އިނގިރޭސި އެފްއޭ ކަޕްގެ ފަސްވަނަ ބުރުގައި ރޭ ކުޅުނު މެޗުގައި ނިއުކާސަލް ޔުނައިޓެޑް 3-1 އިން ބަލިކޮށް، މެންޗެސްޓަރ ސިޓީން މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.

މި ސީޒަނުގައި މި ދެ ޓީމު ބައްދަލުކުރި ފަސްވަނަ މެޗުގައި، ސިޓީގެ ކޯޗު ޕެޕް ގާޑިއޯލާ ވަނީ އެޑީ ހޯވްގެ ނިއުކާސަލްގެ މައްޗަށް ހަތަރުވަނަ ފަހަރަށް ކުރިހޯދާފަ އެވެ. ސިޓީން މި މެޗަށް ނުކުތީ ފުރަތަމަ އެގާރައަށް 10 ބަދަލެއް ގެނެސްގެން ނަމަވެސް، އެޓީމުން ވަނީ ވަރުގަދަ ކުޅުމެއް ދައްކާފަ އެވެ.

މެޗު ފެށިގެން ނިއުކާސަލްއިން ވަނީ ވަރުގަދަ އެޓޭކްތަކެއް ކޮށްފައެވެ. އެގޮތުން ސަންޑްރޯ ޓޮނާލީ ތަނަވަސްކޮށްދިން ފުރުސަތަކުން ހާވީ ބާންސް ވަނީ ލަނޑެއް ޖަހައި ނިއުކާސަލްއަށް ކުރިހޯދައިދީފަ އެވެ. މިއީ އޭނާ އެންމެ ފަހުން ކުޅުނު 13 މެޗުގައި ޖެހި ފުރަތަމަ ލަނޑެވެ. ނަމަވެސް ސިޓީން ވަނީ ހިތްވަރު ދޫނުކޮށް ކުޅުން ރަނގަޅުކޮށްފަ އެވެ. އެޓީމަށް ނަތީޖާ ހަމަހަމަކޮށްދިނީ ސަވީނިއޯ އެވެ.

މެޗުގެ ދެވަނަ ހާފު ފެށިގެން މާގިނަ އިރުތަކެއް ނުވަނީސް، އޮމަރު މާމޫޝް ވަނީ ސިޓީއަށް ލީޑު ނަގައިދީފަ އެވެ. އަދި އޭގެ އިރުކޮޅެއް ފަހުން އޭނާ ވަނީ އިތުރު ލަނޑެއް ޖަހައި ސިޓީގެ މޮޅު ކަށަވަރުކޮށްދީފަ އެވެ. މި ލަނޑާއެކު ބެންޗުގައި ހުރި ގާޑިއޯލާ ވަނީ ވަރަށް ބޮޑަށް އުފާފާޅުކޮށްފަ އެވެ.

މިދިޔަ ބުދަ ދުވަހު ޕްރިމިއާ ލީގުގައި ނޮޓިންހަމް ފޮރެސްޓާ ދެކޮޅަށް ކުޅުނު މެޗު އެއްވަރުވުމުން ސިޓީއަށް ކުރިމަތިވި ފާޑުކިޔުންތަކަށް މިއީ ދިން ވަރުގަދަ ރައްދެކެވެ. ސިޓީން އަދިވެސް އަންނަނީ މި ސީޒަނުގެ ހަތަރު މުބާރާތް ކާމިޔާބުކުރުމުގެ އަމާޒުގައި މަސައްކަތް ކުރަމުންނެވެ.

މި ނަތީޖާއާއެކު ނިއުކާސަލް ވަނީ މި ސީޒަނުގެ ދެވަނަ ކަޕް މުބާރާތުން ސިޓީ އަތުން ބަލިވެ ކަޓާފަ އެވެ. މީގެ ކުރިން ކަރަބާއޯ ކަޕުންވެސް އެޓީމު ކެޓީ ސިޓީ އަތުންނެވެ. ނިއުކާސަލް ދެން ނުކުންނާނީ އަންގާރަ ދުވަހު ޗެމްޕިއަންސް ލީގުގައި ބާސެލޯނާއާ ދެކޮޅަށެވެ. ސިޓީ ބުދަ ދުވަހު ރެއާލް މެޑްރިޑާ ދެކޮޅަށް ނުކުންނާނެ އެވެ.

އެފްއޭ ކަޕްގެ ކުއާޓާ ފައިނަލްގައި ސިޓީއާ ދެކޮޅަށް ކުޅޭނެ ޓީމެއް އެނގޭނީ ހޯމަ ދުވަހުގެ ރޭ ބާއްވާ ގުރުއަތުލުމަށްފަހު އެވެ.