަން މާމޭސްގައި ކުޅުނު މި މެޗުގެ ފުރަތަމަ ހާފުގައި އެތުލެޓިކުން ވަނީ ބާސެލޯނާ ހިފަހައްޓައި، މޮޅު ކުޅުމެއް ދައްކާފަ އެވެ. ނަމަވެސް މެޗުގެ އޮއިވަރު ބަދަލުވީ 68 ވަނަ މިނެޓުގައެވެ. ޕެޑްރީ ތަނަވަސްކޮށްދިން ފުރުސަތަކުން، އުމުރުން 18 އަހަރުގެ ޔަމާލް ވަނީ ގޯލުގެ މަތީ ކަނަށް ބޯޅަ ފޮނުވާލައި ބާސެލޯނާއަށް ކުރިހޯދައިދީފަ އެވެ.
މިއީ މި ސީޒަނުގައި ހުރިހާ މުބާރާތެއްގައި ޔަމާލް ކާމިޔާބުކުރި 19 ވަނަ ލަނޑެވެ. އަދި ލަލީގާގައި އޭނާ ޖެހި 13 ވަނަ ލަނޑެވެ. ހޮނިހިރު ދުވަހުގެރޭ ސެލްޓަ ވިގޯ އަތުން ރިއާލް މެޑްރިޑް މޮޅުވެ، ބާސެލޯނާއާ ވިއްދާލާފައި އޮތް ނަމަވެސް، މި މޮޅާއެކު ބާސެލޯނާ އިން ވަނީ އަލުން ފަރަގު ބޮޑުކޮށްފަ އެވެ.
ބާސެލޯނާ ދެން އެންމެ އަވަހަށް ނުކުންނާނީ އަންގާރަ ދުވަހު އޮންނަ ޗެމްޕިއަންސް ލީގުގެ ގަދަ 16 ގެ ފުރަތަމަ ލެގުގެ މެޗަށެވެ. އިނގިރޭސިވިލާތުގެ ސެއިންޓް ޖޭމްސް ޕާކުގައި ކުޅޭ މި މެޗުގައި ބާސެލޯނާ ބައްދަލުކުރާނީ ނިއުކާސަލް ޔުނައިޓެޑާ އެވެ.
ލަލީގާގެ އެހެން މެޗުތަކަށް ބަލާއިރު، އެތުލެޓިކޯ މެޑްރިޑުން ވަނީ ވަންޑާ މެޓްރޯޕޮލިޓާނޯގައި ރިއާލް ސޮސިއެޑާޑްގެ މައްޗަށް 3-2 އިން ކުރިހޯދާފަ އެވެ. މި މެޗުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ނިކޮލަސް ގޮންޒާލޭޒް ވަނީ ދެ ލަނޑު ކާމިޔާބުކޮށްދީފަ އެވެ. މެޗުގެ ކުރީކޮޅު އެލެގްޒެންޑާ ސޮރްލޮތް އާއި ކާލޮސް ސޮލާ ލަނޑުތައް ކާމިޔާބުކުރިއިރު، ދެވަނަ ހާފުގައި ގޮންޒާލޭޒް އާއި މިކޭލް އޮޔާޒަބަލް ލަނޑު ޖެހީ އެއް މިނެޓުގެ ތަފާތުންނެވެ. އެތުލެޓިކޯ މޮޅުވި ލަނޑު ގޮންޒާލޭޒް ޖެހީ މެޗު ނިމެން ނުވަ މިނެޓަށް ވެފައި ވަނިކޮށް ބޮލުންނެވެ.
ޑިއޭގޯ ސިމިއޯނީގެ އެތުލެޓިކޯ މެޑްރިޑުން އަންގާރަ ދުވަހު ޗެމްޕިއަންސް ލީގުގެ ގަދަ 16 ގެ ފުރަތަމަ ލެގުގައި އަމިއްލަ ދަނޑުގައި ޓޮޓެންހަމްއާ ދެކޮޅަށް ނުކުންނާނެ އެވެ.
