ނިއުރޯ ސާޖަރީތަކުގެ ރައްކާތެރިކަން އިތުރުކުރުމުގެ ގޮތުން "އިންޓްރާ އޮޕަރޭޓިވް ނިއުރޯމޮނިޓަރިން" ގެ ހިދުމަތް އައިޖީއެމްއެޗްގައި އިއްޔެ ފަށައިފި އެވެ.

މި އާ ހިދުމަތާ ގުޅޭގޮތުން އައިޖީއެމްއެޗުން އާންމުކުރި ވީޑިއޯއެއްގައި، ރާއްޖޭގެ އެންމެ ތަޖުރިބާކާރު ނިއުރޯ ސާޖަން ޑރ. އަލީ ނިޔާފު ވިދާޅުވީ، އިންޓްރާ އޮޕަރޭޓިވް ނިއުރޯމޮނިޓަރިންއަކީ ސާޖަރީގެ ތެރޭގައި ބަލިމީހާގެ ރައްކާތެރިކަން ކަށަވަރުކުރުމަށްޓަކައި ވަރަށް މުހިންމު ވަސީލަތެއް ކަމަށެވެ.

ޑރ. ނިޔާފު ވިދާޅުވި ގޮތުގައި، މި ވަސީލަތުގެ ސަބަބުން ސާޖަރީ ހަދަމުންދާ ވަގުތު ނާރުތަކުގެ މަސައްކަތްތައް ޑޮކްޓަރުންނަށް ވަގުތުން ފެންނަމުންދާނެއެވެ. މީގެ ސަބަބުން ނާރަކަށް އެއްވެސް ކަހަލަ ގެއްލުމެއް ވާނަމަ، އެކަން ދެނެގަނެ ސަމާލުވުމުގެ ފުރުސަތު ޑޮކްޓަރުންނަށް ލިބިޭނެ ކަމަށެވެ.އަދި ސާޖަރީ ހަދާ ސަރަހައްދުގެ ބޭރުން އެހެން ނާރަކާ ހިސާބަށް ދެވޭނަމަ، މި މޮނީޓަރުން ޑޮކްޓަރުންނަށް "އެލާމް" ކުރާނެ ކަމަށްވެސް އޭނާ ފާހަގަކުރެއްވިއެވެ.

އޭގެ އިތުރުން ރާއްޖޭގައި އެންމެ އާންމުކޮށް ކުރާ ކަނދުރާ އާއި މައިބަދައިގެ ޑިސްކު ސާޖަރީތަކުގައި މި ހިދުމަތުގެ ބޭނުންތެރިކަން ބޮޑެވެ. ޑރ. ނިޔާފު ވިދާޅުވި ގޮތުގައި މައިބަދައިގެ އޮޕަރޭޝަންތަކުގައި އިސްކުރު ޖަހާއިރު، އެ އިސްކުރުގެ ސަބަބުން ނާރަކަށް ފިތުން ފަދަ ކަމެއް ދިމާވާނަމަ މި ވަސީލަތާއެކު އެކަން ވަގުތުން ފާހަގަވާނެއެވެ.

"އޭގެ ނަތީޖާއަކަށް ވާނީ ބަލިމީހާ އޮޕަރޭޝަންގެ ތެރޭގައި ދިމާވެދާނެ ނޭދެވޭ ކަންކަން މަދުކުރެވުން،" ޑރ. ނިޔާފު ވިދާޅުވިއެވެ.

މި ސިސްޓަމް ބޭނުންކުރަން ފެށުމަކީ ރާއްޖޭގައި ނިއުރޯ ސާޖަރީ ހަދާއިރު ކުރިމަތިވާ ބޮޑެތި ނުރައްކާތަކުން ސަލާމަތްވުމަށް އެޅުނު މުހިންމު ފިޔަވަޅެއްގެ ގޮތުގައި އައިޖީއެމްއެޗުން ދެކެއެވެ. މި އާ ހިދުމަތާއެކު ރާއްޖޭގެ ސިއްހީ ނިޒާމަށް، ހާއްސަކޮށް ނިއުރޯ ސާޖަރީގެ ދާއިރާއަށް ބޮޑު ކުރިއެރުމެއް ލިބޭނެއެވެ.